काठमाडौं– स्वास्थ्यमा समस्या भएपछि अस्पताल भर्ना गरिएका कांग्रेस नेता प्रदीप गिरीको स्वास्थ्य अवस्था जटिल बन्दै गएको छ। गत साउनदेखि उनी मेडीसीटी अस्पतालमा उपचाररत छन्।
उनको स्वास्थ्य अवस्था नाजुक बन्दै गएपछि बिहीबारदेखि भेन्टिलेटरमा राखेर उपचार गरिँदैछ। पछिल्लो समय उनको अवस्था ज्यादै नाजुक रहेको बताइएको छ।
उनी बोल्न र सुन्न नसक्ने अवस्थामा छन्। उनको स्वास्थ्य अवस्थाबारे बुझ्न गएका कांग्रेसका नेताहरु निराश भएर फर्किएका छन्। शुक्रबार कांग्रेस नेता विमलेन्द्र निधि र रामहरि खतिवडा उनलाई भेट्न अस्पताल पुगेका थिए।
तर, त्यहाँ गिरिको जटिल अवस्था देखेपछि निराश भएर फर्किएका छन्। भेटपछि सामाजिक सञ्जाल, ट्वीटर, मा लेख्दै नेता निधिले गिरीको अवस्था देखेर आफू स्तब्ध भएको बताएका छन्। उनले आफूले भेटपछि गिरीका सामुन्ने निरीह भएको महसुस गरेको बताए।
उनले लेखेका छन्, ‘आदरणीय मेरा अग्रज भ्रातातुल्य मित्र, समाजवादी, गांधीवादी, विचारक, योद्धा, नेपाली कांग्रेसका नेता प्रदीप गिरीलाई मेडिसिटिमा दोस्रोपटक हेरेर बाटोमा फर्कंदै छु। स्तब्ध र निरीह छु। ईश्वरीय चमत्कारको लागि प्रार्थना गर्दछु- सबैले प्रार्थना गरौं!!!’
यस्तै अर्का नेता रामहरि खतिवडाले गिरीको अवस्था नाजुक रहेको बताएका छन्। भेटपछि उनी बोल्न नसक्ने अवस्थामा रहेको खतिवडाले बताएका छन्। आफूले बोलाउन प्रयास गरे पनि गिरीले बोल्ने प्रयाससमेत नगरेको उनले ट्वीटरमा लेखेका छन्।
गिरीसँगको भेटपछि नेता खतिवडाले लेखेका छन्, ‘आज पनि म कृष्ण प्रसाद भट्टराई जस्तै सम्मान गर्ने नेता प्रदीप गिरी भेट्न अस्पतालमा पुगें। बोलाउन खोजे ,बोल्ने प्रयास गर्नु भएन। भगवानसँग अनुरोध गरियो, छिटोभन्दा छिटो स्वस्थ भएको देख्न पाउँ।’
गिरीलाई बिहीबारदेखि आइसियुबाट भेन्टिलेटरमा सारेर उपचार भइरहेको छ। एक महिनाअघि भारतको मुम्बईस्थित एक अस्पतालमा लामो समयसम्म क्यान्सरको उपचार गराएर नेपाल फर्किएका गिरी लगत्तै मेडिसिटी अस्पतालमा भर्ना भएका थिए।
काठमाडौँमा प्रार्थनासभा
शुक्रबार नै नेपाली कांग्रेस वैचारिक अभियानले सांसद गिरीको स्वास्थ्य लाभको कामना गर्दै एक प्रार्थनासभा आयोजना गरेको छ ।
प्रार्थना सभामा नेपाली कांग्रेसका केन्द्रीय सदस्यहरु तथा नेताहरु पनि उपस्थित थिए।
वटुकहरूद्वारा शान्ति पाठ र महामृत्युञ्जय मन्त्रोच्चारण गरी सुरु गरिएको प्रार्थनासभामा सहभागीहरुले दीप प्रज्वलन गरी गिरीको स्वास्थलाभको कामना गरेका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
