काठमाडौं– अवसर तिनै खेलाडी आउँछ, जो खराब समयमा पनि आत्मविश्वास गुमाउँदैनन्। विकेटकिपर तथा ब्याट्सम्यान सुवास खकुरेललाई पनि त्यस्तै अवसर प्राप्त भएको छ।
नेपालको पहिलो एकदिवसीय अन्तराष्ट्रिय (ओडीआई) श्रृङ्खला खेल्ने टोलीमा रहेका सुवास चोट र खराब ‘फर्म’का कारण लामो समय मैदानबाहिर रहे। उनलाई अहिले ‘कम ब्याक’को अवसर पनि अर्को खेलाडीको चोटकै कारण मिलेको हो। नेपाली राष्ट्रिय क्रिकेट टोलीका विकेटकिपर तथा ‘ओपनिङ’ ब्याटर आसिफ शेख चोटग्रस्त भएपछि सुवासलाई टोलीमा बोलाइएको छ। उनी बुधबारदेखि नै सुरु विश्वकप क्रिकेट लिग–२ को त्रिकोणात्मक श्रृङ्खलाका लागि अमेरिका पुगिसकेका छन्। नेपालको पहिलो खेेल भने आज (बिहीबार) छ।
पछिल्लो समय राष्ट्रिय टोलीबाट ब्याटर कुशल भुर्तेलसँगै आसिफ शेखले ओपनिङ गरिरहेका छन्। तर, आसिफ घाइते भएर खेल्न नसक्ने अवस्थामा पुगेका छन्। कुशल पनि चोटग्रस्त छन्।
नेपाल अर्को वर्ष भारतमा हुने आईसीसी एकदिवसीय विश्वकप क्रिकेट छनोटको सुरुआती खुट्किलोका रूपमा रहेको लिग–२ मा प्रतिश्पर्धा गरिरहेको छ। नेपाली टिममा आसिफलाई ‘तुरुपको एक्का’का रूपमा हेरिएको थियो।
गत वर्ष मलेसिया र नेदरल्याण्ड्स सम्मिलित टी–२० श्रृङ्खलाबाट उनी आशालाग्दा ओपनर बनेर उदाएका थिए। त्यसयता उनी कुशलसँग मिलेर लगातार ओपनिङ गरिरहेका छन्। यसपटक लिग–२ खेल्न अमेरिका गएको टोलीले अभ्यास गर्ने क्रममा आसिफ घाइते भए। नेपाल टोलीबाट नियमित विकेटकिपिङ पनि गरिरहेका आसिफले नेपाल अलस्टारविरुद्धको खेलअघि घुँडामा चोट बोक्न पुगे। गत शनिबार भएको नेपाल र ह्यूस्टन हुरिकेन्सबीचको खेलमा पनि उनी उपस्थित हुन सकेनन्।
आसिफको ओपनिङ जोडी कुशल पनि ह्यूस्टन हुरिकेन्ससँगको अभ्यास खेलका क्रममा घाइते भए। फिल्डिङका क्रममा उनलाई ‘ह्याम्स्ट्रिङ’ समस्या भएको छ। उनी पनि खेल्न सक्नेमा आशंका भएपछि लिग–२ को शीर्ष तीनमा उक्लिने लक्ष्य लिएर अमेरिका उडेका प्रशिक्षक पुबुदु दासानायके समस्यामा परे।
अमेरिका गएको टोलीका सदस्य सुनिल धमला पनि ओपनिङ गर्नसक्ने ब्याटर हुन्। उनीसँग राष्ट्रिय टिमबाट ओपनिङ गरेको अनुभव पनि छ। तर, नियमित ओपनर कुशल र आसिफले खेल्ने संभावना कम भएपछि सुवासलाई राष्ट्रिय टोलीमा समावेश गर्ने निर्णय गरिएको नेपाल क्रिकेट संघ (क्यान)का कार्यवाहक सचिव प्रशान्तविक्रम मल्लले जानकारी दिए।
‘आसिफको घुँडामा गहिरो चोट लाग्न पुग्यो। उनले अभ्यस खेलसम्म खेल्न पाएनन्। तत्त्कालै उनलाई चेकजाँच पनि गरियो। तर, सिटी स्क्यान र एमआरआई विस्तृत रिपोर्ट आउन समय लाग्ने भयो। त्यही बेला कुशल पनि घाइते भएका कारण सुवासलाई पठाउनु परेको हो,’ उनले नेपाल लाइभसँग भने।
