काठमाडौं– संस्कृति पर्यटन तथा नागरिक उड्डयनमन्त्री जीवनराम श्रेष्ठ सर्वोच्च अदालत उपस्थित भएर लिखित जवाफ पेस गरेका छन्।
नेपाल वायु सेवा निगमका कार्यकारी अध्यक्ष युवराज अधिकारीको मुद्दामा उनी आफैं अदालत उपस्थित भएर जवाफ पेस गरेका हुन्।
सर्वोच्च अदालतले यसअघि उनलाई पदबाट नहटाउनु भनि अन्तरिम जारी गरेको तर सरकारले बर्खास्त गरेपछि उनले पर्यटनमन्त्री श्रेष्ठविरुद्ध अदालतको अवहेलना मुद्दा दायर गरेका थिए।
सर्वोच्चले उक्त मुद्दामा मन्त्री श्रेष्ठ स्वयं उपस्थित भएर जवाफ दिन भनेको थियो। सर्वोच्चको उक्त आदेशपछि मन्त्री श्रेष्ठ लिखित जवाफ लिएर पुगेका हुन्।
निर्वतमान पर्यटनमन्त्री प्रेम आलेले उनलाई नियुक्त गरेका थिए। तर उनीमाथि आले नै मन्त्री हुँदा हटाउने प्रक्रिया सुरु भएको थियो। सुरुमा जेठ २६ मा स्पष्टिकरण सोधिएको थियो। त्यसअघि पनि उनीमाथि आर्थिक हिनाहिनाको आरोप लागेको थियो।
विमान भाडामा दिँदा कानुनी आधार र औचित्यभन्दा बाहिर गएको, सार्वजनिक प्रतिस्पर्धा नगरी एउटा संस्थालाई टिकट बिक्रीको जिम्मा दिएकोजस्ता विषयमा उनलाई स्पष्टिकरण सोधिएको थियो।
तर, चित्तबुझ्दो जवाफ नदिएको भन्दै उनीमाथि छानबिनका लागि समिति गठन गरिएको थियो। त्यसपछि गत असार ६ गते मन्त्रिपरिषद्ले उनलाई निलम्बन पनि गरेको थियो।
निलम्बनपछि अदालत पुगेका अधिकारीलाई सर्वोच्च अदालतका न्यायाधीश ईश्वर खतिवडाको इजलासले असार २३ गते अल्पकालीन अन्तरिम आदेश जारी गर्दै ‘काम गर्न दिनू’ भनेको थियो।
सरकारको निर्णयविरुद्ध अधिकारीले हालेको मुद्दामा अन्तिम फैसला नहुँदासम्म सरकारको कुनै पनि निर्णय कार्यान्वयन नगर्न, नगराउन भनिएको थियो।
त्यस्तै, सर्वोच्च अदालतले पर्यटनमन्त्री जीवनराम श्रेष्ठलाई किन कारबाही नगर्ने भन्दै सात दिनभित्र अदालतमा उपस्थित भएर जवाफ दिन पनि मन्त्री श्रेष्ठको नाममा कारण देखाऊ आदेश जारी गरेको थियो।
तर गत बिहीबार पुनः मन्त्रिपरिषद्ले अर्को निर्णय गर्दै अधिकारीलाई बर्खास्त गरेको छ। मन्त्रिपरिषद्ले बर्खास्त गरेकै दिन अदालतले भने यसअघिको अल्पकालीन अन्तरिम आदेश कामय हुँदा सरकारको यस्तो निर्णय प्रतिकूल हुने भन्दै आदेश जारी गरेको छ।
लिखित जवाफमा मन्त्री श्रेष्ठले आचारण अनुसारको कार्य नगरेको र जिम्मेवारी पूरा नगरेका कारण सरकारले स्पष्टिकरण सोधेको र सुनुवाईको मौका नै नदिएको भनि गरिएको जिकीर गलत भएकाले रिट र अवहेलना मुद्दा दुवै खारेज हुनुपर्ने माग गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
