काठमाडौं– मंगलबार बसेको प्रतिनिधि सभाको बैठकमा सांसद्हरुले रोजगारदेखि भौतिक पूर्वाधारको विकासमा सरकारको ध्यानाकर्षण गराएका छन्। प्रतिनिधि सभा बैठकको शून्य समयमा बोल्दै सांसद्हरुले प्रधानमन्त्री रोजगार कार्यक्रमको प्रभावकारिता, सडक निर्माणमा ठेकेदारले गरेको ढिलासुस्ती, काठमाडौंको फोहोर व्यवस्थापनको समस्या र रुकुमको चौरजहारी विमानस्थल सुरु नभएको विषयमा सरकारको ध्यानाकर्षण गराए।
सत्तारुढ गठबन्धनको दल नेकपा माओवादी केन्द्रकी सांसद सत्य पहाडीले बजेट भाषणमा उल्लेख गरिएको विद्यार्थीका लागि सहुलियतपूर्ण कर्जा र बेरोजगार लक्षित प्रधानमन्त्री रोजगार कार्यक्रम केवल कर्णप्रिय नारा मात्रै भएको टिप्पणी गरिन्। सांसद पहाडीले उक्त कार्यक्रमको प्रभावकारी कार्यान्वयनका लागि सरकारसँग जोडदार माग गरिन्।
स्वरोजगार कोष, प्रधानमन्त्री रोजगार कार्यक्रम र विपन्न वर्ग र क्षेत्रका लागि प्रदान गरिने सहुलियतसहितको कर्जालाई एकीकृत गरी रोजगारी सिर्जना गर्ने काममा ध्यान दिन पनि पहाडीले सरकारको ध्यानाकर्षण गराइन्।
सांसद पहाडीले भनिन्– बजेट भाषणमा सुन्न र पढ्न पाइने विद्यार्थीका लागि सहुलियतपूर्ण कर्जा र बेरोजगार लक्षित प्रधानमन्त्री रोजगार कार्यक्रम केवल कर्णप्रिय नारा मात्रै बनिरहेका छन्। यथार्थमा विद्यार्थीहरुले शैक्षिक कर्जाको उपयोग गर्न पाइरहेका छैनन्। त्यस्तै, प्रधानमन्त्री रोजगार कार्यक्रम पनि असारे विकासजस्तै औपचारिकता मात्रै बनिरहेको छ। तसर्थ स्वरोजगार कोष, प्रधानमन्त्री रोजगार कार्यक्रम र विपन्न वर्ग र क्षेत्रलाई प्रदान गरिने सहुलियत सहितको कर्जालाई एकीकृत गरी स्थायी प्रकारणको रोजगार सिर्जना गर्न ध्यान देओस् भनेर सभामुख महोदयमार्फत् नेपाल सरकारलाई जोडदार माग गर्दछु।
प्रमुख प्रतिपक्षी दल नेकपा एमालेका सांसद लालबाबु पण्डितले ठूला ठेकदारहरुले ठेक्कापट्टा कब्जा गर्ने गरी सरकारले नीति बनाएकाले विकास, निर्माणको काम अवरुद्ध भइरहेको आरोप लगाए। ठूला उद्योगी र व्यवसायीहरुले बैंकहरुलाई नियन्त्रणमा लिएकाले साना व्यापारी र उद्यमीहरुले बैकबाट ऋण नै नपाउने अवस्था आउँदा पनि बेखवर भएको भन्दै पण्डितले सरकारको चर्को आलोचना गरे।
सांसद पण्डितले भने– देशको विकास, निर्माणको कानुन तीव्र गतिमा अगाडि बढेन। किनभने ठूला ठेकदारहरुले ठेक्कापट्टा कब्जा गर्ने नीति अन्तर्गत गए। काम गर्ने नीति अन्तर्गत गएन। त्यसकारण विकास अवरुद्ध भएको छ। देशका उद्योगी र ठूला व्यवसायीहरुले बैंकहरु आफ्नो नियन्त्रणमा लगे। त्यसकारणले गर्दाखेरी साना उद्योगी र साना व्यापारीहरुले बैंकबाट ऋण पाउने स्थिति भएन। साना उद्योग र व्यवसायहरु धरासायी हुँदै गएको कुरा मैले जानकारी गराउन चाहन्छु।
