गुजरात- अरबिन्द केजरीवालले केही दिनअघि गुजरातको भ्रमण गरे। उनले बीजेपीको गढ मानिने मेहसाओमा 'तिरंगा र्याली' (राष्ट्रिय झन्डासहितको र्याली) गरे।
त्यसक्रममा उनले भने, 'बीस दिनको परिवर्तन यात्रामा मैले हजारौं स्थानीयसँग कुराकानी गरें। गुजरात परिवर्तनको माग गरिरहेको छ। बीजेपी र बीजेपीकी बहिनी कांग्रेससँग गुजरातका मान्छेहरु हैरान छन्।'
त्यति मात्र नभइ उनले दिल्लीमा भएको परिवर्तनलाई पनि उल्लेख गरे र बीजेपीसँग जनता डराउने बताए। 'सबैलाई थाहा छ, दिल्लीमा कति राम्रा-राम्रा काम भएका छन्। गुजरातमा मान्छेहरु बीजेपीसँग डराउँछन्। अब बीजेपीसँग डराउन जरुरी छैन। अब गुजरात बदलिनेछ। भारतीय जनता पार्टीको एउटै औषधि हो, आम आद्मी पार्टी। बीजेपीवाला केवल आम आद्मी पार्टीसँग डराउँछन्, अरु कसैसँग होइन।'
यसको दुई दिनअघि दिल्लीका उपमुख्यमन्त्री मनिष सिसोदियाले बडोदरामा भनेका थिए, 'आम आद्मी पार्टी गुजरातका सबै विधानसभा सिटमा चुनाव लड्छ। अब गुजरातीहरुले फैसला गर्नुपर्छ। अहिलेसम्म गुजरातका मान्छेसँग कुनै विकल्प थिएन, तर अब हाजिर छ।'
पछिल्लो दुई वर्षमा केजरीवालले पटक-पटक गुजरातको भ्रमण गरेका छन्। केजरीवाल र पञ्जाव मुख्यमन्त्री भाग्वन्त मानले अप्रिल २ मा गुजरातमा 'रोड शो' गरेका थिए। सोमबार अर्थात् ६ जुनमा मेहसाओमा तिरंगा र्यालीभन्दा पहिले केजरीवाल १ मे र ११ मेमा गुजारात गएका थिए। त्यतिबेला उनले भरुच र राजकोमा पनि र्याली गरेका थिए।
गुजरातमा यो वर्षको अन्त्यमा विधानसभा चुनाव हुँदैछ। सन् २०१७ को चुनावमा गुजारातको १८२ सदस्यीय विधानसभाका लागि केजरीवालको आम आद्मी पार्टी (आप) पहिलोपल्ट चुनावमा उत्रेको थियो। तर, कुनै सिट जित्न सकेन। यसपटक आप फेरि पूरा शक्ति लगाएर गुजरात प्रवेश गरेको छ। अवस्था पनि केही परिवर्तित देखिन्छ।
उता, पछिल्लो विधासभा चुनावमा कांग्रेस पार्टीले सन् २०१२ को तुलनामा राम्रो प्रदर्शन गरेको थियो। बीजेपीको सिट पनि पहिलोपटक १०० भन्दा कम भएको थियो। जबकि, त्यतिबेला कांग्रेसलाई पनि बहुमत मिलेन। त्यसपछि भने गुजरातमा कांग्रेसको हालत ओरालो लागेको लाग्यै छ।
कांग्रेस कमजोर हुँदै
पछिल्लो निर्वाचनमा कांग्रेसको सिट बढेको थियो। सन् २०१२ मा ६१ सिट जितेको कांग्रेसले २०१७ मा १८२ मध्ये ७७ सिट जितेको थियो। बीजेपी ११५ बाट घटेर ९९ मा पुगेको थियो।
सन् २०१७ मा कांग्रेसका सिट बढे पनि पछिल्ला पाँच वर्षको अवस्था हेर्दा खुम्चिदै गएको छ। तर, आम आद्मी पार्टी अघि बढिरहेको देखिन्छ।
सन् २०१५ को चुनावअघि नै कांग्रेसका १५ विधायक पार्टी छाडेर हिँडेका थिए। त्यसमध्ये शंकर सिंह बाघेला पनि पर्छन्। सन् २०१७ पछि सात वटा उपचुनाव भए। चार वटामा बीजेपी र तीन वटामा कांग्रेसले जित्यो। सन् २०२० आठ सिटमा भएको उपचुनावमा भने सबै बीजेपीले जित्यो र बीजेपीका विधायकको संख्या १११ पुगेको छ।
यसपटक जति जति चुनाव निकट छ, त्यति नै कांग्रेसका नेताहरु साथ छाडेर हिँडिरहेका देखिन्छन्। एक रिपोर्टका अनुसार सन् २०१७ पछि १३ पूर्व तथा वर्तमान विधायकले पार्टी छाडिसकेका छन्। ताजा नाम हो हार्दिक पटेल।
आम आद्मीलाई सफलताको संकेत
गतवर्ष फेब्रुअरीमा आम आद्मी पार्टीले सुरतनगरमा अप्रत्यासित सफलता हासिल गरेको थियो। त्यहाँ आम आद्मी पार्टीले २७ सिट जितेको थियो।
सुरतनगर निगममा १२० सिट छन्। कांग्रेसले त्यहाँ खातासमेत खोल्न सकेन। यसका साथै जामनगर, राजकोट, वडोदरा, भावनगर र अहमदाबादमा पनि बीजेपीले ठूलो अन्तरले जितेको छ। कांग्रेसको कद कमजोर देखिएको छ। के आम आद्मी पार्टी गुजरातमा एउटा विकल्पका रुपमा देखिरहेको हो?
