काठमाडौं– मंसिर ४ गते हुने प्रतिनिधि सभा र प्रदेश सभाको निर्वाचनका लागि आइतबार (असोज २३) गते मनोनयन दर्ताको समय तोकिएको छ। बिहान १० बजेदेखि बेलुका ५ बजेसम्म मनोनयनको समय तोकेको छ।
दलहरु उम्मेदवारी दर्ता गर्ने अघिल्लो दिनसम्म अन्तिम नाम टुङ्ग्याउने प्रयासमै रहेका छन्। सत्ता गठबन्धन र प्रमुख प्रतिपक्ष नेकपा एमाले पनि केही क्षेत्रमा उम्मेदवार टुङ्ग्याउने छलफलमै व्यस्त रहेको छ।
उम्मेदवार टुङ्ग्याउन परेको सकसलाई ध्यानमा राख्दै मनोनयन दर्ता गर्ने समय सार्न पनि निर्वाचन आयोगकहाँ प्रस्ताव पुगेको थियो। तर, प्रमुख निर्वाचन आयुक्त दिनेशकुमार थपलियाले आयोगले निर्वाचनको समय तालिका परिर्वतन गर्न नसक्ने स्पष्ट पारे।
निर्वाचन तालिका सार्दा सबैतिर बिग्रने भएकाले त्यसका लागि केही सहज व्यवस्था गर्ने तयारीमा आयोग रहेको प्रमुख आयुक्त थपलियाले बताए। उम्मेदवारले आठ प्रकारको कागजात पनि पेस गर्नुपर्ने छ। समयभित्र आफैं उपस्थित भएर मनोनय दर्ता गर्नुपर्नेदेखि पार्टी केन्द्रले टिकट दिने कुरालाई सहज गराउने प्रयास आयोगबाट गर्ने तयारी भइरहेको उनले बताए।
आयोगले अघि सारेका केही विकल्प
निर्वाचन आयोगले अहिलेको मौसम, दलहरुको छलफल र अन्य कारणलाई समेत ख्याल गर्दै आइतबार मनोनयनपत्र दर्ता गर्ने कुरामा केही विकल्पहरु अघि सारेको छ। आयोगले यसरी अघि सारेको विकल्पले दलहरुलाई सहज हुने थपलियाको दाबी छ।
आयोगले अघि सारेको पहिलो विकल्प हो; राजनीतिक दलहरुले देशभरको मनोनयनपत्र एकसाथ संकलन गरेर निर्वाचन आयोगमा बुझाउने अनि आयोगले आफ्नो संयन्त्रमार्फत् सम्बन्धित निर्वाचन अधिकृतको कार्यालयमा मेल गरेर पठाउने।
यसो हुँदा मनोनयनपत्र काठमाडौंबाट बोकेर जान नपर्ने र उम्मेदवार हुने व्यक्ति वा वारेस मात्र गए हुने आयोगको प्रस्ताव छ। दलहरु तयार भएमा यसले सम्बन्धित जिल्लामा सिफारिसको प्रति र उम्मेदवार समेत उपस्थित नभएको अवस्थामा समेत मनोनयपत्र दर्ता हुनसक्ने थपलियाको भनाइ छ।
त्यस्तै, अर्को भनेको जिल्ला निर्वाचन कार्यालयमा दलहरुले इमेलमार्फत् मनोनयनपत्र पठाउने। जसले गर्दा उम्मेदवार सम्वन्धित क्षेत्रमा पुग्न समय पाउने आयोगको बुझाइ छ। निर्वाचन आयोगले मनोनयन दर्ताबारे जानकारी दिन शनिबार पत्रकार सम्मेलन पनि राखेको छ।
प्रमुख आयुक्त थपलियाले पत्रकार सम्मेलनबाट अझै प्रष्ट पार्ने बताए। दिउँसो ३ बजे आयोगले पत्रकार सम्मेलन राखेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
