काठमाडौं– प्रतिनिधि सभा र प्रदेश सभाको प्रत्यक्षतर्फको सिट बाँडफाँटमा सकस खेपिरहेको सत्ता गठबन्धन मंगलबारदेखि पुनः छलफलमा जुटेको छ। तर, विगतझैं गठबन्धनमा आबद्ध दलका नेताहरुको आ–आफनै अडानले मंगलबार बसेको दुई चरणको बैठक पुनः निष्कर्षविहीन भएको छ।
नेताहरु थप गृहकार्यसहित बुधवार छलफलमा बस्ने भएका छन्। यसअघि पनि गठबन्धनले घण्टौसम्म दैनिकजसो यस्ता बैठकहरु गर्ने गरेका थिए। साउनदेखि छलफल गर्न थालेका नेताहरु असोज लाग्दा समेत सहमतिमा पुग्न सकेका छैनन्। यद्यपि, चाँडै सहमतिमा पुग्ने उनीहरुको दाबी छ।
कांग्रेस प्रवक्ता प्रकाशशरण महतले गठबन्धन आवश्यक रहेकाले अबको केही दिनभित्रै गठबन्धनमा सिट बाँडफाँटका विषयमा सहमति जुट्ने बताए। कांग्रेसले १ सय ६५ सिटमध्ये सय सिटमा दाबी गरिरहेको छ भने माओवादीले ६० सिट, एकीकृत समाजवादीले ४० र जसपा नेपालले ३२ सिटमा दाबी गरेका छन्।
कांग्रेसले सहमतिका लागि लचक हुन सक्ने भन्दै ८५ सिटसम्म झर्न सक्ने संकेत गरेको छ। माओवादीले ४५ सिटसम्म मान्न सक्ने संकेत गरेपनि एकीकृत समाजवादी र जसपाले ३० सिटभन्दा तल झर्न नसक्ने अडान लिएका छन्। राष्टिय जनमोर्चाले सुरुदेखि नै २ सिटमा मात्र दाबी गरेकाले जनमोर्चालाई लिएर गठकबन्धनमा खासै समस्या देखिएको छैन।
कांग्रेसले एकीकृत समाजवादीलाई बढीमा १५ सिटसम्म दिन सक्ने र जसपालाई १२ सिटसम्म दिन सक्ने बताएको छ। त्यसमा पनि मधेश प्रदेशमा कांग्रेस र जसपा दुवैले ५०/० प्रतिशत दाबी गरेपछि सिट बाँडफाँडटथप पेचिलो बन्न पुगेको छ।
मधेश प्रदेशमा आफ्नो आधार क्षेत्र भएकाले जसपाले प्रतिनिधि सभा र प्रदेशसभा दुवैमा ५० प्रशित पाउनेपर्ने अडानमा छ। कांग्रेसले पनि मधेशमा आफनो पार्टीको अवस्था राम्रो भएकाले त्यहाँ ५० प्रतिशत भन्दा तल झर्न नसक्ने बताएको छ। कांग्रेसको मधेश प्रदेश समितिको बैठकले उक्त प्रदेशमा प्रतिनिधि सभा र प्रदेश सभा दुवैमा ६० प्रतिशत सिट नछाड्न केन्द्रीय नेतृत्वलाई आग्रह गरेको छ।
जसपा नेपालको तर्फबाट गठबन्धन कार्यदल सदस्य रहेका नेता रामसहाय यादवले सिट बाँडफाँटको बारेमा गठबन्धनको शीर्ष तहमा छलफल चलिरहेको बताए। उनले यस विषयमा चाँडै नै निष्कर्षमा पुगिने दावी गरे। ‘अहिले नै यो वा त्यो, यति वा त्यति म भन्दिनँ’, यादवले भने, ‘तर, चाँडै नै सम्मानजनक ढंगले सिट बाँडफाँट हुन्छ भन्नेमा म विश्वस्त छु।’
तर, जनमोर्चा उपाध्यक्ष दुर्गा पौडेलले भने सिट बाँडफाँटमा अझै केही दिन लाग्न सक्ने बताइन्। सिट बाँडफाँटको काम आफैंमा अप्ठ्यारो काम भएको भन्दै पौडेलले कार्यदल र शीर्ष नेताहरुको तहमा छलफल चलिरहेको बताइन्।
निर्वाचन आयोगको कार्यतालिका अनुसार असोज २३ गते उम्मेदवार मनोनयन गराउनु पर्ने हुन्छ। २३ असोजको अन्तिम समयसीमामा रहेका गठबन्धनका नेताहरु कहिलेसम्म सिट बाँडफाँटके अन्तिम टुंगो लगाउन सकिरहेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