उनका अनुसार आसिफको स्वास्थ्य परीक्षणको रिपोर्ट आइसकेको छैन। तर, जस्तोसुकै रिपोर्ट आए पनि उनी मैदान उत्रिन सक्ने स्थितिमा छैनन्। यता, कुशल फिट रहे मैदान उत्रिने संभावना छ। नियमित दुईमध्ये एक ओपनरले प्रतियोगिता गुमाउने निश्चितजस्तै भएपछि नेपाली टोली व्यवस्थापकले सुवासलाई उपयुक्त खेलाडी देखेका हुन्।
कार्यवाहक सचिव मल्लका अनुसार नेपाली टोली अमेरिका जानुअघि सुवास टीमसँगै अभ्यास गरिरहेका थिए। उनले पछिल्लो पटक नेपालको लागि २०२० मा आईसीसी विश्वकप क्रिकेट लिग–२ अन्तरगत ओमान र अमेरिका सम्मिलित त्रिकोणीय श्रृङ्खलामा अवसर पाएका थिए। घरेलु भूमिमा भएको श्रृङ्खलाका लागि राष्ट्रिय टोलीमा समावेश गरिएका शरद भेषवाकर घाइते भएपछि सुवासलाई टिममा बोलाइएको थियो।
तर, उनले प्रभावशाली खेल देखाउन सकेनन्। तीन खेल खेल्दा उनले जम्मा २५ रन बनाए। एउटा खेलमा डकआउट भएका उनले ओमानविरुद्ध २२ रन बनाएका थिए।
सुवासले पाँच वटा ओडीआई खेल्दै एक अर्धशतकसहित जम्मा ९४ रन बनाएका छन्। उनको स्ट्राइक रेट ५०.५३ छ। उनले २०१८ अगष्ट ३ मा ओडीआई डेब्यु गर्दै नेदरल्यान्डसविरुद्ध १९ रन बनाएका थिए। २०१८ सेप्टेम्बर ३० मा एशिया कप छनोट अन्तरगत युएईविरुद्धको खेलमा अर्धशतक प्रहार गरेका थिए।
त्यसपछि उनलाई चोटले सतायो। चोटका कारण करिब १५ महिना क्रिकेटबाट टाढा रहे। यो बीचमा उनलाई अब क्रिकेट करिअर सकिने चिन्ता थियो। तर, उनले हिम्मत देखाउँदै पोखरा प्रिमियर लिगमार्फत् पुनरागमन गरे।
त्यसपछि सुवासले राष्ट्रिय टोलीबाट खेल्ने सपना फेरि देख्न थाले। उनी ओमान र अमेरिका सम्मिलित त्रिकोणात्मक श्रृङ्खलामा खेल्ने टोलीको वैकल्पिक खेलाडी थिए। उक्त प्रतियोगिताअघि शरद चोटग्रस्त भएपछि मौका पाए पनि उत्कृष्ट खेल देखाउन सकेनन्।
डेभ वाट्मोरको राजीनामापछि फेरि नेपाल आएका पुबुदु दासानायकेले राष्ट्रिय टोलीमा मौका नपाएका सुनिल, सुवासजस्ता खेलाडीलाई प्रदर्शन मूल्यांकन गर्न बोलाएका थिए। त्यसैको प्रतिफल सुनिलले राष्ट्रिय टोलीमा पाँच वर्षपछि पुनरागमन गरे। आसिफ र कुशल घाइते हुँदा सवास पनि राष्ट्रिय टोलीमा फकिएका छन्। सुवासको विशेषता भनेको उनी तीव्र गितका बलरविरुद्ध राम्रो खेल्न सक्छन्।
नेपाली टोलीका कप्तान सन्दीप लामिछानले अहिले आफूहरु दुई ओपनरको फिटनेस जाँचको रिपोर्ट कुरिरहेको जानकारी दिएका छन्। रिपोर्ट आएपछि खेल्ने वा नखेल्ने निर्णय हुने उनको भनाइ छ।
‘दुई ओपनर नै घाइते हुनु हाम्रा लागि दुर्भाग्य हो, त्यो हामीले फिल गरेका छौं। उनीहरुको फिटनेस चेक भइरहेको छ। ओपनर परिवर्तनबारे फिटनेस चेकको रिपोर्टमा भर पर्ने छ। रिपोर्ट राम्रो नआए ओपनर परिवर्तन गर्नुको विकल्प छैन। त्यसबारे सोचिरहेका छौं,’ अमेरिकामा नेपाली पत्रकारहरुसँग उनले भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778409050-1778409499.jpeg)
-1764146706.png)
