माइकल ज्याक्सनलाई ‘किङ्ग अफ पप’ भन्ने गरिन्छ। पुरानो जमानाकी चर्चित अभिनेत्री एलिजाबेथ टेलरले एक समारोहमा यतिसम्म भनेकी थिइन् कि, ‘माइकल ज्याक्सन पप संगीत, रक संगीत र आत्माका राजा हुन्।’
४० वर्ष लामो करिअरमा उनले गीत, म्युजिक भिडियो र स्टेज शोमार्फत भएको आम्दानीले हरेक किसिमका कीर्तिमान तोडेका थिए। ५० वर्षको उमेरमा उनी दुनियाँबाट बिदा लिएका थिए। तर, मृत्युपछि पनि यी अफ्रिकी अमेरिकी कलाकारको कमाइ सन् २०१६ मा ८२५ मिलियन डलर थियो। फोब्र्सको एउटा सुचिमा उनको यो कमाइबारे उल्लेख छ।
एमटीवीलाई पनि माइकल ज्याक्सनका कारण एक समयमा निकै धेरै कमाइ र चर्चा पाउने अवसर प्राप्त भएको थियो। अमेरिकामा सन् १९८१ मा सार्वजनिक भएको एमटीवीलाई माइकल ज्याक्सनको एल्बम ‘थ्रिलर’ (१९८२) को रिलिजपछि घरघरमा चिन्न थालिएको थियो। यो एल्मबमा भएका तीन गीतका भिडियोहरूले पूरै अमेरिकामा चर्चा कमाएको थियो।
‘बिली जीन’, ‘थ्रिलर’ र ‘बीट इट’ नामक म्युजिक भिडियोहरूमा हल्लिँदै गाइरहेका २४ वर्षका एमजे आफ्नो चर्चित नृत्यहरूको पहिलो झलक देखाएका थिए, जसलाई उनले पछि विश्वविख्यात बनाउन लागेका थिए। पछि एक टेलिभिजन शोमा उनले सन् १९८३ मा ‘बिली जीन’ गीतको प्रस्तुति दिँदै गर्दा दुनियाँले पहिलो पटक माइकल ज्याक्सनले ‘मुन वाक’ गरिरहेको देखेका थिए।
माइकल ज्याक्सनको जिन्दगीका हरेक पक्ष र कोणबाट पहिल्यै चर्चा भइसकेको छ र त्यो अहिले पनि जारी छ। तर, एउटा यस्तो चीज छ, जसबारे ज्यादा लेखिएको वा पढिएको छैन। त्यो हो, माइकल ज्याक्सनले चन्द्रमालाई गर्ने अथाह प्रेम।
चन्द्रमाको उपस्थितिबिना जसको कविता, गीत र त्रिवेणीहरु अधुरा छन्, उनै गुलजार र माइकल ज्याक्सनबीचमा यही समानता छ।
मुन वाकको नाम ‘मुन वाक’ किन भयो? यसको कुनै ठोस कारण छैन। माइकल ज्याक्सनभन्दा धेरै पहिले आएका कलाकारहरुले पनि मुन वाकको प्रस्तुति गरेका थिए। स्वयम् माइकल ज्याक्सनले पनि यो प्रस्तुति अरुबाट सिकेका थिए। तर, जब उनले यसलाई स्टेजमा प्रदर्शन गरे, संसारमै सबैभन्दा सर्वश्रेष्ठ शैलीमा प्रस्तुत गरेका थिए। यो प्रस्तुतिलाई त्यो बेलासम्म कलाकारहरूका बीचमा ‘ब्याक स्लाइड’ नामबाट चिनिन्थ्यो।
तर, ‘बिली जीन’ गीतमा एमजेले पहिलो पटक यस्तो चमत्कारी ढंगबाट ‘ब्याक स्लाइड’ गरिरहेको देखेपछि उनलाई अरुले सोधेका थिए, ‘यो के हो?’
