आगामी वैशाख ३० मा हुन स्थानीय तहको निर्वाचनमा अधिकांश पालिकामा कुनै न कुनै किसिमको तालमेल भएका छन्। सत्ता गठबन्धन आबद्ध दलहरुले केन्द्रीय रूपमै घोषित तालमेल गरेका छन्। अर्कोतिर, नेकपा एमालेले पनि सम्भव भएका पालिकामा तालमेल गरेको छ। त्यसैले यसपटकको निर्वाचनमा अधिकांश स्थानमा दुई पक्षीय प्रतिस्पर्धा हुने निश्चितप्रायः छ।
नेपाल लाइभले प्रतिस्पर्धामा उत्रिएका विभिन्न उम्मेदवारहरुसँग संवाद गरिरहेको छ। ती उम्मेदवारको मौलिक अजेन्डादेखि प्रतिस्पर्धी उम्मेदवारप्रतिको मूल्यांकनबारे पनि जिज्ञासा राखेका छौँ। यसपटक काठमाडौंको दक्षिणकाली नगरपालिकाको प्रमुखमा नेपाली कांग्रेसबाट उम्मेदवारी दिएका मोहन बस्नेतसँग गरेको कुराकानी प्रस्तुत गरेका छौँ :
तपाईंलाई किन जनताले भोट दिने?
दक्षिणकाली नगरपालिकालाई समृद्ध नगरपालिका बनाउने अभियानमा २०७४ मा हामीले जिम्मेवारी लियौँ। जिम्मेवारी लिएसँगै हामीले थुप्रै कामहरू थालेका छौँ। कोभिडले सिर्जना गरेको परिस्थितिले जनताले चाहेको जस्तो र हामीले अघि सारेका समृद्धिको लक्ष्य हासिल गर्न सकेनौँ। धेरै कामहरू पूरा भएका छैनन्। र ति कामहरू पूरा गर्न फेरि एक पटक जनताबाट अनुमोदन हुन उमेरद्वारी दिएको हुँ।
फोहोर र सडक विस्तारमा तपाईंको योजना के छ?
फोहोर व्यवस्थापनका लागी हाम्रो आफ्नै ल्यान्डफिल साइट छैन। हामीले निजी कम्पनीलाई व्यवस्थापनको जिम्मा दिएका छौँ। आगामी दिनमा फोहोरबाट मोहोर बनाउने उद्देश्यले योजना अघि सारेका छौँ। यस्तै पूर्वाधारको मुख्य आधार सडक रहेकोले नयाँ मार्ग खोल्ने र भएकाको स्तरोउन्नति गर्ने योजना रहेको छ। राष्ट्रिय महत्त्वका सडकहरूको निर्माण बिन्दू (क्षेत्र) रहेकोले यसमा अन्य पक्षसँगको समझदारीमा कामहरू अघि बढाउँछौँ।
रोजगारी सिर्जना गर्ने योजना के छ ?
रोजगारी सिर्जनाको लागी ठूला उद्योग कलकारखानालाई आह्वान गरेका छौँ। केहि कामहरू अघि बढी सकेको छ। हामीले दुईवटा केबलबारको सिफारिस गरेका थियौँ। जसमध्ये वडा नम्बर एकस्थित बोसनबाट चम्पादेवीसम्म संचालनमा आउने केबलकारको शिलान्यास भइसकेको छ। होटल, रिर्साटहरू निर्माण हुने र पर्यटनको आवगन वृद्धिसँगै नयाँ रोजगारी सिर्जना हुने अपेक्षा गरेका छौँ।
त्यस्तै मित्र राष्ट्र कोरियाको एउटा नगरपालिकासँग हाम्रो भगिनी सम्बन्ध स्थापना भएकोले हामीले सिधैं वैदेशिक रोजगारीको अवसरहरू थप सिर्जना गर्न सक्छौँ भन्ने विश्वास लिएका छौँ।
शिक्षाको गुणस्तर सुधारको लागि कसरी काम गर्नुहुन्छ?
शिक्षाको लागि पहिलो कुरा त भौतिक पूर्वाधार नै हो। त्यसका लागि हामीले निकै काम गरी सकेका छौँ। अघिल्लो कार्यकालमा ८० लाख देखि १२ करोडसम्म खर्च गरेर विद्यालयका भौतिक संरचना निर्माण भइसकेका छन्। शिक्षकलाई नियमित तालिम दिने र स्थानीय माटो सुहाउँदो पाठ्यक्रम निर्माण गरी विद्यालयमा लागू गर्ने नीति अख्तियार गरेका छौँ। त्यस्तै प्राविधिक शिक्षामा जोड दिने योजनालाई प्राथिमकताका साथ अघि बढाउने नीति लिएका छौँ।
तपाईंले प्रतिस्पर्धी उमेरद्वारलाई कसरी हेर्नु भएको छ ?
मुख्य प्रतिस्पर्धा नेकपा एमालेसँग हुने भएकोले हामीसँग प्रतिस्पर्धी हुनुहुन्छ भन्ने चुनौती महसूस गरेर अघि बढेका छौँ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
