काठमाडौं– यसपटक प्रहरी अतिरिक्त महानिरीक्षक (एआईजी) बढुवा प्रकरण उजुरी सुन्ने समितिदेखि न्यायालयसम्म पुगेको छ।
चैत १ गते गृहसचिव नेतृत्वको बढुवा सिफारिस समितिले वसन्त पन्त, धीरजप्रताप सिंह र रवीन्द्र धानुकलाई बढुवाका लागि सिफारिस गरेको थियो।
तर, आफूभन्दा जुनियर डीआईजीद्वय सिंह र धानुकलाई एआईजी बनाउन सिफारिस गरेको भन्दै घनश्याम अर्याल, प्रकाशजंग कार्की र ईश्वरबाबु कार्कीले बढुवामाथिको उजुरी सुन्ने समितिमा उजुरी दिएका थिए।
उक्त उजुरीमाथि कारबाही गर्दै लोक सेवा आयोगका अध्यक्ष रहेको उजुरी सुन्ने समितिले बढुवा सिफारिस समितिको निर्णयलाई नै सदर गरेको थियो। त्यसपछि सरकार (मन्त्रिपरिषद्ले)ले सिफारिसमा परेका तीनै डीआईजीलाई एआईजीमा बढुवा निर्णय गरेको थियो। सरकारको निर्णयसँगै उनीहरुले एआईजीको फुली समेत लगाइसकेका छन्।
यता बढुवा छुटेकाहरु भने सर्वोच्च अदालतसम्म पुगेका छन्। सर्वोच्चमा उनीहरुले आज (बिहीबार) नै रिट दायर गरेका छन्। रिट दायर गर्ने मध्येका डीआईजी ईश्वरबाबु कार्कीले अदालतमा पुग्नुपर्ने अवस्थाबारे केही विषय खुलाएका छन्। आउँदो पुस्ताको वृत्तिविकासका लागि रिट दायर गर्नुपरेको उनको भनाइ छ। साथै एआईजी बढुवाविरुद्ध गरेको उजुरीउपर प्रतिशोधको बदला लिने सम्भावना समेत उनले खुलाएका छन्।
सामाजिक सञ्जाल ट्वीटरमार्फत्उ नले उजुरी हाल्नुपर्नको कारणदेखि अनेक विषय खुलाएका छन्।
यसो भन्छन् कार्की:
धेरै समयपछि आज केही लेख्दैछु, समय कत्तिको उपयुक्त हो थाहा छैन। मेरालागि व्यक्तिगत र पारिवारिक रुपमा यो वर्ष सुखद् रहेन्। हुन त देश, राज्य र ब्रह्माण्ड नै सुखद् नरहेको हाम्रा लागि मात्र कसरी अनुकुल हुन सक्थ्यो र!
कुरा अब वर्तमानको गरौं। सामाजिक संजालहरुमा मेरो उपस्थिति लामै समयदेखि छ। आफ्ना निजी कुराहरु अनि समसामयिक विषयमा हल्काफुल्का टिप्पणी, व्यंग आदी माध्यमबाट। यसलाई म आफैंले कहिल्यै आफ्नो पेसासँग जोड्ने प्रयास गरिन्। तर आज पहिलोपटक मैले व्यावसायिक पाटो उप्काउँदै छु।
सरकारी सेवामा कार्यरत मैले यसपटकको बढुवामा आफ्नो नाम नपर्दा गरेका उजुरीबारे लगभग सबैजसो नाम चलेका छापा/अनलाइनहरुमा आए। समाचारका कतिपय कुराहरु तथ्यगत थिए भने कतिपय अनुमानित। तर, सन्तोष केमा रह्यो भने बिना प्रभाव पनि सकारात्मक समाचार आउँदा रहेछन् भन्ने मेरो निजी धारणाको विकास भयो।
