सुर्खेत– नेकपा माओवादी केन्द्रले कर्णाली प्रदेश सरकारमा सहभागी दुई मन्त्रीलाई फिर्ता बोलाएको छ। सरकारमा सहभागी हुन बाँकी रहेका दुई जनालाई सहभागी गराउनका लागि माओवादीले हालका ऊर्जा तथा जलस्रोतमन्त्री गणेशप्रसाद सिंह र आर्थिक मामिला तथा योजना मन्त्री बिन्दमान विष्टलाई फिर्ता बोलाएको हो।
पूर्वमन्त्री एवम् माओवादी कर्णाली प्रदेश अध्यक्ष बिमला केसीले पार्टी केन्द्रको निर्देशन अनुसार सरकारमा रहेका दुई जना मन्त्रीहरुलाई फिर्ता बोलाएर सरकारमा सहभागी हुन बाँकी रहेका दुई जना सांसदलाई मन्त्री बनाइनेछ।
माओवादीले रुकुम पश्चिमबाट निर्वाचित सांसद रातो कामी र जाजरकोटकी कृष्णा शाह आचार्यलाई मन्त्रिपरिषद्मा पठाउने तयारी थालेको छ। केसीले पार्टी केन्द्रको निर्देशन अनुसार सिंह र विष्टलाई फिर्ता बोलाएर कामी र शाहलाई मन्त्रिपरिषद्मा पठाउन लागिएको बताइन्।
‘संसदीय दलको बैठकले निर्णय गरेर सरकारमा सहभागी हुनेहरुको नाम मुख्यमन्त्रीलाई सिफारिस गरिसकेका छौं,’ केसीले भनिन्, ‘एक–दुई दिनभित्रै सरकारमा सहभागी मन्त्रीले राजीनामा दिएपछि कामी र शाह सरकारमा सहभागी हुनुहुन्छ।’
कर्णाली प्रदेश सभामा माओवादी केन्द्रका ११ जना सांसद छन्। ति मध्ये नौ जना सांसद यसअघि सरकारमा सहभागी भइसकेका छन्। बाँकी दुई जनालाई पनि सरकारमा सहभागी गराउनका लागि माओवादी केन्द्रले सात महिनाअघि नियुक्त गरिएका सिंह र विष्टलाई सरकारबाट फिर्ता बोलाएको हो।
२०७४ सालमा भएको निर्वाचनमा कर्णाली प्रदेश सभामा माओवादी केन्द्रका १३ सांसद थिए। ती मध्ये सुर्खेतका ठम्मर विष्ट र दैलेखका धर्मराज रेग्मी नेकपा एमालेमा प्रवेश गरेका छन्। उनीहरुले पार्टी परित्याग गरेसँगै माओवादीले सांसद्बाट निलम्बन गरेको थियो। पहिलो कर्णाली सरकारको नेतृत्व पनि माओवादी केन्द्रले गरेको थियो।
माओवादीले सांसद मात्रै होइन गैरसांसद कार्चेन लामालाई पनि मन्त्री बनाइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
