सुर्खेत– नेकपा माओवादी केन्द्रका अध्यक्ष पुष्पकमल दाहाल प्रचण्डले सत्ता गठबन्धनको सिट बाँडफाँटको संख्या टुंग्याउन खास समस्या नरहेको बताएका छन्। अहिले संख्या मात्रै भन्दा पनि कुन क्षेत्र र कुन प्रदेश कसले पाउने भन्ने सम्मको टुंगो लगाउन आफूहरु सक्रिय रहेको प्रचण्डको भनाइ छ।
सुर्खेत पुगेका प्रचण्डले पत्रकारसँग भने, ‘संख्या मात्रै टुंग्याउने भन्दा पनि कुन-कुन क्षेत्र र प्रदेश कसले पाउने भन्ने समे टुंग्याउन समय लागेको हो।’
उनले कसैको कुनैमा असहमति भन्दा पनि अझ प्रभावकारी कसरी बनाउने भन्नेतर्फ केन्द्रित भएको बताए। बिहीबार दिनभर बसेर केही टुंग्याएको उल्लेख गर्दै प्रचण्डले शुक्रबार फेरि बसेर बाँकी टुंग्याउने बताए।
प्रदेशमा अर्को पार्टीलाई दिएर भए पनि समायोजन गरिने उनको भनाइ छ। उनले थपे, ‘एक्लै जित्ने ठाउँमा पनि अन्य पार्टीलाई पनि समायोजन गरेर जानेमा जोड छ। संघ वा प्रदेशमा समायोजन गरेर मात्रै परिणामा राम्रो ल्याउन सकिन्छ भन्ने लागेको छ।’
समाजवादीसँग एकताको तयारी
माओवादी अध्यक्ष प्रचण्डले एकीकृत समाजवादीसँग एकताको तयारी गरिरहेको बताए। यही निर्वाचनमा एउटै घोषणा पत्रमा लड्नेबारे छलफल भइरहेको उनको भनाइ छ। तर चुनाव चिह्न भने फरक हुने उनले बताए।
उनले भने, ‘घोषणापत्र एउटै हुन्छ, तर चुनाव चिह्न फरक हुन्छ।’ एकताका लागि दुवै पार्टीका तर्फबाट संयोजन समिति बनाइने उनको भनाइ छ।
प्रचण्डले नेकपा एमालेसँग भने कुनै पनि प्रकारको सहकार्य नहुने बताए। संसद विघटन र अन्य कामका आत्मसमीक्षा नभइ छलफल नै नहुने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770979298.jpg)
-1764146706.png)
-1770562345.jpg)