मेरो उजुरी रोक्न यो किन? के का लागि? भनेर आग्रह, पूर्वाग्रह र दुराग्रह मिश्रित प्रश्नहरु तेर्सिए, अझ कतिपय त आजपर्यन्त भेट नभएका सुत्रहरुले समेत भेट्ने प्रयास गरे। २९ वर्षको सेवापछि स्वतः प्राप्त गर्नुपर्ने प्रतिफलबाट बिमुख म जस्तासँग भविष्यमा आउन सक्ने ‘अवसर’को बारेमा बिमर्श गर्दै गर्दा त एकछिनका लागि निकै ठूलै मानिस पो भइएछ कि भनेर भ्रममा रमाइयो पनि।
अर्कोतिर ‘खै कुन्नि के के लगाएर’ ठेगान लगाइदिने सम्मको कुरा आए।
मेरो उजुरी कर्मचारी जीवनको एउटा सामान्य प्रक्रिया हो। त्यसैले म यसलाई ग्लोरिफाई गरेर ‘लडाइँ’ भन्ने पक्षमा छैन। यो कुनै अमुक व्यक्ति/संस्था/सरकार लक्षित विरोध होइन, हुन सक्दैन। बरु यसक्रममा मलाई न्याय दिन प्रयास गर्नेहरुप्रति आभारी छु। त्यसैले यसको अतिरंजनामा पनि मेरो बिमति छ।
यसबीच मलाई गोटी बनाएर खेल्न खोज्ने पात्रहरु पनि बग्रेल्ति भेटिए, तर तिनका उत्तेजित गर्ने प्रयासहरुलाई सहज रुपमा अस्विकृत गरियो। तथापि यसलाई कसैले गलत रुपमा परिभाषित गर्छ र बुझ्छ भने त्यसको जिम्मेवारी मैले लिन सक्दिन। मेरो जिकिर केवल आफूले न्याय पाउनुपर्छ भन्ने मात्र हो।
अनि यो उजुरी अहिले नै किन? भन्ने प्रश्न पनि नतेर्सिएको हैन। यसका लागि रातो कार्ड दिएर बाँकी खेल हेर्न नदिने मात्र हैन कि मैदानमै बस्न नदिने जस्ता ‘नियम र रेफ्री’को व्यवस्थाबारे ‘वैशाख १९’ पछि बिबेचना गरौँला। अहिलेलाई सेवाकालको उत्तरार्धमा गुमाउन केही नरहेपछिको कदम मात्र हो यो।
मैले केही दिन अघि ट्विटरमा एउटा पोल गरेको थिए,‘अन्तिम आशा त न्यायालय कै रह्यो, हेरौँ! जाम कि नजाम?’
थोरै फलोवर भएपनि ८३५ ले जानुपर्छ भनेकाले पनि मलाई नैतिक बल पुग्यो। तर न्यायालय पुग्नु अघिको विद्यमान नियम र कार्यविधिको जटिलतालाई पनि पार गर्नैपर्ने बाध्यता रहेछ।
मलाई थाहा छ, नकारात्मकताउन्मुख हाम्रो परिवेशमा धेरैले मेरा कुरालाई ‘फ्रस्ट्रेसन वा कुण्ठा’को रुपमा तामेली गर्ने देखि ‘भिलेनाइज’ गर्न पनि पछि पर्ने छैनन्। अनि त्योभन्दा एक कदम अघि बढेर प्रतिशोध लिने सम्भावना पनि त्यत्तिकै देख्दैछु। संस्थागत रुपमा दिनसक्ने दु:खको त अझ कुरै नगरौं।
तर, केही छैन। आउँदो पुस्ताको वृत्तिविकासमा कलम चोप्ने क्रममा ‘फलानोले जस्तो गर्छन् कि?’भनेर यो प्रकरणले चीर निन्द्रामा मस्त ‘विवेक’लाई झस्काउने सम्मको काम गर्छ कि भन्ने ‘सपना’ देखेको छु।
अन्तमा, बिषयवस्तुले आज न्यायालय प्रवेश गरेकाले यसको निर्क्यौल नहुन्जेल अब उप्रान्त म यस विषयमा सार्वजनिक टिप्पणी गर्ने छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
