काठमाडौं– नाबालिग गायिकामाथि बलात्कार गरेको अभियोग लागेका कलाकार पल शाह (पूर्णविक्रम शाह) मुद्दाको पुर्पक्षका लागि जेल चलान भएका छन्।
शाहले जबरजस्ती करणी गरेको देखिन आएको भन्दै जिल्ला अदालत तनहुँका न्यायाधीश हरिश्चन्द्र ढुङ्गानाको इजलाशले उनलाई मुद्दाको पुर्पक्षका लागि थुनामा पठाउने आदेश जारी गरेको हो। पल शाहले दिएको बयान, घटनाको विषयमा थाहा पाउने व्यक्तिहरु (सरोज ओली, योगेश शाह, दुर्गेश थापा र दुर्गा अधिकारी लगायत)ले पीडितको न्यायका लागि कानुनी कारबाहीमा जाने भनेर छलफल भएको हो भनेर लेखाएको घटना विवरण कागजलाई आधार मान्दा पल शाहले १५ वर्षीया नाबालिकालाई 'ललाइ फकाइ विवाह गर्छु भनी प्रलोभन देखाइ' जबरजस्ती करणी गरेको देखिन आएको अदालतको आदेशमा उल्लेख छ।
आफ्नै बयानले 'कमजोर' पल शाह
अदालतमा समेत दिएको बयानमा शाहले गत वैशाख १४ गते साँझ तनहुँ दुलेगौंडास्थित प्रदीप थापाको घरको कोठामा बास बसी राति अबेरसम्म बियर खाँदै आफू र पीडितले म्यासेज आदान प्रदान गरेको बताएका छन्। राति अन्दाजी पौन १२ बजेतिर खाइ बाँकी रहेको बोतलको बियर लिएर पीडित सुतेको कोठामा गएको पनि शाहले बयानमा स्वीकार गरेका छन्।
'पीडितको कोठामा प्रवेश गरेको हुँ' भन्ने शाहको स्वीकारोक्तिलाई अदालतले सोही (वैशाख १४ गते) राति शाहले पीडितलाई करणी गरेको तथ्यसँग मिल्न भिड्न आएको रुपमा लिएको छ।
'... प्रतिवादी पल शाह भन्ने पूर्णविक्रम शाहले पीडितलाई जबरजस्ती करणी गरेको कुरामा पूर्णत: इन्कार गरेको भएतापनि निजले मौकामा गरेको बयान हेर्दा राति करिब १२ बजेतिर पीडितलाई म्यासेज गरी साथीहरूसँग खाइ बाँकी रहेको बियर लिएर पीडितको कोठामा प्रवेश गरेको तथ्यलाई प्रतिवादीले स्वीकार गरेको पाइयो,' आदेशमा भनिएको छ, ' एक्लै सुतेकी बालिकाको कोठामा राति १२ बजे प्रवेश गर्नुपर्ने कुनै औचित्यता प्रतिवादीले देखाउन सकेको पाइएन। यसरी राति पीडितको कोठामा प्रवेश गरेको भन्ने प्रतिवादीको स्वीकारोक्ति सोही राति निजले पीडितलाई करणी गरेको तथ्यसँग मिल्न भिड्न आएको देखियो।'
पीडित नाबालिग गायिकाले बयानका क्रममा शाहले आफूलाई माया प्रेम गर्ने तथा विवाह गर्ने झुटो आश्वासन दिइ पहिले पनि पटक पटक करणी गरेको बताएकी थिइन्। जुन कुरा सरोज ओली, योगेश शाह, दुर्गेश थापा र दुर्गा अधिकारीको बयानबाट समर्थित हुन आएको आदेशमा उल्लेख छ।
'...पीडित नाबालिग हुन् भन्ने कुरा प्रतिवादी (शाह)लाई पूर्ण जानकारी छ। उनी ३२ वर्षका वयस्क व्यक्ति हुन्। प्रतिवादीले ब्वाइफ्रेन्ड गर्लफ्रेन्डविच सम्बन्ध हुनु नर्मल हो, प्रेगनेन्ट भएको खन्डमा मात्र निजलाई स्वीकार गर्ने कुरा आउँछ भनी छलफलको क्रममा भनेको अडियो रेकर्डको विश्लेषण गर्दा शाहले (पीडित)लाई करणी गरेको तथ्यलाई थप पुस्ट्याइँ हुन आएको देखिन्छ,' आदेशमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
