काठमाडौं- बहुदलपछि नेपाली कांग्रेसको अर्थनीतिको नेतृत्व गरिरहेका डा रामशरण महत यसपल्ट सक्रिय राजनीतिबाट बिदा हुँदै थिए। डा महत बाहिरिएपछि खाली हुने पार्टीमा ‘अर्थविद्’ को स्पेश बनाउन कांग्रेसका केही अर्थविद्हरु प्रतिस्पर्धा गरिरहेका थिए। तीमध्ये विश्व पौडेल र स्वर्णिम वाग्लेको सबैभन्दा बढी प्रतिस्पर्धा थियो।
संसदीय प्रणालीमा छिरेर कांग्रेसको अर्थनीतिको नेतृत्व गर्ने उक्त प्रतिस्पर्धामा पौडेलले बाजी मारेको जस्तो देखिएको छ। किनभने प्रतिनिधि सभा सदस्यको उम्मेदवार बन्ने दुवैको प्रयत्न थियो तर पौडेल मात्रै सफल भएका छन्।
नेपाली कांग्रेस सभापति तथा प्रधानमन्त्री शेरबहादुर देउवानिकट रहेका पौडेलले चितवन-१ बाट टिकट पाएका छन्। सोही क्षेत्रबाट सिफारिस भएका वाग्ले यसपल्ट उम्मेदवार हुन वञ्चित भएका छन्।
चितवन- १ का साथै उनको काठमाडौं- ५ मा समेत चर्चा थियो। डा प्रकाशशरण महतले छाडेको उक्त क्षेत्रमा युवा नेताहरु प्रदीप पौडेल र नैनसिंह महरले पनि सुरुदेखि दाबी गरेका थिए। उक्त क्षेत्रमा कांग्रेसको संस्थापन पक्षनिकट नै रहेका पौडेलले टिकट पाएका छन्।
यी दुवै क्षेत्रमा टिकट नपाएका उनलाई काठमाडौं- ४ छाडेर भए पनि प्रतनिधि सभामा उम्मेदवार बनाउने शेखर-गगन समूहको प्रयत्नसमेत बालुवाटारले विफल पारिदिएको छ। सर्लाही- ४ बाटसमेत सिफारिस भएका महामन्त्री गगन थापाले शनिबार अबेरसम्म दुवै क्षेत्र रिजर्भ राखेका थिए।
तर, उक्त कुराको सुइँको पाएपछि बालुवाटारले आइतबार बिहानै काठमाडौं- ४ को टिकट सभापति देउवाकै गृहजिल्लावासी नेता नैनसिंह महरलाई थमायो। दिउँसोसम्म थापा झण्डै टिकटविहीन अवस्थामा पुगे।
त्यसपछि भने वाग्लेलाई उम्मेदवार बनाइछाड्ने संस्थापनइतरको प्रयत्न असफल नै सावित भयो। कांग्रेस स्रोतका अनुसार सुरुदेखि नै देउवा निकट समूह वाग्लेप्रति अनुदार थियो। खासगरी प्रधानमन्त्री पत्नी आरजु राणा, व्यवसायीहरु विनोद चौधरी, उमेश श्रेष्ठ र योजना आयोगका उपाध्यक्षसमेत रहेका पौडेलले वाग्लेलाई रोक्न सकेको प्रयत्न गरे।
देउवाले वाग्लेलाई टिकट दिन रुचि नदेखाएको देखिएपछि उक्त पक्षका वाग्लेप्रति सकारात्मक नेताहरुसमेत बोल्न सकेनन्। कुनै समय वाग्ले देउवानिकट नै थिए।
एक समय संयोगले उनी डा शेखर कोइरालासँग कैलालीमा भएको एक कार्यक्रम मञ्च शेयर गर्न पुगे। त्यही घटनालाई देउवाको सचिवालय र स्वार्थ समूहले दूरी बढाउने औजारको रुपमा प्रयोग गरेको वाग्लेनिकट कांग्रेस नेताहरु बताउँछन्।
त्यसपछि देउवासँग प्रत्यक्ष कुराकानीबाट वाग्ले अलग्याइए र पछिल्लो समय शेखर-गगनकै कित्तामा पुर्याइए। वाग्लेको बढ्दो लोकप्रियताले कांग्रेसकै केही नेताहरु झस्किएका थिए। सम्भावित प्रतिस्पर्धीका रुपमा उनलाई हेर्नेहरुले पनि उनलाई टिकटबाट वञ्चित गराउने केही नेताहरुको प्रयत्नमा सघाए।
यही बीचमा डा शेखर कोइरालाले एक बैठकमा वाग्लेलाई उम्मेदवार बनाउँदा कांग्रेसले समानुपातिकमासमेत भोट बढाउने दावी गरिदिए। उनको सार्वजनिक छवि राम्रो भएको बताउँदै उम्मेदवार बनाउन लबिङ गरेपछि देउवा पक्ष झन् झस्कियो।
चितवन- १ मा रोक्न विश्व नै सक्रिय छँदै थिए। काठमाडौं- ५ मा रोक्न प्रदीप अघि सारिए। काठमाडौं- ४ को सम्भावित बाटो छेक्न महर ‘मोहरा’ मात्रै भए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
