काठमाडौं– गणपुरक संख्या नपुगेपछि दोस्रोपटक पनि प्रतिनिधि सभाको बैठक स्थगित भएको छ।
प्रतिनिधि सभाको बैठकमा गणपुरक संख्या नपुग्दा सार्वजनिक ऋण व्यवस्थापनका सन्दर्भमा अर्थ समितिको प्रतिवेदनसहितको सार्वजनिक ऋण व्यवस्थापन विधेयक २०७६ माथिको छलफल गरियोस् भन्ने प्रस्ताव प्रभावित भएको हो।
सभामुख अग्निप्रसाद सापकोटाले छलफल प्रस्ताव अघि बढाउने क्रममा सांसद प्रेम सुवालले गणपुरक संख्या नपुग्ने भन्दैं प्रश्न उठाएका थिए।
संविधानको धारा ९४ को व्यवस्था अनुसार संघीय संसद्को कुनै पनि सदनको बैठकमा सम्पूर्ण सदस्य संख्याको एक चौथाइ सदस्य उपस्थित नभएसम्म कुनै प्रश्न वा प्रस्ताव निर्णयका लागि प्रस्तुत गर्न नमिल्ने प्रावधान रहेको छ ।
सांसद सुवालको प्रश्नपछि दोस्रो बैठकको काम कारबाही सुरु गर्न लागेका सभामुख सापकोटाले तीन मिनेटको घण्टी बजाएर सांसदको संख्या एकीन गर्न लगाएका थिए।
प्रस्ताव पारित गर्नका लागि ६९ सांसद आवश्यक पर्ने र उपस्थित सांसदहरुको संख्या ६७ मात्रै पुगेपछि बैठक मंगलबारसम्मका लागि स्थगित गरिएको हो।
सांसदहरुको गणपुरक संख्या नपुग्दा कार्यसूचीमा रहेका बाँकी बिजनेस सूचीबाट हटाएर बैठक नै स्थगित गरिएको सभामुख सापकोटाले जनाएका छन्। बैठक प्रारम्भ हुँदा १७९ जना सांसदहरुले हाजिरी गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
