काठमाडौं- नेकपा माओवादी केन्द्रका अध्यक्ष पुष्पकमल दाहाल प्रचण्डले अब सदन खुलेपछि एमालेले अवरोध जारी गरे पनि नागरिकता विधेयक पास गर्ने बताएका छन्। चुनावी सभामा सम्बोधन गर्न धनुषाको ढल्केवर पुगेका उनले मधेस र पहाडमा नागरिकताको समस्या रहेको भन्दै अब निकास खोज्ने विश्वास दिलाएका हुन्।
'एमालेले अलोकतान्त्रिक तरिकाले संसद् विघटन गर्ने, अनि संसद् स्थापित भइसकेपछि चल्न नदिने गरेको छ,' प्रचण्डले भने, 'यस्तो निरंकुश चरित्र कायम रह्यो भने अब सदन चल्दा उनीहरुले माने पनि नमाने पनि, उनीहरुले नाराबाजी गरि नै रहे पनि यो नागरिकताको विषय समाधान गरिनेछ। यो विश्वास म दिलाउन चाहन्छु।'
नागरिकता विधेयक २०७५ साउन २२ गते संसद् सचिवालयमा दर्ता भएको थियो। सो विधेयक साउन २८ गते प्रतिनिधि सभामा प्रस्तुत भएको थियो। २९ गते सामान्य छलफल भई २०७५ भदौ ५ गते राज्य व्यवस्था समितिमा पुगेको थियो।
अनेक छलफलपछि (दलहरुका आन्तरिक बैठकमा समेत) २०७७ असार ७ गते समितिले बहुमतबाट विधेयक प्रतिवेदन पारित भयो। र, ९ गते संसद्को पूर्ण बैठकमा प्रतिवेदन पेस भयो। तर, त्यसलाई सदनबाट पारित गर्नुभन्दा तत्कालीन प्रधानमन्त्री केपी शर्मा ओलीले दोस्रो पटक प्रतिनिधि सभा विघटन गरेको दोस्रो दिन अर्थात् २०७८ जेठ ९ गते नागरिकता अध्यादेश जारी गरे। त्यसविरुद्ध परेको रिटमा सुनुवाइ गर्दै सर्वोच्चले कार्यान्वयन नगर्न अन्तरिम आदेश जारी गरेको थियो।
अदालतको आदेशकै कारण अध्यादेशबाट नागरिकताको समस्या समाधन गर्न नसकिने प्रचण्डको भनाइ थियो। 'यो मुद्दा सम्बोधन हुनैपर्छ तर यो मुद्दालाई अध्यादेश ल्याएर सम्बोधन नगर, संसद्को अधिवेशन भित्रैबाट छलफल गरेर निर्णय गरेर नागरिकताको समस्या हल गर्नुपर्छ भन्ने फैसला भएको हुनाले अध्यादेश ल्याएर यसलाई हामीले समाधान गर्न सकेनौं,' उनले भने।
एमालेप्रति भने प्रचण्ड आक्रोशित सुनिएका थिए। एमालेले गरिरहेको संसद् अवरोधलाई उनले ज्यादती र अत्याचार गरेको भन्दै उसले निरंकुशतावादी र तानाशाही चरित्र देखाएको बताए। 'जसले हिजो असंवैधानिक र अलोकतान्त्रिक ढंगले संसद् विघटन गर्यो। तिनै तत्त्वहरु, त्यही एमाले गुटले नै संसद् चल्न दिएको छैन। संसद्मा बहस हुन दिएको छैन। र यो नागरिकताको समस्या ढिलो भइरहेको छ,' उनले भने।
नेकपा एमालेले गत भदौ २३ गतेपछिका संसद् बैठक अवरोध गर्दै आएको छ। लगातार दुई वटा अधिवेशन अवरोध गरेर उसले 'रेकर्ड' नै कायम गरिसकेको छ। पछिल्लो संसद् अधिवेशन चैत १ गते अन्त्य भएको थियो।
प्रचण्डले सार्वजनिक रुपमा एमालेको अवरोधका बीच नागरिकता विधेयक अघि बढाउने भनेको यो पहिलो पटक भने होइन। उनले गत चैत २४ गते सिराहको मिर्चैयामा सम्बोधन गर्दै यही आशयको अभिव्यक्ति दिएका थिए।
'नागरिकतासम्बन्धी विषयमा व्यापक र गम्भीर छलफल गर्न सदन खुलेको हुनुपर्नेछ। सदन फेरि त्यही एमाले र केपी ओली गुटले नै अवरोध गरेर नागरिकताबाट वञ्चित गरिएको छ,' त्यतिबेला प्रचण्डले भनेका थिए, 'अन्य विषय जसरी अवरोधको बीचबाट अगाडि बढायौँ। अब सदन खुल्नेबित्तिकै एमालेले अवरोध गरे पनि नागरिकता विधेयकमा छलफल गरेर पारित गरिन्छ। यो विश्वास म तपाईंहरुलाई दिलाउन चाहन्छु।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786875773.jpg)
-1786602170.png)
-1786513116.png)
