काठमाडौं– सत्तागठबन्धन भित्र सिट बाँडफाँटलाई लिएर रस्साकस्सी चलिरहँदा शनिबार नेपाली कांग्रेसको एउटा समूहका दोस्रो तहका नेताहरुले खबरदारी सभा गरे। उसो त आउँदो निर्वाचनमा गठबन्धन दलहरूबीच तालमेल गरेर अघि बढ्ने निष्कर्ष निकालेसँगै कांग्रेसभित्र शेखर कोइराला संशकित देखिए। उनले सार्वजनिक कार्यक्रमहरुमा त्यसपछि लगातार यस बारेमा प्रश्न उठाउँदै आए र कांग्रेसले सय सिट भन्दा तल झर्नु हुँदैन भन्ने अडान सार्वजनिक रुपमा राख्न थाले।
यो बीचमा शेखर कोइराला समूहका नेताहरुले कैयौंपटक आफ्नो समूहको बैठक गरेर पार्टी सभापति तथा प्रधानमन्त्री शेरबहादुर देउवालाई घच्घचयाइसकेका छन्। उनीहरुले पार्टीले लिने सिट र सभापतिले बाँड्ने टिकटकाबारेमा बारम्बार प्रश्न उठाउँदै आएका छन्। उनीहरुले त्यही कडी स्वरुप शनिबार खबरदारीसभा नै आयोजना गरे। शुक्रबार अनौपचारिक बैठक गरेका शेखर समूहका दोस्रो तहका नेताहरुले शनिबार खबरदारी सभा गरेर सिट बाँडफाँटबारे पार्टी नेतृत्वलाई चेतावनीमात्रै दिएनन् बरु न्यायोचित ढंगले टिकट वितरण नभए विद्रोह गर्ने खुल्ला चुनौती पनि पार्टी नेतृत्वलाई दिए।
यसरी देख्दा पार्टीभित्रको तीव्र दबाबमा सभापति तथा प्रधानमन्त्री देउवा देखिन्छन्। समानुपातिक सूची गत सोमबार निर्वाचन आयोगमा बुझाएपछि मंगलबारदेखि पुन: सुरु भएको गठबन्धन बैठक अझै अल्मिएको छ। शनिबार बोलाइएको बैठक त बस्नै सकेन। नेताहरुले बाहिर जे भने पनि सिट बाँडफाँटमा गठबन्धनलाई सकस परेको प्रष्ट देखिन्छ र कांग्रेस सभापति तथा प्रधानमन्त्री देउवामाथिको पार्टीको आन्तरिक दबाबपनि एउटा प्रमुख कारक हो। देउवाले पार्टीभित्र विद्रोहको अवस्था रहेको भन्दै प्रचण्ड र गठबन्धनका अन्य नेताहरुसँग आफ्नो मजबुरी बुझिदिन बारम्बार आग्रह गरिरहेका छन्।
प्रचण्डसहित गठबन्धनका अन्य नेताहरु माधवकुमार नेपाल र उपेन्द्र यादव कांग्रेसलाई सक्दो कम सिटमा कसरी झार्न सकिन्छ किन भन्ने ध्येयमा देखिन्छन्। त्यही भएर शुक्रबार मात्रै प्रचण्ड, नेपाल र यादवले छुट्टै बैठक नै गरे। कांग्रेस सभापति तथा प्रधानमन्त्री देउवा सिट बाँडफाँटको क्रममा सय सिटलाई बटमलाइन बनाउने तर ९० भन्दा तल नझर्नेमा अडिग छन्। तर, गठबन्धनका नेताहरु कांग्रेसलाई ७५ देखि ८० सिटमा खुम्चाउन चाहन्छन्।
यसरी गठबन्धनभित्रै पनि प्रचण्ड, नेपाल र यादवको तीव्र दबाब झेलिरहेका देउवा आफ्नै पार्टीभित्रको एउटा समूहको लगातारको विरोधका कारण गठबन्धनभित्र आफ्नो अडानभन्दा तल नझर्न बाध्य भएका छन्। शनिबार शेखर कोइराला पक्षले आयोजना गरेको खबरदारी सभामा युवा नेता भूपेन्द्रजंग शाहीले भने, ‘सिट बाँडफाँटको नाममा हाम्रो टिकट काटियो भने पनि हामी निर्वाचनमा उम्मेदवार बन्छौं।’
शाहीले भनेकोजस्तो अवस्था अन्यत्र पनि विद्यमान रहेको स्वयम् कांग्रेस नेताहरुले बताउने गरेका छन्। यही अवस्थाको दबाबले होला गत बुधबार गठबन्धनका नेताहरुसँग देउवाले सिट बाँडफाँटमा बढी सकस देखिएको भन्दै सहजै तालमेल हुने ठाउँमा मात्र तालमेल गरेर अन्यत्र आ–आफ्नो ढंगले निर्वाचनमा जाने गरि सहमति गर्न प्रस्ताव गरेको श्रोतले बतायो। बाहिर सार्वजनिक नभएपनि त्यसको अन्तर्य कांग्रेसभित्रको असन्तुष्टि सम्बोधन नै रहेको देखिन्छ।
शेखर कोइराला समूहको निष्कर्षमा सय सिटभन्दा कम कांग्रेसले पाएको अवस्थामा आफ्नो समूहका नेताहरुले टिकट पाउने सम्भावना झनै न्यून भएर जाने छ भने जति बढी सिट कांग्रेसले पाउँछ आफनो समूहका नेताहरु त्यति बढी मात्रामा टिकट पाउने सम्भावना हुन्छ।
शेखर कोइराला समूहका नेता गुरुराज घिमिरेले शनिबारको सभामा पनि त्यसको आभास आफ्नो सम्बोधनमा दिए। घिमिरेले सबै पार्टीहरुको टाउको मात्रै निर्वाचनमा मिलेर भाग लिए अन्य नेताहरुको र व्यवस्थाको के हुने भन्ने प्रश्न उठाए। उनले गठबन्धनको नाममा शीर्ष नेताहरुले अत्यन्तै जोखिमपूर्ण राजनीति गर्न खोजेको आरोप पनि लगाए।
शेखर कोइराला समूहका नेताहरुले हालै निर्वाचनमा आयोगमा पार्टीले बुझाएको समानुपातिक नामावलीलाई पनि उदाहरणको रुपमा पछिल्लो समयमा प्रस्तुत गरेका छन्। सभापति देउवापक्षले आफना समूहका नेताहरुको नामक्रम संख्याहरुमा अगाडि राखेर अन्य नेताहरुलाई तलको क्रम संख्यामा राखेका छन्।
समानुपातिकमा पाउने सिट संख्यामा माथिको क्रमबाट राख्ने निर्वाचन आयोगको व्यवस्था छ। जसबारे शेखर कोइराला समूह संशकित छ। शनिबार उनीहरुले त्यो पनि असोज १६ गतेभित्र सच्च्याउन माग गरेका छन्। शेखर कोइरालासहित यो पक्षका पदाधिकारीहरु उपस्थित नभएर दोस्रो तहका नेताहरु यस्ता बैठक र भेलाहरु गर्ने गरेका छन्। जानकारहरु चाहिं यस्ता भेला र बैठकहरुले पार्टी भित्रको दबाब झेलिरहका देउवालाई गठबन्धनमा बार्गेनिङ गर्न बल पनि पुगिरहेको बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
