काठमाडौं– नेपाली कांग्रेसनिकट नेपाल विद्यार्थी संगठन (नेविसंघ)का नेता–कार्यकर्ताले सामाजिक सञ्जालमा ‘जग जोगाउँ, पार्टी बचाउँ’ अभियान ह्यासट्यागसहित यो नारा पोष्ट गर्न थालिएको छ।
नेविसंघबाटै राजनीतिक यात्रा थालेर अहिले पार्टी र देशको नेतृत्व गरिरहेका पार्टी सभापति शेरबहादुर देउवाले नेविसंघलाई पूर्णता दिने विषमा रुची नदेखाएपछि उनीहरुले यस्तो दबाब अभियान थालेका हुन्।
२०७५ माघ २ मा नेविसंघका तत्कालीन सभापति नैनसिंह महरले राजिनामा गरेपछि नेतृत्वविहीन थियो। गत चैतमा देउवाले अध्यक्षमा आफूनिकट विद्यार्थी नेता दुजाङ शेर्पालाई नियुक्त गरे। तर बाँकी पदाधिकारी चयनमा भने कांग्रेस केन्द्रीय समितिको उदासिनता देखिन्छ।
केही समयअघि बसेको कांग्रेस केन्द्रीय समितिले साउन महिनाभित्र पूर्णता दिने बताएपनि भदौको मध्यसम्म कुनै सारसंकेत नदेखिएको विद्यार्थी नेता एलिजा ढकाल बताउँछिन्। उनले ब्यंग्य गर्दै भनिन्, ‘नेविसंघ बिनाको कांग्रेस कस्तो? जग नभएको घर जस्तो’ ‘विद्यार्थी नेविसंघको खोजीमा, नेविसंघ नेताहरुको गोजीमा’ भनेजस्तै भयो ।’
कांग्रेसको भातृ संगठन नेविसंघको २०७३ मा भएको ११औं महाधिवेशनबाट नैनसिंह महर सभापति निर्वाचित भएयता नेविसंघको महाधिवेशन हुन सकेको छैन। महरले दुई वर्षे कार्यकाल पूरा गरेर राजिनामा दिँदै १४ औं महाधिवेशनबाट कांग्रेसको केन्द्रीय सदस्य निर्वाचित भइसकेका छन्।
त्यसयता निर्वाचनका लागि तदर्थ समिति गठन भए पनि महाधिवेशन हुन सकेको छैन। लामो समयदेखि महाधिवेशन कुरेका विद्यार्थी नेताहरु अहिले अधैर्य हुन थालेका छन्। केन्द्रीय कार्य समितिको बैठक हुँदा पार्टी कार्यलय अगाडि र अहिले सामाजिक सञ्जालमार्फत् दबाब बढाएका हुन्।
मंसिर ४ को निर्वाचनका लागि कांग्रेसका केन्द्रीय नेता जदिल्लामा खटिएका छन्। विद्यार्थी नेताहरुले जिल्लामै प्लेकार्डसहित ’भातृ संघहरुले कहिले पूर्णता पाउँछन्?’ भन्दै प्रश्न सोध्न आग्रह गरेका छन्।
नेविसंघबाटै राजनीतिमा उदाएका महामन्त्रीद्वय गगन थापा र विश्वप्रकाश शर्माबाट विद्यार्थी नेताहरुलाई अपेक्षा थियो। तर, जड बनेर बसेको पार्टी नेतृत्वको कार्यशैलीविरुद्ध खरो उत्रन नसकेको उनीहरुलाई लाग्न थालेको छ। त्यसैले सामाजिक सञ्जालमार्फत् महामन्त्रीद्वयलाई लयवद्ध प्रश्न गरिएको छ, ‘गगन–विश्व कोसँग हो तर्सेको? पार्टीमा पुगेपछि नेविसंघलाई बिर्सेको?’
