धनगढी– नेकपा मसालका महामन्त्री मोहनविक्रम सिंहले लामो संघर्षपछि प्राप्त गणतन्त्र, धर्म निरपेक्षतालाई जोगाउन पाँच दल मिल्नुको विकल्प नभएको बताएका छन्।
राष्ट्रिय जनमोर्चा सुदूरपश्चिम प्रदेश कमिटीले बिहीबार धनगढीमा आयोजना गरेको पत्रकार सम्मेलनमा उनले एमालेबाट ती सबै उपलब्धिहरु रक्षा हुन नसक्ने र अहिले पनि प्रतिगमनको खतरा रहेको भन्दै त्यसलाई परास्त गर्न पाँच दलीय गठबन्धन कायम हुनुपर्ने बताए।
नेकपा (एमाले)का अध्यक्ष ओली राजावादीसँग मिलेर देशलाई हिन्दू राष्ट्र कायम गर्न तल्लीन रहेका सिंहको आरोप छ। त्यसका लागि ओलीले भारतसँग समेत गहिरो साँठगाँठ गरेको उनले बताए। ‘सामन्त गोयलसँग गोप्य भेटघाट गरेर ओलीले हिन्दूको मुद्दामा सहमति गरेका थिए,’ सिंहले भने, ‘त्यसको उदाहरण पशुपतिमा ओलीले दिएको जोलहरी र चितवनमा राममन्दिर निर्माण हुन्।’
नेकपाभित्रको द्वन्द्व मिलाउन नसकेर संसद विघटन गर्नु ओलीको अर्को प्रतिगमन भएको उनको जिकिर छ। अल्पमतमा परेपछि राजीनामा दिएर जनस्तरमा आफ्नो प्रभाव बढाउन छोडेर ओलीले कुर्सीमा रहिरहनका लागि दुई/दुई पटक संसद विघटन गरेर असंवैधानिक कदम चालेको उनले बताए। ओलीको कदमका कारण पाँच दलीय गठबन्धन बनेको र गठबन्धनलाई लक्ष्यसम्म पुर्याउनुको विकल्प नरहेको बताए।
गठबन्धन सरकारले केही निर्णय गलत गरेको उनको भनाइ छ। ‘एमसीसी, नागरिकता विधेयक जस्ता केही गलत निर्णय यो सरकारले गरेको छ,’ सिंहले भने, ‘त्यसमा हामीले सहमति गरेका छैनौं, त्यसको विरोधमा हामी जनतासामु गएका छौं।’
गठबन्धनमा सिट बाँडफाँडको मुद्दा पेचिलो बनेको नभई बनाइएको भन्दै उनले असतुष्टी व्यक्त गरे।
‘पाँच दलले यसअघि जीतेका स्थानलाई यथावत राखेर एमालेले जितेका स्थानमा भागबण्डा गर्ने हाम्रो सहमति हो,’ सिंहले भने, ‘तर अहिले ठूला दल त्यस विपरीत बढी सिटमा दाबी गरिरहेका छन्, यसले केही समस्या निम्त्याउन सक्दछ।’ राष्ट्रिय जनमोर्चाले प्युठान र बागलुङमा दाबी छाडेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
