काठमाडौं– आगामी मंसिर ४ गते हुन लागेको प्रदेश सभा र प्रतिनिधि सभा निर्वाचनमा मतदान गर्ने मतदाताको संख्या दाङमा ४ लाख १९ हजार ९ सय २४ जना रहेको प्रदेश निर्वाचन कार्यालय दाङले जनाएको छ।
दाङ जिल्लामा पुरूषभन्दा महिलाको संख्या धेरै रहेको छ। निर्वाचन कार्यालय दाङका सूचना अधिकारी गेहेन्द्र कुँवरका अनुसार मंसिर ४ गतेको निर्वाचनमा सहभागी हुने मततादाहरूमा महिलाको संख्या २ लाख १३ हजार ४६८ र पुरूषको संख्या २ लाख ५ हजार ४१२ रहेको छ।
२०७४ को प्रतिनिधि सभा र प्रदेश सभा निर्वाचन तहमा मतदाता संख्या ३ लाख ३८ हजार ९ सय ४३ थियो। निर्वाचन कार्यालयले सार्वजनिक गरेको मतदाता नामावली अनुसार पाँच वर्षको अवधिमा जिल्लाको मतदाता संख्या ८० हजार ९८१ जना थपिएका छन्।
दाङमा पछिल्लो करिब साढे १ महिनामा ९ हजार मतदाता थपिएका छन्। ४९ दिनको अवधिमा दाङमा गरिएको मतदाता नामावली संकलन अभियानमा ४ हजार ४ सय ७३ महिला र ४ हजार ७ सय ४९ जना पुरूष गरी कूल ९ हजार २ सय २२ जना नयाँ मतदाता थपिएको कार्यालयका सूचना अधिकारी कँवरको भनाइ छ।
४६१ मतदान केन्द्र
सरकारले दुई तहको निर्वाचन एकैसाथ गर्ने गरी समय तोकेको छ। दाङमा पनि यसको आन्तरिक तयारी तीव्र पारिएको प्रदेश निर्वाचन कार्यालय दाङले जनाएको छ। साउन १७ गते जिल्लामा रहेका मतदाता नामावलीको विवरण निर्वाचन आयोगमा पठाइएको कार्यालयले जानकारी दिएको छ ।
कार्यालयले जिल्लास्थित राजनीतिक दल, दाङका दशवटै पालिका प्रमुख एवं अध्यक्ष, सुरक्षा निकाय प्रमुखसँग मतदान केन्द्र र मतदानस्थलको अवस्था तथा पुनरावलोकन बारेमा छलफल गरिसकेको छ।
छलफलपछि निर्वाचन प्रयोजनका लागि यसअघि तोकिएका मतदानस्थल थप नगर्ने गरी केही अपायक ठाउँको विकल्प खोज्दै सबैको सहमतिमा फरक ठाउँमा मतदानस्थल तोकिएको कार्यालय सूचना अधिकारी कँवरले बताए ।
जिल्लाका ६ वटा पालिकाका १६ वटा मतदानस्थललाई अन्यत्र सार्ने निर्णय भएको छ। यसअघि गठित कार्यदलले गरेको सिफारिसका आधारमा गढवामा ४ वटा, घोराहीमा ३, तुलसीपुरमा १, बंगलाचुलीमा ५, राप्ती गाउँपालिकामा १ र शान्तिनगर गाउँपालिकामा २ गरी १६ मतदानस्थललाई पायक पर्ने ठाउँमा स्थानान्तर गरिएको छ । गत बैशाख ३० गते भएको स्थानीय निर्वाचनमा दाङमा १ सय ५३ मतदानस्थल र ४ सय ६१ मतदान केन्द्र तोकिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
