काठमाडौं– आउँदो मंसिर ४ गते हुने प्रतिनिधि सभा र प्रदेश सभा सदस्य निर्वाचनका लागि राजनीतिक दलहरुभित्र भएको टिकट वितरणको असन्तुष्टि आइतबार मनोनयन दर्ताका क्रममा देखिएको छ।
प्रमुख राजनीतिक दल नेपाली कांग्रेस र नेकपा एमालेमा विद्रोह गर्दै उम्मेदवारी दर्ता गराउने क्रम जारी रहेको छ। नेकपा एमालेले टिकट नदिएपछि शनिबार नै एमाले नेता घनश्याम भुसालले एमाले परित्यागको घोषणा गरे। उनले स्वतन्त्र उम्मेदवारी दर्ता गराएका छन्।
त्यस्तै, आइतबार विभिन्न जिल्लामा एमाले र कांग्रेसका नेताहरूले विद्रोह गर्दै उम्मेदवारी दर्ता गराएका छन्। यसरी दर्ता बागी उम्मेदवारी दर्ता गराउनेमा कांग्रेसका नेता धेरै देखिएका छन्।
हालसम्म कांग्रेसमा विद्रोह गर्दै उम्मेदवारी दिनेमा अमेरशकुमार सिंह पनि परेका छन्। सर्लाही–४ मा पार्टीले नगेन्द्रकुमार रायलाई टिकट दिएपछि सिंहले बागी उम्मेदवारी दिएका हुन्।
सिन्धुपाल्चोक–२ मा मोहन बस्नेतविरुद्ध कांग्रेसका बद्री चौलागाईंले उम्मेदवारी दिएका छन्। चौलागाईं कांग्रेसका पूर्वक्षेत्रीय सभापति हुन्। रमेश लेखकविरुद्ध पनि दुई जना महाधिवेशन प्रतिनिधिले बागी उम्मेदवार दिएका छ्न्।
कञ्चनपुर–३ मा लेखकविरुद्ध आफ्नै पार्टीका दीपक सिंह र शारदा चन्दले उम्मेदवारी दिएका हुन्। उनीहरु दुवै कांग्रेसका महाधिवेशन प्रतिनिधि हुन्।
गुल्मी–२ मा एकीकृत समाजवादीकी उम्मेदवार रामकुमारी झाँक्रीविरुद्ध नेपाली कांग्रेसका दामोदर भुसालले उम्मेदवारी दर्ता गराएका छन्। सत्ता गठबन्धनको भागबन्डामा उक्त क्षेत्र एकीकृत समाजवादीको भागमा परेको थियो।
एमाले नेता रामविर मानन्धरले काठमाडौं–७ बाट स्वतन्त्र उम्मेदवारी दिएका छन्। यो क्षेत्रमा एमालेले जसपाका राजेन्द्र श्रेष्ठलाई सहयोग गर्ने गरि गठबन्धन गरेको थियो।
त्यस्तै, कांग्रेसका केन्द्रीय सदस्य दिनेश कोइरालाले चितवन–३ बाट स्वतन्त्र उम्मेदवारी दिएका छन्। यो क्षेत्र सत्ता गठबन्धनको तर्फबाट माओवादी केन्द्रको भागमा परेको थियो।
माओवादी केन्द्रका अध्यक्ष पुष्पकमल दाहाल ‘प्रचण्ड’ले लड्दै आएको उक्त क्षेत्रमा यसपटक माओवादीले डा भोजराज अधिकारीलाई उम्मेदवार बनाएको छ।
रुपन्देही ५ मा नेकपा एमालेका तर्फबाट दुई जनाको मनोनयन दर्ता भएको छ । तिलोत्तमाका पूर्व मेयर बासुदेव घिमिरे र खिमलाल भट्टराईले एमालेबाट मनोनयन दर्ता गराएका हुन् ।
निर्वाचन कार्यालयले दुवै जनालाई एमालेको तर्फबाट मनोनयन दर्ताको निस्सा दिएको छ । घिमिरेको दर्ता नम्बर ११ र भट्टराईको दर्ता नम्बर १७ छ ।
कास्की– ३ बाट प्रतिनिधि सभा सदस्यका लागि सत्ता गठबन्धन र एमाले दुबैका विरूद्ध बागी उम्मेदवारी परेको छ।
माओवादी केन्द्रका नेता रामजी बराललाई सत्ता गठबन्धनले आधिकारिक उम्मेदवार बनाएको थियो। बरालले उम्मेदवारी दर्ता गरेपछि माओवादी कार्यकर्ता अनिता भुर्तेलले पनि सोही क्षेत्रबाट स्वतन्त्र उम्मेदवारी दिएकी छिन्।
यस्तै, एमाले उम्मेदवार विरूद्ध पनि बागी उम्मेदवारी परेको छ। एमालेले उक्त क्षेत्रबाट दामोदर पौडेल ‘बैरागी’ लाई उठाएको छ। बैरागीले उम्मेदवारी दिएपछि एमाले कार्यकर्ता जगन्नाथ बास्तोलाले स्वतन्त्र उम्मेदवारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
