काठमाडौं- मंसिर ४ मा हुने प्रतिनिधि र प्रदेश सभा निर्वाचनमा सत्तारुढ र प्रतिपक्ष दलहरुले गठबन्धन बनाउने तय भएको छ। सत्ता गठबन्धनकाविरुद्ध प्रतिपक्ष दल नेकपा एमालेले पनि गठबन्धन नै बनाउने गरी छलफल अघि बढाएको छ।
शुक्रबारदेखि गठबन्धनका दलहरुको समिकरणमा भने केही फेरबदल देखिएका छन्। सत्ता गठबन्धनका पाँच दलमध्ये एक, जनता समाजवादी पार्टी (जसपा) प्रमुख प्रतिपक्ष दल नेकपा एमालेसँग नजिकएको छ। सत्ताबाहिर रहेको लोकतान्त्रिक समाजवादी पार्टी (लोसपा)लाई सत्ता गठबन्धनले रातो कार्पेट ओछ्याएको छ।
शुक्रबार बिहानैदेखि सत्ता गठबन्धनको बैठक बालुवाटारमा जारी छ। यही बीचमा लोकतान्त्रिक समाजवादी पार्टीलाई बोलाएर गठबन्धनका शीर्ष नेताहरुले छलफल गरेका छन्।
गठबन्धनसँग लोसपाको संवाद सकारात्मक रहेको नेताहरुले बताएका छन्। फेरि बसेर सिट बाँडफाँटमा संख्या र क्षेत्रसहित सहमति गर्नेगरी पहिलो छलफल टुंगिएको लोसपा नेता जितेन्द्र सोनलले जानकारी दिए।
उनले भने, ‘आजै केहीबेरमा वा भोलि बिहान बसेर बाँकी सहमति गर्ने कुरा छ। सत्ता गठबन्धनसँगै तालमेल गर्ने कुरामा लगभग सहमति भयो।’
लोसपाका अर्का एक नेताका अनुसार नेताहरुले सुरुमा जनता समाजवादी पार्टी (जसपा)का लागि छुट्याइएको १६ सिट मागेका थिए। तर, गठबन्धनले मधेश प्रदेशमा १२ देखि १३ सिट दिन सकिने प्रस्ताव गरेको छ। एउटा लुम्बिनी प्रदेशमा सर्वेन्द्रनाथ शुक्लाका लागि पनि मागिएको छ।
मधेश प्रदेश सरकार भने सबैभन्दा ठूलो दलको नेतृत्वमा हुनुपर्ने भनिएको छ। अघिल्लोपटककै सुत्रअनुसार फेरि पनि सरकार बनाउनुपर्ने लोसपाको प्रस्ताव छ।
सबै विषयमा सत्ता गठबन्धका नेताहरु सकारात्मक रहेको लोसपा नेताहरुले बताएका छन्। जसपाले गठबन्धन छाड्ने संकेत गरेपछि सत्ता गठबन्धनले लोसपालाई बालुवाटार बोलाएका थियो। लोसपा अध्यक्ष महन्थ ठाकुर, नेता राजेन्द्र महतोसहितका नेताहरु बालुवाटार पुगेका थिए।
यसैगरी, प्रमुख प्रतिपक्ष दल नेकपा एमालेले जसपा र राष्ट्रिय प्रजातन्त्र पार्टी (राप्रपा)सँग संवाद गरिरहेको छ। राप्रपाका अध्यक्ष राजेन्द्र लिङ्देन, उपाध्यक्ष बुद्धिमान तामाङ, महामन्त्री धवल समशेर राणा र डा प्रकाशचन्द्र लोहनीले एमाले अध्यक्ष केपी शर्मा ओलीसँग संवाद गरेका छन्। उनीहरुले केही शीर्ष नेताहरुको निर्वाचन क्षेत्र मागेको बुझिएको छ। उक्त विषयमा सकारात्मक रहेको बताइएको छ।
यसैगरी, जसपाले एमालेसँग २५ सिट लिनेगरी सहमति खोजेको छ। मधेश प्रदेशका १६ र अन्य प्रदेशका ९ क्षेत्र जसपाले प्रस्ताव गरेको छ। सत्ता गठबन्धनमा १६ भन्दा बढी सिट नपाउने भएपछि जसपा अध्यक्ष उपेन्द्र यादवले बिहीबार अपराह्न गठबन्धनको बैठक छाडेका थिए।
दशैंअघिदेखि नै एमाले अध्यक्ष ओलीसँग संवाद बढाएका यादवले बिहीबार अबेरसम्म एमाले नेताहरुसँग छलफल गरेका थिए भने शुक्रबार बिहानदेखि आन्तरिक छलफल गरिरहेका छन्। शुक्रबार अबेरसम्म बसेर भएपनि सहमति पत्रमा हस्ताक्षर हुने जसपा नेताहरुले बताएका छन्।
जसपा कार्यकारणी समिति सदस्य तथा विदेश विभाग प्रमुख अर्जुन थापाले जसपाले एमालेसँग तालेमल गर्ने विषयको नजिक पुगेको बताए। उनले भने, ‘केन्द्रीय स्तरमा एमालेसँग चलिरहेको संवाद सकारात्मक रुपमा अघि बढेको सूचना पाएको छु। आजै बेलुकासम्म एमाले र जसपाबीचमा सहमति हुने सम्भावना छ।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
1673069931.jpg)