उनले जवाफमा भनेका थिए, ‘मुन वाक।’ अर्थात्, चन्द्रमामा चल्ने तरिका।
ज्याक्सनमाथि कैयौँले किताब लेखेका छन्। उनलाई निजी रुपमा चिन्नेदेखि उनको अनुमति लिएर उनीमाथि वृत्तचित्र (लिभिङ विद माइकल ज्याक्सन) बनाउनेसम्मले अनेक खुलासा गरेका छन्। प्लास्टिक सर्जरीदेखि यौन शोषणका आरोपसम्मका कुराहरु यी किताब तथा वृत्तचित्रमा उल्लेख गरिएको छ।
तर, यीमध्ये कतिपय विषयहरू यसै हल्ला चलेका छन् र साबित हुन सकेका छैनन्। तर, सार्वजनिक बहसको विषयको रूपमा भने यी विषय सधैं चर्चामा रहिरहने छन्।
किताबहरुको भिडमा त्यो किताबको कम चर्चा भएको छ, जसलाई माइकल ज्याक्सन स्वयंले लेखेका छन्। सन् १९८८ मा प्रकाशनमा आएको उनको आत्मकथाको नाम पनि ‘मुन वाक’ नै थियो। यसलाई उनी आफैंले लेखेका थिए। मुनवाकबारे दुनियाँलाई तबमात्र थाहा भयो, जब यो छापिएर बजारमा आयो। पुस्तकमा राखिएका जानकारीहरू प्रकाशन हुनुभन्दा अगाडि नै बाहिरिन्छन् भनेर यो पुस्तकलाई एउटा कोड नाम दिइएको थियो– निल आर्मस्टङ्ग। अर्थात्, त्यही व्यक्ति, जो पहिलो पटक चन्द्रमामा हिँडेका थिए।
उनले पुस्तकमा बाल्यकालमा आफ्नो बुबाले गरेको हिंसा सहेकोदेखि नाकको सर्जरी गरेको तथा डिम्पल बनाउनका लागि गरिएको सर्जरीसम्मको घटना उल्लेख गरेका छन्।
पुस्तक प्रकाशन भएकै वर्ष सन् १९८८ मा माइकल ज्याक्सनले आफैंमाथि एउटा फिल्म बनाएका थिए, जसमा उनले आफ्ना प्रिय म्युजिक भिडियोहरूलाई समावेश गरेका थिए। ९२ मिनेटको त्यो फिचर फिल्मको नाम थियो– मुन वाकर।
छालाको बिरामीका कारण आफूलाई चन्द्रमाजस्तै सेतो बनाउन चाहने माइकल ज्याक्सनका एक साथी थिए, उरी गेलर। उनी एक जादूगर थिए र स्टीलका चम्चालाई टेढा गर्नका लागि उनी आज पनि प्रख्यात छन्। उनी सन् २०११ मा प्रकाशन भएको पुस्तक ‘माइकल ज्याक्सनः द आइकन’मा भन्छन्, ‘माइकल ज्याक्सन सधैँ चन्द्रमामा जान चाहन्थे।
उनले सन् २००५ मा चन्द्रमामा करिब हजार एकड जमिन चन्द्रमामा किनेका थिए। त्यसकारण उनी पप संगीतका अन्य कलाकारभन्दा पहिले चन्द्रमामा पुग्न चाहन्थे। उनी आफ्नो यो चाहनाप्रति यति गम्भीर थिए कि, यसैका लागि करोडौं खर्च गर्न तयार मात्रै नभएर एक अन्तरिक्ष यात्रीसँग पनि निरन्तर सम्पर्कमा थिए।
तर, किन?
किनकि, माइकल ज्याक्सन चन्द्रमामा ‘मुन वाक’ गर्न चाहन्थे।
चन्द्रमामा आफ्नो शैलीमा हिँड्ने उनको यो सपना पूरा हुन पाएन। तर, २५ जुन २००९ मा उनको निधन भएको केही दिनपछि चन्द्रमामा भएको एक खाल्डो (क्रेटर)को नाम उनैको नाममा आधारित हुँदै माइकल जोसफ ज्याक्सन राखिएको थियो।
सत्याग्रहमा प्रकाशित सामग्रीको भावानुवाद
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
