काठमाडौं– खेलको नियम नै हो, कोही बाहिरिनुको अर्थ कसैका लागि अवसर सिर्जना हुनु। सबथोक ठीक चल्ने हो भने युवा अलराउन्डर देव खनालले कहाँ मौका पाउथे र?
आईसीसी विश्वकप लिग–२ अन्तर्गत ओमान र अमेरिकासँगको त्रिकोणात्मक श्रृङ्खलामा नेपालले अमेरिकासँग बिहीबार पहिलो खेल खेल्दैछ। घाइते भएर ओपनिङ ब्याटर आसिफ शेख नखेल्ने निश्चित हुँदा र कुशल भुर्तेल पनि फिट नहुँदा देव खनालले मौका पाएका छन्।
देव खनालको एकदिवसीय अन्तराष्ट्रीय (ओडीआई) मा डेब्यु पनि त्यसरी नै भएको थियो, जतिबेला पूर्वकप्तान ज्ञानेन्द्र मल्ललाई टीममा राखिएको थिएन। गएको चैतमा कीर्तिपुरमा नै पपुवा न्यू गिनीविरुद्ध भएको श्रृङ्खलामा मल्ललाई पहिलो पटक ओडीआई टिमबाट हटाउँदा देवलाई राखिएको थियो। त्यहाँसम्म पुग्न देवले भारतबाट नेपाल आएर क्रिकेटमा निकै चाँडो फड्को मारेका थिए।
गत पुसमा यू–१९ राष्ट्रिय प्रतियोगितामा लुम्बिनी प्रदेशलाई च्याम्पियन बनाउँदा देव प्रतियोगिताको उत्कृष्ट ब्याटर चुनिए। उक्त प्रतियोगितामा उनले उत्कृष्ट कप्तानी भूमिका निभाएका थिए। प्रतियोगिता कै उत्कृष्ट ब्याटर देवले सात खेलमा ४ अर्धशतकसहित कुल ३३४ रन बनाएका थिए।
त्यसपछि गत माघमा भएको प्रधानमन्त्री कपमा पनि उनले यही लयलाई निरन्तरता दिए। लुम्बिनी प्रदेशको सिनियर टोलीबाट नेपाल पुलिससँगको खेलमा डेब्यू गरेका उनले चार खेलमा १५८ रन बनाउँदै धेरै रन बनाउने ब्याटरको चौँथो स्थानमा रहे।
गत वर्षदेखि घरेलु क्रिकेटमा छाप छाड्दै आएका देवले नेपालमा क्रिकेट करिअर सुरु गरेको भने धेरै भएको छैन। वेस्टर्न क्रिकेट एकेडेमीबाट रुपन्देही सुपर लिग खेलेका उनी त्यसपछि जिल्ला, प्रदेश हुँदै प्रधानमन्त्री कप खेल्न लुम्बिनीको टोलीमा समावेश भएका थिए।
प्रधानमन्त्री कपमा देवले पुलिसविरुद्ध डेब्यू मात्र गरेनन्, नेपाली सिनियर खेलाडीले भरिभराउ टोलीविरुद्ध उत्कृष्ट प्रदर्शनसमेत गरे। डेब्यू खेलमै ७१ बलमा ७ चौकासहित ४९ रन बनाए। त्यसपछि मैदानभित्र र बाहिरबाट पाएको प्रतिकृयाले उनको मनोबल झनै बढायो।
लुम्बिनीले पहिलो खेलमा प्रदेश २ विरुद्ध उनलाई खेलाएको थिएन। पहिलो खेलमा चौँथो नम्बरमा ब्याटिङ गरेका देवलाई लुम्बिनीले त्यसपछि ओपनिङमा ल्याएको थियो। अग्लो कदका देवको ब्याटिङ शैलीले धेरैलाई प्रभावित पार्यो।
ऋषभ पन्त खेल्ने एकेडेमीबाट सुरुवात
देवको जन्म दिल्लीमा भएको हो। अहिले उनी बुटवल बस्छन्। बुबा रामप्रसाद १५ वर्षको उमेरमै दिल्ली झरेका थिए। उतै देवको जन्म भयो। भारतमा क्रिकेट सिक्ने र खेल्नेका लागि विशेष माहोल हुन्छ। हर घर र हर गल्लीमा क्रिकेट हुन्छ। उनलाई पनि त्यही माहोलले छोयो। सानोमा दाजु रोशनसँग पार्कमा क्रिकेट खेल्दाखेल्दै उनी दिल्लीको आरपी क्रिकेट एकेडेमीमा भर्ना भए।
आरपी त्यही एकेडेमी थियो, जहाँ ऋषभ पन्तजस्ता चर्चित खेलाडी अभ्यास गर्न आउँथे। सानैदेखि भारतका ठूला क्रिकेटरलाई हेर्दै अघि बढेका देवले झण्डै चार वर्ष आरपी एकेडेमीमा बिताए।