सत्ता गठबन्धनको दल नेपाली कांग्रेसकी सांसद हिरा गुरुङले काठमाडौंमा फोहोरको समस्या गत वर्षहरुमा भन्दा पनि बढी भएको भन्दै त्यसको व्यवस्थापनका लागि काम गर्न सरकारको ध्यानाकर्षण गराइन्।
सांसद गुरुङले बाढीपहिरो र डुबान पीडितहरुलाई राहत दिने काममा ढिलाइ नगर्न पनि सरकारलाई सचेत गराइन्।
सांसद गुरुङले भनिन्– हरेक वर्ष नयाँनयाँ समस्याको रुपमा देखा परेको फोहोर व्यवस्थापन यसपाली झनै ठूलो समस्याको रुप लिएर आयो। पूरै काठमाडौं दूर्गन्धित भइसकेको छ। सरकारले महानगरको र महानगरले सरकारको मुख हेरेर बस्न मिल्दैन। प्रशासन लगाएर बञ्चरेडाँडामा २०० टिपर फोहोर फाल्दैमा सरकारले काम गरेको भन्न मिल्दैन। यसको दीर्घकालीन समस्या समाधानको निम्ति काम गर्न सरकारको ध्यानाकर्षण गराउन चाहन्छु। वर्षेनी जाने बाढीपहिरोले जनधनको क्षति भएका जनताहरुलाई उचित व्यवस्थापन गर्ने भनिए पनि कार्यान्वयन पक्ष ढिलासुस्ती भएको हुँदा पीडितहरु आक्रोशित भएका समाचारहरु अखवारहरुमा दिनहुँजस्तो आइरहन्छ। जुरे पीडितले अझै पनि बासको व्यवस्था नपाएकाले ती पीडितहरुलगायत सबैलाई बासको व्यवस्था गर्न सम्बन्धित मन्त्रालयको ध्यानाकर्षण गराउन चाहन्छु।
सत्ता गठबन्धनको दल माओवादी केन्द्रका सांसद शक्तिबहादुर बस्नेतले रुकुम पश्चिमको चौरहजारी विमानस्थलको सेवा सुचारु गराउन सरकारसँग माग गरे। उनले मध्यपहाडी सडकअन्तर्गतको भेरी नदीमा पर्ने पुल निर्माणको काम सुरु भएको दशक बित्दा पनि त्यसको निर्माण कार्यले गति नलिएको भन्दै सरकारको आलोचना गरे। सांसद बस्नेतले सो पुलको निर्माण कार्य ढिलाइ हुनुको कारण खोजी गरी छिटो पूरा गर्न पनि सरकारलाई ध्यान दिन आग्रह गरे।
सांसद बस्नेतले भने– जाजरकोट, रुकुम पश्चिम र सल्यान जिल्लालाई पायक पर्नेगरी केन्द्र भागमा स्थापना भएको चौरहजारी विमानस्थलमा नेपाल वायु सेवा निगमले आफ्नो सेवा दिँदै आएको थियो। तर केही वर्षयता सो सेवा बन्द अवस्थामा छ। सरोकारवाला जिल्लाका जिल्ला प्रशासन कार्यालयहरु, उद्योग, व्यवसायी संघ, संस्थाहरुसहित हामी जनप्रतिनिधिहरुले बेलाबेलामा पटक पटक हवाई सेवा सुचारु गर्नका लागि वायु सेवा निगमको कार्यालयमा अनुरोध गर्दै आएका छौं र लिखित अनुरोध पनि गर्दै आईरहेका छौं। पूर्वाधार तयार भएको छ। कालोपत्रे सहितको रनवे छ, तर पनि सेवा संचालन हुन सकिराखेको छैन। तत्काल सेवा संचालनका लागि म नेपाल सरकारसँग विशेष आग्रह गर्न चाहन्छु। मध्यपहाडी सडकको भेरी नदीमा पर्ने पुल निर्माण कार्य सुरु भएको दशक भइसक्यो। तर २० प्रतिशत पनि काम अहिलेसम्म हुन सकेको छैन। र, त्यो निर्माण कार्य सम्पन्न नहुनुको कारण के हो ? त्यो कुराको खोजीसहित निर्माण कार्य छिटो सम्पन्न गर्नका लागि म नेपाल सरकारको ध्यानाकर्षण गराउन चाहन्छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1783240079.png)
-1764146706.png)
