काठमाडौं– नेपाली कांग्रसका महामन्त्री तथा सांसद गगनकुमार थापाले सेयर बजारको स्थायीत्व कायम गर्न सरकारलाई आग्रह गरेका छन्।
उनले नेपाल राष्ट्र बैंकले सेयर कर्जामा ल्याएको ४/१२ को क्यापका कारण सेयर बजारमा अस्थिरता आएको र त्यसको समाधानको लागि सरकारले पहल गर्नुपर्ने माग प्रतिनिधि सभाको बैठकमा राखेका हुन्।
बजारमा भएको तरतता अभावले सेयर बजारमा समस्या ल्याउनु स्वभाविक भएको उनको भनाइ छ। तर, कुनै पनि नीतिका कारण सेयर बजारमा अस्थिरता आउँदा त्यसमा सरकारले ध्यान दिनुपर्ने उनले बताए।
उनले भने, ‘राष्ट्र बैंकले लिएको ४/१२को नीतिका कारणले यस्तो अवस्था आयो भनेर लगानीकतर्ताले भनेका छन्। हामीले पनि पढ्दै आइरहेका छौं। यसको बारेमा सरकारको ध्यानकर्षण हुन आवश्यक छ। सेयर बजारमा अस्थिरता जुनसुकै कारण आएको भएता पनि सरकारले यसलाई समाधान गर्नुपर्छ।’
थापाले विश्व व्यापी रूपमा सेयर बजारलाई अर्थतन्त्रको परिसूचकको रूपमा हेर्ने गरेको पाइएको बताएका छन्।
उनले भने, ‘विगत लामो समयदेखि नेपालको सेयर बजार अस्थिर रहेको छ। २०७८ भाद्र ३१ गते ३१ सय ९८ उच्चतम बिन्दुमा पुगेको सेयर बजार जेठ ३१ गते १९ सय ९९ को एउटा न्यूनतम बिन्दुमा पुगेको छ।’ यस्तो परिघटनाले सेयर बजारको विश्वसनियतामा नकारात्मक असर पर्ने उनको भनाइ छ।
योसँगै धेरै साना लगानीकर्ताको लगानी उठ्न नसक्ने गरी डुबेको भन्दै उनले चिन्ता व्यक्त गरे।
उनले थपे, ‘सेयर बजारको समस्या समाधान गर्न आग्रह गर्दै मकहाँ पनि लगानीकर्ता आउने गरेका छन्। दुःख गरेर जम्मा गरेको पैसाले दुईपैसा आम्दानी कमाउन चाहने मान्छे कोही झुन्डेर मर्छु भनिरहेका छन्। कोही हामी सडकमा आईपुग्यौं भनिरहेका छन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