वरिष्ठ पत्रकार अजय उमठ आम आद्मी पार्टीले यसपटक ठूलो सफलता हासिल गर्छ भन्नु हतार हुने भए पनि बीजेपीको भोट बैंकमा भने निशाना साँध्न सक्ने बताउँछन्।
कांग्रेससँग पछिल्लो समय हार्दिक पटेल, अल्पेश ठाकुर र जिग्नेश मेवाणीजस्ता युवा नेता थिए। यी तीन नेताको कमान्डले पनि कांग्रेसलाई सफलता दिलाउन सकेन। यसपल्ट उनीहरु नै नरहेको पत्रकार शरद गुप्ता बताउँछन्। अहले कांग्रेसको अवस्था राम्रो नभएकाले कार्यकर्ता हतोत्साहित रहेको उनले पाएका छन्। 'यस्तो अवस्थामा धेरैलाई बीजेपी राम्रो विकल्प समेत लागेको छ,' उनी भन्छन्।
यता, सुरतनगर निगममा जितेका २७ सिटले आम आद्मीमा उत्साह देखिएको उनी बताउँछन्। तर, कुनै जादू नै गरिहाल्ने संकेत भने नदेखिएको पत्रकार अजय उमठ बताउँछन्। उनी भन्छन्, 'आम आद्मी यहाँ पहिचना बनाउन चाहन्छ, तर त्यस्तो चर्चित अनुहार ऊसँग यहाँ छैन। दिल्लीमा केजरीवाल र पञ्जावमा भाग्वन्त मनजस्तै कोही भएको भए आशा गर्न सकिन्थ्यो।'
आम आद्मीले संगठनसमेत बलियो बनाउन नपाएका कारण यसपटक बीजेपीको नभइ कांग्रेसको विकल्पका रुपमा देखिने अनुमान छ। गुजरातमा दलित, आदिवासी र ओबीसी कांग्रेसको भोट बैंक मानिन्छन्। शहरी इलाकामा बीजेपीको पकड बलियो छ। आम आद्मी पार्टीको नजरमा यसमध्ये कुन वर्गमा छ? ऊ शहरी इलाकामा जोड दिन चाहन्छ वा गाउँ? वा कांग्रेस र बीजेपी दुवैका भोट बैंकमा निशाना लगाउँछ?
वरिष्ठ पत्रकार शरद गुप्ता बीजेपीका शीर्ष नेता गुजरात र हिमाञ्चल प्रदेशमा धेरै भ्रमण गरिरहेको बताउँछन्। उनी भन्छन्, 'कांग्रेस त कहीँ देखिएको छैन। यत्रो मेहनत उनीहरु आम आद्मी पार्टीसँग लड्नकै लागि गरिरहेका छन्। उनीहरुलाई डर छ- आम आद्मी पार्टीले शहरी इलाका निशाना नबनाओस्। यसको अर्थ हुन्छ, आम आद्मी विकल्पका रुपमा जरुर अघि आइसकेको छ।'
कांग्रेस मात्र नभइ बीजेपीका समर्थकसमेत विकल्पका रुपमा आम आद्मी रोजिरहेको उनको भनाइ छ। उनको भनाइ छ, 'अहिलेलाई यति भन्न सकिन्छ, गुजरातमा मुख्य विपक्षी दल बन्न कांग्रेस र आम आद्मी पार्टीको प्रतिष्पर्धा हुनसक्छ।'
बीबीसी हिन्दीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
