पोखरा– २०७० सालमा पोखरा महानगरका विभिन्न क्षेत्रमा पहिलो पटक सोलार बत्ती जडान गरियो। सुरुमा महानगरको न्यूरोड र दोस्रो चरणमा लेकसाइडका क्षेत्रमा बत्ती जडान गरेको थियो। महानगरले एक पटक आफैँले र एकपटक चीन सरकारको सहयोगमा सडक बत्ती राखेको थियो।
पोखराको न्यूरोड र लेकसाईटका केही क्षेत्रमा जडान भएकोमा २०७३ सालमा विजयपुरदेखि हल्लनचोक, बुद्धचोकदेखि वन क्याम्पस, पृथ्वीचोकदेखि शहीदचोक, अमरसिंह चोकदेखि महेन्द्रपुललगायतका स्थानमा चीनको सहयोगमा सडक बत्ती जडान भएको थियो। सडकबत्ती जडानका लागि चीन सरकारले १५ करोड रुपैयाँ लगानी गरेको थियो ।
महानगरको तथ्यांकअनुसार हालसम्म महानगर क्षेत्रमा २ हजार सडक बत्ती जडान भएका छन्। तर नियमित मर्मतसम्भार नहुँदा अधिकांश सडक बत्ती बल्न छाडेका छन्। महानगर भने बिग्रिएका बत्तीहरुको तथ्यांक संकलन भइरहेको बताउँछ ।
सडक बत्ती मर्मतसम्भार गर्न पनि महंगो पर्ने भएकाले अधिकांश बिग्रिसकेको महानगरपालिका मेयर धनराज आचार्य बताउँछन्। बिग्रिएका सडक बत्ती मर्मत गर्न ५० लाखभन्दा बढी खर्च लाग्ने महानगरको अनुमान छ। महानगरले हालसम्म सडक बत्ती जडानमा ३० करोडभन्दा बढी खर्च गरेको मेयर आचार्यको भनाइ छ।
महानगरले मर्मत सम्भारमै धेरै रकम खर्च हुने भन्दै नेपाल विद्युत प्राधिकरणसँगको सहकार्यमा ‘स्मार्ट लाइट’ योजना अघि सारेको छ । महानगरले प्राधिकरणसँगको ५०/५० लगानीमा तिहार अघिसम्म १ हजार ५०४ वटा सडक बत्ती जडान गर्ने गरी स्मार्ट सडक बत्ती जडान कार्यको शुभारम्भ गरेको छ। महानगरका मेयर आचार्य र प्राधिकरण पोखराका प्रमुख प्रमोद रिजालले शुक्रबार जिरो किमी चोकमा शिलान्यास गरेका हुन् ।
‘उज्यालो पोखरा’ नाम दिइएको उक्त अभियान अन्तर्गत उच्च प्रविधियुक्त १६ मिटर अग्लो हाई–मास्ट लाइट २३ वटासमेत जडान गरिने मेयर आयार्चले जानकारी दिए । स्मार्ट लाइट जडानका लागि टप्सन इनर्जीलाई १२ करोड ७५ लाखमा ठेक्का दिएइको छ। सडकमा फिलिप्स ब्रान्डको बत्ती प्रयोग गर्ने सम्झौता भएको महानगरले जनाएको छ ।
पोखरामा जडान गर्न लागिएको ‘स्मार्ट लाइट’ सुरुमा ललितपुर महानगरबाट सुरु गरिएको विद्युत प्राधिकरण पोखराका प्रबन्धक प्रमोद रिजालले बताए। ‘सडक उज्यालो बनाउन सुरुमा सोलार बत्ती जोडिएको थियो। तर, त्यसले लक्ष्यअनुसार काम गर्न सकेन। चाँडै बिग्रिने र मर्मतमा पनि उस्तै खर्च गर्नुपर्ने देखियो,’ रिजालले भने, ‘सडक उज्यालो पार्ने दीगो उपाय खोज्दै जाने क्रममा यो विधि फेला पारेका हौं ।
महानगरका मुख्य सडक तथा चोकमा १ सय २० वटा र बाँकीमा ९० वाटको बत्ती प्रयोग गरिनेछ । अधिकांश पहिलेकै पोल प्रयोग गरिने भएकाले जम्मा ४ सय २४ वटामात्रै नयाँ पोल थपिने प्राधिकरण प्रमुख रिजालले बताए । ‘मापदण्डअनुसार प्रत्येक ३० मिटरमा बत्ती राख्नुपछ । तर, पोखरामा ५०, ६० मिटरको दूरीमा पोल भएकाले त्यसको बीचमा मात्रै थपिनेछ,’ उनले भने।
महानगरमा सडकमा स्मार्ट सडकबत्ती र व्यस्त चोकमा हाइमास्ट लाइट जडान गरिने गरी गत कात्तिकमा पोखरा महानगरपालिका र नेपाल विद्युत प्राधिकरण बीच सहमति भइ काम अघि बढेको थियो । पोखरा महानगरपालिकाले नगरको ८० किलोमिटर क्षेत्रभित्र स्मार्ट बत्ती जडान गर्ने र महानगरभित्रका व्यस्त ३० चोकमा हाइमास्ट लाइट जडान गर्ने कार्य अगाडी बढेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
