नक्कली सुन बेच्ने दुई जना पक्राउ

सुरक्षा/अपराध

रासस मंगलबार, जेठ १०, २०७९ १४:०७

रुपन्देही–रुपन्देही प्रहरीले नक्कली सुन बिक्री वितरण गर्ने दुई जनालाई पक्राउ गरेको छ। प्रहरीले जेठ ५ गते रुपन्देहीको सैनामैना नगरपालिका–१० शीतलापुरस्थित होटलमा बुटवल उपमहानगरपालिका–१७ का ४० वर्षीय धन सौमैलाई बोलाई आफूहरूसँग रहेको सुनजस्ता देखिने गोल्डेन कलरको धातु दिएर ठगिगरेको अभियोगमा उक्त गिरोहलाई पक्राउ गरेको हो।

प्रहरीले पक्राउ परेका अभियुक्तलाई मंगलबार सार्वजनिक गरेको छ। पक्राउ पर्नेहरूमा रुपन्देहीको गैडहवा गाउँपालिका–९ धुसुवाका ३७ वर्षिय काके भन्ने धनबहादुर सुनार र कञ्चन गाउँपालिका–१ हात्तीबजारका ३७ वर्षीय नवीन भन्ने देवबहादुर मगरलाई सैनामैना नगरपालिका–१ हात्ती बजारबाट पक्राउ गरिएको प्रहरीले जनाएको छ ।

उनीहरूले पीडित महिलालाई होटलमा बोलाई तपाईंको पुरानो बाँकी रहेको पैसा दिन्छौं भनी विभिन्न प्रलोभनमा पारी झुक्याइ नक्कली सुनका ढिक्का दिएर महिलासँग रहेको सुनको चेन (ब्रासलेट) समेत लिई फरार भएका थिए।

प्रहरीले उनीहरुसँग सुन जस्तो देखिने पहेँलो पदार्थ लगाएको फलामको ढिक्का ९ थान र विभिन्न कम्पनीका मोबाइल सेट चार थान र पीडितको ब्रासलेट गालेर बनाएको करिब १ तोला ७ लाल बराबर तौलको सुनको डल्लासमेत बरामद गरेको जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।