काठमाडौं– चितवन जिल्ला अदालतका न्यायाधीश हेमन्त रावलले आफू अस्वस्थ भएकाले भरतपुर महानगरपालिकाको मुख्य निर्वाचन अधिकृतको जिम्मेवारी अर्का न्यायाधीशले पाएको बताएका छन्।
निर्वाचन आयोगले भरतपुर महानगरपालिकाको मुख्य निर्वाचन अधिकृत परिवर्तन गरेको थियो। यसअघि मुख्य निर्वाचन अधिकृत रहेका रावललाई हटाएर अर्का न्यायाधीश प्रकाश कुमार अधिकारीलाई जिम्मेवारी दिइएको थियो। आयोगको यो निर्णयमा चौतर्फी टिप्पणी हुन थालेपछि न्यायाधीश रावलले आफ्नो धारणा सार्वजनिक गरेका हुन्।
उनले आफू अस्वस्थ भएकाले जिम्मेवारीबाट अलग भएको बताएका हुन्। आफूले स्वास्थ्यमा असहजता आएकाले निर्वाचन आयोगलाई गरेको आग्रह अनुसार नै जिम्मेवारी परिवर्तन रावलले सामाजिक सञ्जाल फेसबुकमा लेखेका छन्।
२६ चैत बेलुकादेखि आफूलाई रिङ्गाटा लाग्ने र वमन हुने समस्या देखिएको र दुई दिन अस्पताल बसाइपछि अहिले घरमै आराम गरिरहेको उनले उल्लेख गरेका छन्। चिकित्सकले अझै केही दिन घरमै आराम गर्न सुझाएकाले मुख्य निर्वाचन अधिकृतको जिम्मेवारीबाट अलग हुने निर्णय गरेको रावलले बताएका छन्।
‘स्वास्थ्य अवस्थामा तत्काल पूर्ण सुधार आई नसकेको अवस्थामा थप केही दिन घरमै आराम गर्नुपर्ने भन्ने चिकित्सकको सल्लाह बमोजिम म अहिले घरमै आराम गरिरहेको छु। मेरो यो असहज अवस्थामा मैले निर्वाचन आयोगमा गरेको अनुरोध बमोजिम नै निर्वाचन आयोगबाट हिजो चितवनको मुख्य निर्वाचन अधिकृतको जिम्मेवारी हेरफेर गरी न्याय परिषद्बाट पहिले नै सिफारिस गरिएका न्यायाधीशको सूचीमा रहेका चितवन जिल्ला अदालतका अर्का सहकर्मी माननीय न्यायाधीश नै मुख्य निर्वाचन अधिकृतको जिम्मेवारीमा तोकिएको अवस्था हो’, रावलले लेखेका छन्।
रावल चितवन जिल्ला अदालतका एक नम्बर न्यायाधीश हुन् भने अधिकारी चौंथो नम्बरका न्यायाधीश हुन्। रावलले निर्वाचनको निष्पक्षतमा असर पर्ने गरी निर्वाचन आयोग र अन्य कुनै राजनितिक दलप्रति कुनै किसिमको अन्यथा टिकाटिप्पणी नगर्न रावलले आग्रह गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
