फाइल तस्बिर।
काठमाडौं- नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले अब सदन खुल्नासाथ नागरिकता विधेयक पारित गर्ने बताएका छन्। बिहीबार सहिद रामप्रताप साह प्रवेशद्वार उद्घाटन तथा नगर अस्पताल भवन शिलान्यास कार्यक्रममा सिराहको मिर्चैयामा सम्बोधन गर्दै उनले मधेसमा रहेको नागरिकताको समस्या समाधानका लागि सो विधेयक पारित गर्ने बताए।
'नागरिकतासम्बन्धी विषयमा व्यापक र गम्भीर छलफल गर्न सदन खुलेको हुनुपर्ने छ। सदन फेरि त्यही एमाले र केपी ओली गुटले नै अवरोध गरेर नागरिकताबाट वञ्चित गरिएको छ', प्रचण्डले भने, 'अन्य विषय जसरी अवरोधको बीचबाट अगाडि बढायौँ। अब सदन खुल्नेबित्तिकै एमालेले अवरोध गरे पनि नागरिकता विधेयकमा छलफल गरेर पारित गरिन्छ। यो विश्वास म तपाईंहरुलाई दिलाउन चाहन्छु।'
मधेसमा नागरिकता सम्बन्धी समस्या सबैभन्दा चर्को रहेको प्रचण्डको भनाइ छ। नागरिकताको समस्या समाधान नहुँदा मधेसका लाखौँ युवाहरुले थुप्रै अवसरबाट वञ्चित हुनुपर्ने बिडम्बनाको स्थिति रहेको उनले बताए। आफूले गठबन्धनको बैठकमा अध्यादेशमार्फत भए पनि नागरिकताको समस्या समाधान गरौँ भन्ने प्रस्ताव राखेको उनले बताए।
'तर, नागरिकता जस्तो गम्भीर र संवेदनशील विषय सदनमा छलफल गरेरै पारित गरेर मात्रै नागरिकताको समस्या हल गर्नुपर्छ भनेर अदालतले भनिदिएको हुनाले अध्यादेश ल्याउन नपाइने रहेछ', उनले भने।
प्रचण्डले बाआमाचाहिँ नागरिक हुने तर छोराछोरीले नागरिकता नपाउने जस्तो लाजमर्दो र बिडम्बना अरु केही हुन नसक्ने बताए। 'बाउ पनि नागरिक, आमा पनि नागरिक, छोराछोरीले नपाउने, संसारमा कहीँ नभएको। हाम्रो काठमाडौंतिर भनिन्छ, कहीँ नभएको जात्रा हाँडिगाउँमा', उनले भने।
नागरिकता विधेयक २०७५ साउन २२ गते संसद् सचिवालयमा दर्ता भएको थियो। सो विधेयक साउन २८ गते प्रतिनिधि सभामा प्रस्तुत भएको थियो। २९ गते सामान्य छलफल भई २०७५ भदौ ५ गते राज्य व्यवस्था समितिमा पुगेको थियो।
अनेक छलफलपछि (दलहरुका आन्तरिक बैठकमा समेत) २०७७ असार ७ गते समितिले बहुमतबाट विधेयक प्रतिवेदन पारित भयो। र, ९ गते संसद्को पूर्ण बैठकमा प्रतिवेदन पेस भयो। तर, त्यसलाई सदनबाट पारित गर्नुभन्दा तत्कालीन प्रधानमन्त्री केपी शर्मा ओलीले दोस्रो पटक प्रतिनिधि सभा विघटन गरेको दोस्रो दिन अर्थात् २०७८ जेठ ९ गते नागरिकता अध्यादेश जारी गरे। त्यसविरुद्ध परेको रिटमा सुनुवाइ गर्दै सर्वोच्चले कार्यान्वयन नगर्न अन्तरिम आदेश जारी गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
