फाइल तस्बीर
काठमाडौं- सत्ता गठबन्धनले प्रतिनिधि सभा र प्रदेश सभा निर्वाचनमा सिट बाँडफाँट गर्न तयार गरेको कार्यदलको बैठक सकिएको छ। बिहीबार बसेको बैठक सिट बाँडफाँटको मोडालिटीमा केन्द्रित भएको थियो।
कार्यदललाई दिइएको जिम्मेवारी चाँडोभन्दा चाँडो पूरा गर्ने ढंगले सकारात्मक रुपमा छलफल भइरहेको मन्त्री ज्ञानेन्द्रबहादुर कार्कीले प्रतिक्रिया दिएका छन्। 'कार्यदलमा विभिन्न मोडालिटीका बारेमा छलफल भएर अब केही दिनभित्रमा आफ्नो काम पूरा गर्ने दिशामा कार्यदल अघि बढेको छ', बैठकबाट बाहिरिँदै उनले भने।
माओवादी केन्द्रका नेता देवप्रसाद गुरुङले पनि मोडालिटी तयार गर्ने कुरामा बिहीबारको छलफल सकारात्मक दिशातिर गएको बताए। मोडालिटीको सैद्धान्तिक छलफल सहमति नजिक पुगेको उनले बताए। अब आ-आफ्नो दलहरुभित्र वर्कआउट गरेर आउँदो बैठकबाट मोडालिटीको विषय टुंग्याइने उनले बताए। अर्को बैठक साउन ३० मा बस्ने उनको भनाइ छ।
गुरुङले दुई थरी मोडालिटीमा छलफल जारी रहेको बताए। २०७४ को संसदीय निर्वाचन र गत वैशाखमा सम्पन्न स्थानीय तहको निर्वाचनमध्ये कुनलाई आधार मान्ने भन्ने विषयमा छलफल गरिएको उनको भनाइ छ।
'विगतको निर्वाचन हेर्दा, २०७४ सालको निर्वाचनको आधार हेर्नुपर्यो। त्यसले मात्रै सबै दललाई 'कभर' गर्दैन। एकीकृत समाजवादीको 'पोजिसन' फरक खालको छ। त्यसैले त्यही एउटै सिद्धान्तले मात्रै 'कभर' गर्दैन। तर पनि त्यो बेलाको निर्वाचनको आधारमा संसद्को जुन बनावट छ। जुनप्रकारको उपस्थिति छ। त्यो उपस्थितिलाई पनि मोटामोटी रुपले आधार बनाएर गर्न सकिन्छ कि। त्यसैले त्यो उपस्थितिलाई पनि ध्यानमा राखेर त्यसको सेरोफेरोमा कति सहमति खोज्न सकिन्छ। त्यसैको सेरोफेरोमा सहमति खोजौँ भन्ने कुरा भएको छ', उनले भने।
गठबन्धनको दलहरुबीच २०७४ सालको निर्वाचन परिणामलाई आधार मान्दा माओवादी केन्द्रलाई फाइदा पुग्ने देखिन्छ। त्यतिबेला प्रत्येक्षतर्फ माओवादी केन्द्रले ३६ सिट जित्दा कांग्रेसले २३ वटा सिट मात्रै जितेको थियो।
गुरुङले प्रस्तुत गरेको अर्को आधार हो, गत वैशाखमा सम्पन्न स्थानीय तहको निर्वाचन परिणाम। 'स्थानीय तहको निर्वाचन पनि छ। तर, स्थानीय तहको निर्वाचनको 'डेटा'हरु दलको हिसाबले एक्युरिटी देखिने कुरा भएन', उनले भने।
'त्यसैले एउटै निर्वाचन मात्रै अन्तिम रुपमा आधार मान्नलाई कठिन हुने र त्यसैले अहिले सदनमा उपस्थितिको आधार, प्रत्यक्ष र समानुपातिकतर्फको मत र त्यसैको सेरोफेरोमा सहमतिको आधार खोज्दै जानुपर्छ भन्ने कुरा भएको छ', गुरुङले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
