काठमाडौं– नेपाली कांग्रेसकी सांसद रंगमती शाहीले हुम्ला जिल्लामा स्वास्थ्य, शिक्षा तथा सडकको पहुँच नपुगेको भन्दै आक्रोश पोखेकी छन्।
आइतबारको प्रतिनिधि सभा बैठकको विशेष समयमा बोल्दै सांसद शाहीले सडक सञ्जालमा जोड्ने कर्णाली करिडोर निर्माणका क्रममा नेपाली सेनाका जवानले ज्यान गुमाउनु परेकोमा दुख व्यक्त गरेकी छन्।
उनले हुम्लाको सल्लीसल्ला भन्ने ठाउँमा बेलिब्रिज बनाउनका लागि लगातार तीन वर्षदेखि सिंहदरबार धाउँदासमेत काम नबनेको भन्दै आक्रोश पोखेकी छन्। उनले काम गर्नका लागि सरकारकै संयन्त्र बाधक भएको आरोप लगाएकी छन्।
सांसद शाहीले सरकारलाई प्रश्न गरिन्, ‘के हुम्ली जनता अझै बाँदर हिँड्ने बाटोमै हिँडुन् भन्ने सरकारको उद्धेश्य हो?’सांसद शाहीले एउटा पनि नगरपालिका नभएको, आंगिक क्याम्पस नभएको, विधुत्को राष्ट्रिय प्रसारण लाइन नजोडिएको, सञ्चारको पहुँच नपुगेको र कर्णालीको दूषित पानी खान बाध्य जिल्लाको रुपमा हुम्ला रहेको गुनासो गरेकी छन्।
उनले पाँच केजी चामलको लागि लाइन बस्नु पर्ने, उपचार नपाएर ज्यान गुमाउनुपर्ने बाध्यता र चर्को हवाई खर्च तिरेर उपचार गर्नुपर्ने बाध्यता रहेको जानकारी गराउँदै सरकारको ध्यानाकर्षण गराइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
