काठमाडौं– महाभियोग प्रस्तावको सामना गरिरहेका निलम्बित प्रधानन्यायाधीश चोलेन्द्र शमशेर राणाले संसदीय समितिका ४३ वटा प्रश्नहरुको उत्तर दिनुपर्ने भएको छ। बुधबार बयानका लागि उपस्थित भएका राणालाई सोध्न संसद्को महाभियोग सिफारिस समितिले ४३ वटा प्रश्नको सूची तयार पारेको छ।
बुधबार दिउँसो १ बजेदेखि राणाको बयान सुरु भएको थियो। बयानको सुरुमा राणाले आफ्नो लिखित धारणा पढेर सुनाएका थिए। त्यसपछि समितिका सदस्य (सांसद)हरुले प्रश्न सोध्ने क्रम सुरु भएको हो।
‘समितिका तर्फबाट सोध्न भनेर ४३ वटा प्रश्नको सूची तयार गरिएको छ,’ नेपाल लाभइसँग कुरा गर्दै समितिका एक सदस्य (सांसद)ले भने। ५ वटा प्रश्न सोधेपछि राणाले जवाफ दिन सुरु गरेका छन्। सुरुमा सोधिएका प्रश्नको जवाफ आएपछि सांसदहरुले थप प्रश्न सोध्नेछन्।
चोलेन्द्रलाई सोध्न भनेर तयार गरिएका प्रश्न बुधबार नसकिए भोलि (बुधबार) पनि बयान चल्ने छ।
सुरुमा लिखित धारणा राख्दै निलम्बित प्रधानन्यायाधीश राणाले आफूविरुद्ध गत फागुन १ गते संसद् सचिवालयमा दर्ता भएको महाभियोग प्रस्ताव निष्क्रिय भइसकेको दाबी गरेका थिए। महाभियोग प्रस्तावको औचित्य समाप्त भइसकेपनि आफू संसद्को सम्मान गर्न बयानका लागि उपस्थित भएको बताएका थिए।
बजेट अधिवेशन अगाडि संघीय संसद्को अधिवेशन समाप्त हुँदा नै आफू विरुद्धको महाभियोगको औचित्य समाप्त भइसकेको राणाले जिकिर गरे। आफूपछिको रोलक्रममा रहेका दीपककुमार कार्कीलाई प्रधानन्यायाधीश बनाउनका लागि महाभियोग ल्याइएको र अहिले पनि त्यही उद्देश्यले कायम राखिएको राणाले दाबी गरे।
अहिले संसद्बाट आफूमाथि अन्याय भएको बताउँदै राणाले आफू न्याय माग्नका लागि समितिमा उपस्थित भएको समेत दाबी गरे।
संसद्ले संविधान र संसदको नियमावली विपरीत काम गरेर आफूविरुद्ध महाभियोग कायम राखेको चोलेन्द्रले आरोप समेत लगाए। ‘संविधान र नियमावली संसदले पालना गरेन। यो प्रस्ताव निष्क्रिय भइसकेको छ। म नागरिकको हिसाबले संसद्को सम्मानका लागि आएको हुँ,’ लिखित बयान पढ्दै राणाले भने।
आफूलाई सर्वोच्चमै हुँदा कार्कीलाई प्रधानन्यायाधीश बनाउन प्रस्ताव आएको, तर आफूले अस्वीकार गरेको उनको भनाइ छ। उनले आफू विधि र प्रक्रिया पूरा गरेर आएकाले सोही विधिअनुसार बाहिर जान तयार रहेको कुरा भन्दै आएको बताए। तत्कालीन समयमा सहकर्मी न्यायाधीशहरुले प्रश्न उठाएर राजीनामा दिन सुझाव दिँदा पनि राणाले यही विषयलाई दोहोर्याएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1749826086.png)