सन् २०१६ मा नेपालमै घर बनाएपछि २०१७ मा उनी परिवारसँगै दिल्ली छाडेर वुटवलको जयकोटी बस्न थाले। सुविधा सम्पन्न एकेडेमीमा क्रिकेट खेल्दै हुर्किएका देवले नेपालमा संरचना र व्यवस्थापनको कमी देखे। तर, खेलाडीहरु राष्ट्रिय क्रिकेट टोलीमा स्थान बनाउन उच्चस्तरमा प्रतिस्पर्धा गरिरहेको उनलाई भान भयो।
छोटो समयमै राष्ट्रिय टोलीमा फड्को
करिब चार वर्षअघि नेपाल क्रिकेट संघ (क्यान) ले यू–१९ टोली बनाउन ‘ट्यालेन्ट हन्ट’ आयोजना गरेको थियो। देवले स्टार क्रिकेट एकेडेमीबाट आफ्नो कौशल देखाए। उनी ट्यालेन्ट हन्टबाट यू–१९ एसिया कपको लागि बन्द प्रशिक्षणमा प्रवेश गर्न सफल भए। तर, अन्तिम समयमा टोलीमा अटाउन सकेनन्।
गत असोजमा सम्पन्न एभरेष्ट प्रिमियर लिग (ईपीएल) मा देव चितवन टाइगर्समा आबद्ध थिए। भैरहवा ग्ल्याडियटर्सविरुद्ध डेब्यू गरेका उनले सम्झनालायक प्रदर्शन गर्न सकेनन्। यद्यपि, उनले यू–१९ प्रतियोगितामा गरेको प्रदर्शनको आधारमा यू–१९ एसिया कपमा सहभागिता जनाउने मौका पाए।
गत पुसमा मलेसियामा आयोजना भएको प्रतियोगितामा नेपाली टोलीको नेतृत्व उनै देवको काँधमा थियो। फाइनल जित्ने लक्ष्यसहित मलेसिया उडेको टोलीले समूह चरण पार गर्नु त परै जाओस् कसैले कल्पनै नगरेको कुवेतसँग एक विकेटले हार्न पुग्यो। नेपाल तीन खेलमा जितविहीन हुँदै बाहिरियो।
कुवेत, बंगलादेश र श्रीलंकासँग खेलेका उनले तीन खेलमा ४५ रन मात्रै बनाउन सके। यद्यपि, ब्याटिङमा फरक स्तर, सटिक सट छनोट र खेल्ने शैलीले उनी राष्ट्रिय टोलीमा समेटिए। गत चैत्रमा पपुवा न्यू गिनीसँग भएको पहिलो ओडीआई खेलमा उनले नेपाली सिनियर टोलीमा डेब्यू गर्ने मौका पाए।
कप्तान सन्दीप लामिछानेबाट डेब्यू क्याप लिएका उनी पहिलो खेलमा चम्किन सकेनन्। ६ बल खेलेर शून्य रनमै पेभिलियन फर्किए। १ ओभर बलिङ गरेर ६ रन दिए।
तर, समय सधैं खराब कहाँ हुन्छ र? उनले पपुवा न्यू गिनीसँगको दोस्रो खेलमा ‘जादूमय’ प्रदर्शन गरे। तेस्रो नम्बर ब्याटिङमा उत्रिएका उनले ८६ बलमा ४ चौका र ३ छक्कासहित ७२ रन बनाए। तर, उनी जिम्बावे ‘ए’विरुद्धको ‘अनअफिसियल’ एकदिवसीय श्रृङ्खलामा भने मैदान उत्रिन पाएनन्। मुख्य प्रशिक्षक पुबुदु दासानायकेले टी२० मा उत्कृष्ट खेल प्रदर्शन गरिरहेका रोहितकुमार पौडेललाई मौका दिँदा देव छायामा परे।
उमेर कलिलो भए पनि मैदानमा परिपक्क ब्याटिङ गर्दै आएका देव अहिले अन्तिम–११ मा स्थान बनाउन प्रयासरत छन्। नेपाली क्रिकेटको सबैभन्दा ठूलो र परम्परागत समस्या ओपनिङ ब्याटरकै छ। पछिल्लो आधा दशकमा सबैभन्दा बढी परिवर्तन ओपनिङ ब्याटिङमै भएको छ। पछिल्लो समय आसिफ शेख र कुशल भुर्तेललाई स्थायित्व दिन खोजे पनि उनीहरु चोटका कारण प्रतियोगिता खेल्ने या नखेल्ने भन्ने टुङ्गो लागिसकेको छैन।
त्यसैले कुशल र आसिफको अनुपस्थितिमा देव वर्तमान समयमा ओपनरका उत्कृष्ट विकल्प हुन सक्छन्। उनको स्तर, जिम्मेवारी बोध गर्ने क्षमता र आत्माविश्वासले निरन्तरता पाउने हो भने सिनियर टोलीमा उनलाई नराख्नुको विकल्प हुँदैन। उनी ओपनिङ वा तेस्रो नम्बरमा खेल्न सक्छन्। जुन स्थानमा खेले पनि अब नेपालको ब्याटिङको माथिल्लो क्रम धान्ने जिम्मेवारीमा छन् देव खनाल।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
