काठमाडौं– प्रधानन्यायाधीश चोलेन्द्र शमशेर राणाविरुद्ध दर्ता भएको महाअभियोगमाथि छानबिन गर्न गठित महाअभियोग सिफारिस समितिको बैठक बिना कुनै निष्कर्ष सकिएको छ।
समिति गठन भएको झण्डै ६ महिनापछि बुधबार बसेको पहिलो बैठक पनि बिना कुनै निष्कर्ष सकिएको हो। बुधबारको बैठकमा समितिको सभापति चयन र महाअभियोगमाथि छानबिन प्रक्रियाका लागि कार्यतालिका तय गर्ने अपेक्षा गरिएको थियो।
बैठकमा प्रमुख प्रतिपक्षी दल नेकपा एमालेले महाअभियोग प्रक्रिया १ महिनामै टुंग्याउन प्रस्ताव पनि गरेको थियो।
एमालेका सांसद कृष्णभक्त पोखरेलले प्रधानन्यायाधीश जस्तो व्यक्तिमाथि दर्ता भएको महाभियोगलाई धेरै लम्ब्याउन नहुने बताउँदै १ महिनामै सक्नेगरी प्रक्रिया अगाडि बढाउनुपर्ने प्रस्ताव गरेका थिए। अहिले नै कार्यतालिका तय गरेर यसलाई छिटै टुङ्गाउँदा उपयुक्त हुने उनको भनाइ थियो।
समितिका ज्येष्ठ सदस्य नेपाली कांग्रेसका सांसद रामबहादुर विष्टको अध्यक्षतामा बसेको पहिलो बैठकमा राणाविरुद्ध दर्ता भएको महाभियोगको आरोपहरुमा अध्ययन गर्ने विषय सामान्य छलफल भएको बताइएको छ। नेपाल लाइभको सम्पर्कमा आएका समितिका एक सदस्य (सांसद)ले बुधबारको बैठकमा निलम्बित प्रधानन्यायाधीश चोलेन्द्र शमशेर राणाको ‘नाम मात्रै उच्चारण’ भएको जानकारी दिए।
‘उहाँ (राणा)विरुद्ध यी–यी आरोप छन् भन्ने सामान्य कुरा उठ्यो। समग्रमा भन्दा आजको बैठकमा नाम मात्रै उच्चारण गर्ने काम भयो,’ ती सदस्यले नेपाल लाइभसँग भने।
सत्ता गठबन्धनका ९८ जना सांसदहरुले गत फागुन १ गते दर्ता गराएको महाअभियोगमा राणाविरुद्ध विभिन्न २१ वटा आरोप लगाइएको छ।
बुधबारको बैठकमा आरोपका सन्दर्भमा छलफल सुरु गर्दा एमाले सांसदहरुले ६ महिनासम्म पनि कुनै प्रक्रिया अगाडि नबढाइनुका कारणबारे मात्रै धारणा राखेपछि बैठकको अध्यक्षता गरिरहेका सांसद विष्टले अर्को बैठकमा अजेण्डा तय हुने जानकारी दिएका थिए।
समितिको सभापतित्व गरिरहेका विष्टले १ महिनामै पक्रिया टुंग्याउने भनेर एमालेले अगाडि सारेको प्रस्तावमा अर्को बैठकमा छलफल गर्नेगरी बुधबारको बैठक सकिएको जानकारी दिए।
सत्तारुढ गठबन्धनका सांसदहरुले गत फागुन १ गते राणाविरुद्ध संसद् सचिवालयमा महाअभियोग प्रस्ताव दर्ता गरेका थिए। प्रस्ताव दर्ता भएको झण्डै ३ हप्तापछि (फागुन २२ गते) प्रतिनिधि सभाको बैठकबाट ११ सदस्यीय महाअभियोग सिफारिस समिति गठन भएको थियो।
सिफारिस समितिमा नेकपा एमालेका ४, नेपाली कांग्रेस र माओवादी केन्द्रका २/२, नेकपा एकीकृत समाजवादी, जनता समाजवादी पार्टी र लोकतान्त्रिक समाजवादी पार्टीका १/१ जना सांसद सदस्य छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
