काठमाडौं- रुसले युक्रेनको थुप्रै भूभागलाई आफ्नो देशमा गाभ्ने योजना बनाएको दाबी अमेरिकाले गरेको छ।
क्रिमिया क्षेत्रलाई आफ्नो कब्जामा लिन बनाएको रणनीति प्रयोग गरेर रुसले थप युक्रेनी भूभागलाई आफ्नो देशमा गाभ्ने योजना बनाएको अमेरिकी दाबी छ।
अमेरिकी गुप्तचर निकायलाई उद्धृत गर्दै राष्ट्रिय सुरक्षा परिषद्का प्रवक्ता जोन किर्बीले रुसले युक्रेनको भूभाग नियन्त्रण लिनका लागि आधार तयार पारिसकेको बताएको बीबीसीले उल्लेख गरेको छ। रुसले युक्रेनमा कब्जा गरेको क्षेत्रहरूले रुसमा गाभिने विषयबारे सेप्टेम्बर लगत्तै जनमत संग्रह गर्न सक्ने र उक्त कार्य फर्जी हुने उनले बताए।
सन् २०१४ मा जनमत संग्रहरपछि रुसले युक्रेनको क्राइमियालाई आफ्नो क्षेत्रमा गाभेको थियो।
उनले रुसले युक्रेनी क्षेत्रहरूमा अवैध रूपमा रुस समर्थक अधिकारीहरू तयार पारेको आरोप लगाए। रुसले युक्रेनको भूभागलाई आफ्नो बनाउन जनमत सङ्ग्रह गराउने उद्देश्यका साथ त्यसो गरेको किर्बीको भनाइ छ। रुसले कब्जामा लिएको युक्रेनी क्षेत्रहरूमा यसअघि नै आफ्नै क्षेत्रीय र स्थानीय अधिकारीहरूको कार्यालय स्थापना गरिसकेको अमेरिकी दाबी छ।
सन् २०१४ मा हतारमा आयोजना गरिएको सङ्गठित जनमत सङ्ग्रह पछि रुसले क्राइमियालाई आफ्नो नियन्त्रणमा लिएको थियो। त्यस कार्यलाई अन्तर्राष्ट्रिय समुदायले अवैध ठानेको थियो। यद्यपि, मतदाताहरूले आफ्नो भूभाग रुसमा गाभिने पक्षमा मत खसालेका थिए।
यसैबीच युक्रेनकी प्रथम महिला ओलेना जेलेन्स्का उच्च तहका छलफलहरूका निम्ति अमेरिका पुगेकी छन्। उनले त्यहाँको संसद्मा समेत सम्बोधन गर्ने छिन्।
उनका पति राष्ट्रपति भोलोदिमिर जेलेन्स्कीले भर्चुअल मन्तव्यमार्फत अमेरिकासँग थप सैन्य उपकरणहरू माग गरे लगत्तै उनी अमेरिका पुगेकी हुन्।
जेलेन्स्काले सोमबार अमेरिकाका विदेशमन्त्री एन्टोनी ब्लिन्केनलाई भेटेको र मंगलबार समकक्षी जिल बाइडनसँग वार्ता गर्ने ह्वाइट हाउसले जनाएको छ। यो उनीहरूको दोस्रो भेट हुनेछ। यसअघि गत मे महिनामा बाइडनको अघोषित युक्रेन भ्रमणका क्रममा उनीहरूको भेट भएको थियो।
उनले बुधवार क्यापिटल हिलमा सांसदहरूलाई सम्बोधन गर्ने कार्यक्रम तय छ।
युक्रेनी सरकारमा जेलेन्स्काको आधिकारिक जिम्मेवारी छैन। तर युक्रेनमा रुसले आक्रमण सुरु गरेको करिब पाँच महिना पछि किएभले अमेरिकाबाट थप सैन्य सहायता र राजनीतिक समर्थन चाहेको छ। अमेरिकी सांसदले सेप्टेम्बरको अन्त्यसम्ममा युक्रेनलाई हस्तान्तरण हुने गरी लगभग ४० अर्ब डलर सहायता स्वीकृत गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
