फाइल तस्बिर।
काठमाडौं- नेकपा माओवादी केन्द्रका अध्यक्ष पुष्पकमल दाहाल प्रचण्डले उम्मेदवार मनोनयनपछि संसद् नरहने प्रष्ट पारेका छन्। मंगलबार धनगढीमा आयोजित पत्रकार सम्मेलनमा उनले सरकारले ल्याएको संशोधन प्रस्ताव फिर्ता हुने बताए।
‘अहिले संशोधन गइरहेको छ। आयु लम्ब्याउनतिर जान हुँदैन। हामीले अस्ति गठबन्धनमा बसेर एकदिन पनि यताउता गर्न हुँदैन भनेका छौं। मंसिर ४ गते चुनाव हुन्छ। मनोनयनपछि संसद् रहँदैन। एकदम स्पष्ट, त्यहाँ द्विविधा हुँदैन’, प्रचण्डको भनाइ थियो।
प्रचण्डले केही प्राविधिक कारणले समय लम्ब्याउने कि भन्ने प्रमुख सचेतकहरुले सोचेको तर पछि गठबन्धन बसेर यसरी सोच्नुहुँदैन, कहीँ ‘इफ-बट’ हुन दिनुहुँदैन भन्ने सहमति गरिएको बताए।
‘४ गते निर्वाचन हुन्छ। त्यसभन्दा अगाडि कन्फ्युजन पैदा गर्ने अरु केही काम गर्नुहुँदैन भनिएको हुनाले त्यो सायद आजै केही समय थप्ने कि भन्ने कुरा फिर्ता हुन्छ’, उनले भने।
निर्वाचनपछि पनि प्रतिनिधि सभा र प्रदेश सभाको कार्यकाल यथावत् रहने गरी गत शुक्रबार ऐन संशोधनका लागि विधेयक दर्ता गरिएको थियो। ‘केही नेपाल ऐन संशोधन गर्ने विधेयक’मा राखिएको प्रस्ताव अनुसार सरकारले अहिले चालु रहेको संसद्को कार्यकाल पहिलो बैठक बसेको मितिलाई आधार मानेर पाँच वर्ष कायम हुने प्रस्ताव गरेको थियो।
त्यस्तै, प्रतिनिधि सभाको नयाँ निर्वाचन भई त्यस्तो सभाको पहिलो बैठक बसेको दिनबाट अघिल्लो प्रतिनिधि सभाको कार्यकाल स्वतः समाप्त भएको मानिने पनि विधेयकमा भनिएको छ। प्रदेश सभाको हकमा पनि सोही व्यवस्था गरिएको छ।
यो प्रस्तावको सत्तारुढ दल र प्रतिपक्षी दलहरुले समेत विरोध गरेका थिए। प्रस्तावको विरोध गर्दै राप्रपाका सांसद् राजेन्द्र लिङ्देनले प्रतिनिधि सभाबाटै राजीनामा घोषणा गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
