काठमाडौं- तत्कालीन एकीकृत माओवादीबाट सात वर्षअघि अलग्गिएका डा बाबुराम भट्टराई पुनः माओवादी केन्द्रकै निर्वाचन चिह्नबाट उम्मेदवार बन्ने सम्भावना बढेको छ।
पुष्पकमल दाहाल प्रचण्ड नेतृत्वको नेकपा माओवादी केन्द्र र भट्टराई नेतृत्वको नेपाल समाजवादी पार्टीबीच संघीय निर्वाचनमा एउटै चुनाव चिह्नबाट प्रतिस्पर्धामा उत्रिने करिब–करिब सहमति भएको छ।
गत बिहीबार मात्रै प्रचण्ड र भट्टराईबीच ललितपुरमा भेट भएको थियो। भेटमा नारायणकाजी श्रेष्ठ पनि सहभागी थिए। त्यसअघि पनि दुई नेताबीच पटक–पटक भेट हुने गरेको छ।
तर, ठोस सहमति हुने गरेको थिएन। समाजवादी केन्द्र बनाउने विषयमा दुवै नेताहरु सकारात्मक रहेको बताइन्छ।
'चुनाव चिह्न र घोषणापत्र एउटै बनाएर उम्मेदवार बन्ने भन्ने सहमति नजिक हो। तर सहमति नै भइसकेकोचाहिँ छैन', नेपाल समाजवादी पार्टीका प्रचार विभाग प्रमुख विश्वदीप पाण्डेले नेपाल लाइभलाई बताए।
निर्वाचन आयोगले दुई वा सोभन्दा बढी दललाई एउटै निर्वाचन चिह्नबाट भाग लिने सुविधा दिएको छ।
'राजनीति दलसम्बन्धी ऐन, २०७३ को दफा ४९, बमोजिम दुई वा सोभन्दा बढी दलले एकल चुनाव चिह्न लिई निर्वाचनमा भाग लिने प्रयोजनका लागि दल दर्ताको निवेदन दिँदा राजनीतिक दल सम्बन्धी नियमावली, २०७४ को अनुसूची-१३ बमोजिमको ढाँचामा निवेदन दिनुपर्ने व्यवस्था गरिएको छ', आयोगले साउन २० गते जारी गरेको विज्ञप्तिमा भनिएको छ।
माओवादी केन्द्र र नेपाल समाजवादी पार्टीले एउटै घोषणापत्र बनाउन पनि सहमति नजिक पुगेका छन्। यस्तो अभ्यास यसअघि पनि भएको थियो।
२०७४ सालको निर्वाचनमा वामगठबन्धन बनाएका नेकपा एमाले र नेकपा माओवादी केन्द्रले साझा घोषणापत्र बनाएर निर्वाचनमा होमिएका थिए।
एउटै चिह्न र एउटै घोषणापत्र बनाएर चुनाव लड्नुको आशय कालान्तरमा पार्टी एकता गर्ने भन्ने बुझिन्छ। एमाले र माओवादी केन्द्रबीच एकता र विभाजन पनि भइसकेको छ।
अहिले माओवादी केन्द्र र नेपाल समाजवादी पार्टीले एउटै चुनाव चिह्न र घोषणापत्र बनाउन सहमति नजिक पुगे पनि पार्टी एकता नै गर्ने भन्ने विषयमा भने चर्चा नभएको पाण्डेले बताए। 'कालान्तरमा पार्टी एकता गर्ने विषयमा अहिले छलफल भएको छैन। अहिले निर्वाचनमा मात्रै केन्द्रित छौं', उनले भने।
भट्टराईले सार्वजनिक रुपमै कम्युनिस्ट नामको पार्टीप्रति अरुचि देखाउने गरेका छन्। उनले समाजवादी पार्टी बनाउनुपर्ने मत राख्दै आएका छन्।
उता प्रचण्ड र उनी निकटका नेताहरुले भने भट्टराईलाई माओवादीमै फर्किन आग्रह गर्ने गरेका छन्। त्यसो त, कतिपय वामपन्थी पार्टीहरुबीच समाजवादी केन्द्र बनाउने चर्चा पनि चलिरहेको छ।
२०७४ सालको निर्वाचनमा भट्टराई गोरखा-२ बाट निर्वाचित भएका थिए। नयाँ शक्तिबाट उम्मेदवार बनेका उनले कांग्रेसको सहयोगमा वाम गठबन्धनका साझा उम्मेदवार नारायणकाजी श्रेष्ठलाई पराजित गरेका थिए।
भट्टराईलाई माओवादी निकट बनाउने विषयलाई श्रेष्ठले नरुचाएको प्रचण्ड निकट माओवादी केन्द्रका नेताहरु बताउँछन्। श्रेष्ठ राष्ट्रिय सभाबाट राजीनामा दिएर प्रतिनिधि सभामा उम्मेदवार बन्ने योजनामा रहेको बताइन्छ।
शान्ति प्रक्रियामा आएसँगै माओवादीमा तीन ध्रुव थियो, प्रचण्ड, भट्टराई र मोहन वैद्य नेतृत्वमा। त्यतिबेला प्रचण्डले आफूलाई अल्पमतमा पुग्न नदिन श्रेष्ठ नेतृत्वको एकता केन्द्र मसालसँग एकता गरेका थिए।
जुन एकता प्रचण्डका निम्ति सहयोगी पनि भएको थियो। तर पछिल्लो समय प्रचण्ड र श्रेष्ठबीचको सम्बन्धमा दरार आउँदै गएको माओवादीका नेताहरु बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