भातृ संगठनलाई पूर्णता नदिएर चुनावमा होमिने हो भने गठबन्धनका कारण मात्रै कांग्रेस चुनाव जित्न नसक्ने विद्यार्थी नेता ढकाल बताउँछिन्। पार्टीको जनमतको ठूलो आधार नै भातृ संगठन भएकाले निर्वाचन पहिले नै पूर्णता पाउनुपर्ने उनी बताउँछिन्। ‘प्रजातान्त्रिक आन्दोलनमा सक्रिय भूमिका निर्वाह गरेका नेविसंघ, तरुण दल, महिला संघ एकजना व्यक्तिमा सिमित भएकाले पार्टीलाई खबरदारी गर्नका लागि जनतामाझ गएका कांग्रेस प्रतिनिधिहरुलाई भातृ संगठनको पूर्णताका लागि देशैभर दबाब सिर्जना गर्दैछौं,’ उनले भने।
त्रिभुव विश्व विद्यालयअन्तर्गत रहेर राजनीति गरिरहेका गणेशराज भण्डारी पनि निर्वाचनअघि नै नेविसंघले पूर्णता पाउनुपर्ने बताउँछन। भण्डारी भन्छन्, ‘नेविसंघले पूर्णता नपाउनुमा नेतृत्वकै दोष हो। नेताहरु खारिएर आउन पाउनुपर्छ । भातृ संघको आशिर्वाद सभापतिले मिल्दैन। प्रतिस्पर्धा गर्ने वातावरण बन्नुपर्छ।
अहिले आफूहरु सामाजिक सञ्जालमार्फत् मात्रै पहिलो चरणमा दबाब सिर्जना गरेको बताउँदै नेतृत्वले सुनुवाई नगरे चरणबद्ध आन्दोलनको तयारी भइरहेको उनी बताउँछन्।
नेविसंघ त्रिचन्द्रका नेता दिनेश शाही लोकतान्त्रिक पार्टीले आफैंले गरेको निर्णय बिर्सनु लज्जासपद रहेको बताए। शाहीले भातृ संगठनलाई पूर्णता दिन आफूहरुले बेलाबेलामा पार्टीको ध्यानाकर्षण गरेको स्मरण गरे। एउटा लोकतान्त्रिक पार्टीले गरेको निर्णय कार्यान्वयन नगर्दा नैतिक प्रश्न उठ्ने बताए। उनले भने, ‘सबैभन्दा ठूलो कुरा पार्टीले नै निर्णय नै कार्यान्वयन भएन। त्यसैले दबाब दिन अभियान चलाएका हौं।’
शाहीले ७७ वटै जिल्लामा नेविसंघमा आवद्ध ३२ वर्ष मुनिकाले केन्द्रीय प्रतिनिधिहरुलाई ’नेविसंघ खोई?’ भनेर प्रश्न सोध्ने कार्यक्रम जारी रहेको बताए। उनले पार्टीका केन्द्रीय प्रतिनिधिहरुले नेविसंघका विषयमा गम्भीर भएर पार्टी केन्द्रीय कार्यसमितिमा समीक्षा गर्ने विश्वास व्यक्त गर्दै भदौ महिनाभित्र पूर्णता दिनुपर्नेमा जोड दिए।
पार्टी केन्द्रका अधिकांश नेताको धरातल नेविसंघ
नेविसंघबाट नै राजनीतिमा उदाएका शेरबहादुर देउवा अहिले पार्टी सभापति छन्। तर उनले नै हिँड्दै जाँदा पाइला मेट्दै गरेको बताउँदै धरातल र विगत सम्झाउनुपर्ने अवस्था आएको विद्यार्थी नेताहरुको भनाइ छ। पार्टीको १४ औं महाधिवेशनबाट निर्वाचित केन्द्रीय कमिटी हेर्ने हो भने नेविसंघ धरातल भएका नेताहरु नै छन्।
२०२८ सालमा देउवा नेविसंघको सर्वसम्मत सभापति भए। विद्यार्थी राजनीतिबाट आफ्नो राजनीति जीवन सुरु गरेका प्रधानमन्त्री देउवाको दोस्रो कार्यकाल हो।
त्यसैगरी कांग्रेसका प्रभावशाली नेता विमलेन्द्र निधि तेस्रो महाधिवेशन २०३६ सालमा सभापति भए। उपसभापति भइसकेका निधि १४औं महाधिवेशनमा सभापतिका आंकाक्षी थिए।
२०३९ सालमा नेविसंघको तदर्थ समितिको सभापति बनेका सूचना तथा सञ्चारमन्त्री ज्ञानेन्द्रबहादुर कार्की कांग्रेसका प्रभावशाली नेताहरु मध्येमा पर्छन्। २०४० सालमा सभापति भएका बलबहादुर केसी केसी पार्टीको केन्द्रीय कार्यसमिति सदस्य छन्।
२०४४ सालमा नेविसंघको पाँचौ महाधिवेशनबाट सभापति बनेका बालकृष्ण खाण देउवाको विश्वास पात्रका साथै प्रभावशाली नेता हुन्। उनी हाल गृहमन्त्री छन्। २०४८ सालमा सभापति बनेकका एनपी साउद पनि पार्टी केन्द्रमै छन्। २०५३ सालमा नेविसंघको तदर्थ समितिको सभापति भएका धनराज गुरुङ पार्टीको उसपभापति छन्।
२०५३ सालमा सभापतिमा सर्वसम्मत निर्वाचित गोविन्द भट्टराई केन्द्रीय सदस्य छन् । आठौं महाधिवेशन २०५७ सालमा सभापति निर्वाचित विश्वप्रकाश शर्मा महामन्त्री छन् भने नेविसंघकबाटै चर्चित बनेका गगन थापा पनि महामन्त्री छन्। नेविसंघको महामन्त्रीसम्म बनेका बद्री पाण्डे उपमहामन्त्री छन्। २०७३ सालमा निर्वाचित नैनसिंह महर नेविसंघ सभापतिमा निर्वाचित नैनसिंह महर केन्द्रीय सदस्य छन्।
आफूहरुले पार्टीका भातृ संघ संगठनहरुको पूर्णता र बलियो बनाउनेबाहेक कुनै उद्देश्य नराखेको भन्दै उनीहरुले ‘न्यायपूर्ण होस् चाहिँदैन भाग, भातृ संघहरुको पूर्णता हाम्रो माग’ नारा समेत सारेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
