काठमाडौं- नेपाली कांग्रेसका सभापति तथा प्रधानमन्त्री शेरबहादुर देउवाको एकलौटी निर्णयको प्रतिवादमा आफ्नो समूहको नेता शेखर कोइराला 'कमजोर' देखिएको निष्कर्ष उनी पक्षधर नेताहरुले निकालेका छन्। देउवाको 'प्रतिस्पर्धी' समूहले अहिले पनि दबाब दिन नसके आगामी संघीय र प्रदेश सभाको निर्वाचनमा टिकट नपाउने त्रास उनीहरुमा सिर्जना भएको छ।
१४ औं महाधिवेशनको प्रतिस्पर्धी समूह 'शेखरपक्ष'का केही नेताले सशक्त प्रतिवादका लागि आफूपक्षीय नेता तथा कार्यसमितिका पदाधिकारीमाथि दबाब बढाउन थालेका हुन्। आइतबार २ बजे कोइराला निवासमा आफूले शनिबार निकालेका निष्कर्ष सुनाउने कार्यक्रम रहेको उनीहरुमध्येका एक गुरुराज घिमिरेले जानकारी दिए।
केन्द्रीय समितिदेखि भातृ संगठनसम्मका नियुक्तिमा देउवाले आफू पक्षका नेता-कार्यकर्तालाई प्राथमिकता दिइरहेका छन्। शुक्रबार नेपाल महिला संघको अध्यक्षमा पनि देउवा पक्षकै नेता उषाकुमारी राउत मिश्र मनोनित भएकी छिन्। यसअघि नेपाल विद्यार्थी संघ र तरुण दलमा पनि देउवा पक्षकैले नेतृत्व पाएका छन्। केन्द्रीय समितिमा मनोनित गर्दा पनि अधिकांश आफूपक्षीय, त्यसपछि रामचन्द्र पौडेल र कृष्णप्रसाद सिटौलालाई महत्त्व दिएका थिए भने आफूसँग प्रतिस्पर्धा गरेका कोइराला पक्षका कोही परेका थिएनन्।
उपसभामुखमा पुष्पा भूसाल देउवा पक्षकै नेता बनाइएकी छिन् भने पार्टीका प्रमुख सचेतक उनीनिकटकै मीनबहादुर विश्वकर्मा नियुक्त भएका छन्। प्रदेश सभाका विभिन्न ठाउँमा समेत आफ्नो पक्षलाई किनारमा पारिएको शेखर पक्षीय नेताहरुको भेलाको निष्कर्ष छ।
१४औं महाधिवेशनपछि केन्द्री सदस्य मनोनित गर्दा नै कोइराला पक्षले असहमति राखेको थियो। तर, देउवामा त्यसको असर देखिएको छैन। घिमिरेले सभापति देउवाले १३औं महाधिवेशनपछि अपनाएको कार्यशैलीलाई निरन्तरता दिएको निष्कर्ष आफूहरुले निकालेको बताए।
उनले भने, 'उहाँले १३औं महाधिवेशनकै बाटो अख्तियार गर्नुभयो। १४औं महाधिवेशनपछि उहाँले केन्द्रीय समिति र भातृ संगठनमा मनोनित गर्नुभयो, राष्ट्रिय सभा र स्थानिय निर्वाचन नै भयो। राजदूत नियुक्तिलगायत भए। यी दर्जनौं निर्णयमा कहीँ पनि १४औं महाधिवेशनको प्रतिस्पर्धी समूह समेटिएन। सल्लाह लिन उपयुक्त ठानिएन।'
देउवाको निरन्तर एकलौटीले निर्वाचनको संघारमा कोइरालापक्षका कार्यकर्ता झस्किएका छन्। कोइरालाले देउवासँग प्रष्ट रुपमा आफ्नो बटमलाइन प्रस्तुत गर्न नसके टिकट वितरणमा समेत एकलौटी गर्न सक्ने उनी पक्षका नेताहरुमा त्रास छ।
नेपाली कांग्रेसमा टिकटको टुंगो लगाउने संसदीय बोर्डको व्यवस्था छ। जसको गठनमा सभापति देउवाको अरुचि छ। सत्तापक्षीय गठबन्धनले आगामी निर्वाचन तालमेल गरेरै लड्ने निर्णय गरेको छ। पाँच दल सत्तामा रहेका र लोकतान्त्रिक समाजवादी समेत गरी ६ दल बनाएर चुनाव लड्दा कांग्रेसको भागमा आधा भन्दा केही मात्रै बढी सिट पर्नेछन्।
संसदीय बोर्ड गठन नहुँदा देउवाले अहिलेकै कार्यशैली दोहोर्याएर आफू पक्षीयलाई मात्रै टिकट दिने डर शेखर पक्षका नेतामा छ। घिमिरे भन्छन्, 'हाल उहाँले गरेका दर्जनौं निर्णयलाई हेर्दा आगामी निर्वाचनमा के गर्नुहोला? भन्ने स्वाभाविक प्रश्न छ। यदि यही कार्यशैली दोहोरियो भने पार्टी नै संकटमा पर्छ। पार्टी संकटमा पर्दा लोकतन्त्र संकटमा पर्छ। त्यसैले बेलेमा हाम्रा नेताहरुको त्यसतर्फ ध्यानाकर्षण गराउनुपर्ने हामीले देखेका छौं।'
पार्टीमा आवद्ध नेता-कार्यकर्ताको समुचित मूल्यांकन नहुने चिन्ता बढेको उनले बताए। देउवाको परम्परागत पार्टी सञ्चायलन विधिले धेरै नेता-कार्यकर्ता अन्यायमा पर्ने आकलन गरेर आफूहरुले दबाब बढाएको घिमिरेको भनाइ छ। उनीहरुको शेखरप्रति अपेक्षा हुनेछ- गठबन्धनका साझेदार दलहरुका साथै पार्टीभित्रको प्रतिस्पर्धी समूहका लागि समेत देउवाले निश्चित प्रतिशत छुट्याएर टिकट बाँडफाँट गर्नुपर्छ भनेर कुरा राखियोस्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
