काठमाडौं– लामो समयपछि बालुवाटार छिरेका प्रमुख प्रतिपक्षी दल नेकपा एमालेका अध्यक्ष केपी शर्मा ओली र प्रधानमन्त्री शेरबहादुर देउवाकाबीचमा छलफल भएको छ।
छलफलमा एमालेले मुख्य रुपमा चार विषय उठाएको एमालेका उपाध्यक्ष विष्णु पौडेलले बताए। प्रधानमन्त्री देउवालाई भेट्न ओली उपाध्यक्षद्वय सुवास नेम्वाङ र विष्णु पौडेल पुगेका थिए।
प्रधानमन्त्री कार्यालयमा देउवा र सरकारका प्रवक्ता ज्ञानेन्द्रबहादुर कार्की रहेका थिए। भेटमा ओलीले संक्रमणकालीन न्याय सम्बन्धी ऐन, नागरिकता विधेयक, आगामी निर्वाचनमा धाँधली हुनसक्ने र महंगीको विषय उठाएका थिए।
‘बालुवाटारको भेटमा मुख्य रुपमा हामीले चार विषयमा सरकारको ध्यानाकर्षण गराएका छौं,’ पौडेलले भने, ‘यो मुलुकमा संसद्को सबैभन्दा ठूलो दल नेकपा एमाले पनि छ भन्ने हेक्का राखेर आफ्ना कार्य सञ्चालन गरोस्।’
'स्वेच्छाचारी गठबन्धन'
सत्तारुढ गठबन्धन स्वेच्छाचारी भएकाले देशमा धेरै समस्या आएको कुरा एमाले अध्यक्ष ओलीले राखेको उनले बताए। त्यस्तै मंसिर ४ मा हुन गइरहेको प्रतिनिधि सभा र प्रदेश सभाको निर्वाचनमा धाँधली हुने र सरकारले राज्यशक्तिको दुरुपयोग गर्ने आशंका आफूहरुलाई रहेको कुरा पनि अध्यक्षले प्रधानमन्त्रीसमक्ष राखेको पौडेलले बताए।
‘आगामी मंसिर ४ गते हुने निर्वाचन स्वच्छ, धाँधलीरहित, स्वच्छ प्रतिस्पर्धामा आधारित र राज्य शक्तिको दुरुपयोग हुनुभएन,’ अध्यक्ष ओलीको भनाइ उद्धृत गर्दै पौडेलले भने, ‘सत्ता गठबन्धनभित्रैबाट दम्भ देखाउने कार्य भइरहेको छ। यो राम्रो संकेत हैन।’
त्यस्तै ओलीले जोड दिएर संक्रणकालीन न्यायसम्बन्धी विधेयकमा चासो राखे। उनले शान्ति प्रक्रिया टुंगोमा पुर्याउने भन्दै सरकारले ल्याएको बेपत्ता पारिएका व्यक्तिहरुको छानबिन तथा सत्य निरुपण विधेयक एकलौटी रुपमा अघि बढाएकोमा एमालेको आपत्ति रहेको बताए।
उनले यति सम्वेदनशील विषयमा एक्लै अघि बढेर कतै नपुगिने भन्दै संसद्मा बहुमत रहेको एमालेसँग छलफल नै नगरी अघि बढेकाले आशंका उत्पन्न भएको बताएका छन्।
ओलीले संक्रमणकालीन न्यायसम्बन्धी ऐनमा पीडितले न्याय पाउनुपर्ने व्यवस्था हुनुपर्ने माग राखे। पीडितहरु अहिले पनि विधेयकले अन्याय गर्ने भन्दै सडकमा रहेकाले त्यसमा ख्याल गर्न ओलीको आग्रह थियो।
ओलीले उठाएको तेस्रो विषय नागरिकता विधेयकको थियो। नागरिकता विधेयकका बारेमा राष्ट्रपतिलाईसमेत अर्मयादित व्यवहार भएकोले उनले प्रधानमन्त्रीको ध्यानाकर्षण गराए।
‘यो सत्तारुढ गठबन्धनले राष्ट्रहीत विपरीत निर्णय लिएको छ,’ उनले भने, ‘विधेयकमा सच्चाउनुपर्ने भनि गरेको टिप्पणी सच्चाउनुपर्नेमा राष्ट्रपति माथि नै गठबन्धनले अर्मयादित व्यवहार गरेको छ।’
उनले नागरिकता विधेयक पारित गर्दा सत्ता पक्षले बहुमतको देखाएको तर यसले राष्ट्रियतामा असर गर्ने उनको दाबी थियो। त्यस्तै एमालेले उठाएको चौथो विषय महंगीलगायतका बेथिति बढेकोप्रति रहेको पौडेलले बताए।
‘अहिले बजारमा महंगी बढेको छ। सरकारले त्यसलाई रोक्न कुनै पनि काम नगरेको र आम जनता मारमा परेको कुरा हामीले प्रधानमन्त्रीलाई भेटमा ध्यानाकर्षण गराएका छौं,’ उनले भने, ‘सत्ता गठबन्धनका कारण यो बढेको छ।’
कडा प्रतिवाद गर्ने चेतावनी
उनले सरकारले आफूहरुको आवाज नसुनेमा एमालले कडा प्रतिवाद गर्ने चेतावनीसमेत दिएको बताए। एमाले यो मुलुकको सबैभन्दा ठूलो दल हो भन्ने कुरा हेक्का राखेर सत्ता गठबन्धनभित्र काम गर्न आफूहरुले सुझाएको उनको भनाइ छ।
एमाले अध्यक्षको कुरा सुनेपछि प्रधानमन्त्री शेरबहादुर देउवाले मंसिर ४ मा हुने निर्वाचन निष्पक्ष र धाँधलीरहित हुने कुरामा ढुक्क हुन आग्रह गरे। उनले निर्वाचन गराउने कुरामा सरकार गम्भीर रहेकाले यसमा आशंका नर्गन आग्रह गरे।
त्यस्तै अन्य कुरामा पनि आफू सबैसँग सहमति गरेर जाने कुरामा विश्वास गर्ने प्रधानमन्त्रीले अनुरोध गरे। एमालेले उठाएका कतिपय कुरा सत्ता गठबन्धनको बैठकमा आफूले पेस गर्ने प्रधानमन्त्रीले बताएका छन्। उनले सबै विषय आफूले मात्र सम्बोधन गर्नेभन्दा गठबन्धनमा राख्नुपर्ने भएकाले आवश्यक छलफल गर्ने आश्वासन दिए।
‘प्रधानमन्त्रीले तपाईंहरुको कुरा सुनेँ, मेरो ध्यानाकर्षण भएको छ भन्नुभयाे,’ पौडेलले भने। प्रधानमन्त्री देउवाले संसद्मा विचाराधीन संक्रमणकालीन न्याय सम्बन्धी विधेयक र नागरिकता विधेयक राष्ट्रिय सभाबाट छिट्टै पारित गरि राष्ट्रपति कार्यालयमा प्रमाणीकरणका लागि पठाउने विषयमा राजनीतिक दलहरुले छलफल गरिरहेकाे बताएको उनले जनाए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786437116.jpg)
-1786513116.png)
-1786184812.png)
