दाङ– आफ्नै सवारीमा आगो लगाउने गाडी धनीसहित ३ जनालाई दाङ प्रहरीले सार्वजनिक गरेको छ। नेपाल बन्दको मौका छोपेर मंगलबार टिपरमा आगो लगाउने गाडी धनीसहित चालक र सहचालकलाई पक्राउ गरिएको हो।
पक्राउ पर्नेमा टिपर धनी घोराही उपमहानगरपालिका-१८ का ४३ वर्षीय धनेश्वर भण्डारी, चालक राप्ती गाउँपालिका-८ पिपरीका ३२ वर्षीय अरुण चौधरी र सहचालक गढवा गाउँपालिका-७ चन्दनपुरका १७ वर्षीय आकाश चौधरी रहेको जिल्ला प्रहरी कार्यालय दाङका डीएसपी राजनकुमार गौतमले बताए।
घोराही उपमहानगरपालिका–३ कुईरेपानीस्थित बबई पुल नजिकै गोग्लीबाट लमही जाँदै गरेको रा १ ख १६९४ नम्बरको टिपरमा आगजनी भएको थियो। मंगलबार बिहान बन्दकर्ताले चालक र सहचालकलाई टिपरबाट तल झारी आगजनी गरी फरार रहेको सूचना पाएलगत्तै प्रहरी चौकी गोग्लीबाट प्रहरी नायब निरीक्षक बत्तिकुमार पोखरेलको कमाण्डमा ३ जना र घोराहीबाट प्रहरी निरीक्षक गजेन्द्रबहादुर शाहीको कमाण्डमा ७ जनाको टोली दमकलसहित उक्त स्थानमा गएर आगो नियन्त्रणमा लिएको थियो।
प्रहरीको प्रारम्भिक अनुसन्धानपछि टिपर धनी भण्डारीले टिपर पुरानो भएर जीर्ण भइसकेकाले बीमा रकम दाबीका लागि आगो लगाउन भनी अरुण र आकाशलाई याेजनावद्ध रुपमा निर्देशन दिएकाे र साेही अनुसार उनीहरु दुवै जनाले टिपरमा डिजेल खन्याएर आगो लगाएको खुलेकाे डीएसपी गौतमले जानकारी दिए।
पक्राउ परेका तीनै जनामाथि आपराधिक लाभ शीर्षकमा मुद्दा दर्ता गरी अनुसन्धान भइरहेको छ। मुलुकी अपराध संहिता २०७४ को परिच्छेद २१ को दफा २५३ को उपदफा १ र २ बमोजिमको परिभाषित कसूरमा सोही दफाको उपदफा ३ ‘ग’ बमोजिम एक वर्षसम्म कैद र १० हजारसम्म जरिवाना हुने प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765528419.png)
-1764146706.png)
-1763721444.png)
-1765273665.jpg)
