काठमाडौं– काठमाडौं जिल्ला अदालतले बूढानीलकण्डको 'हिट एण्ड रन' मुद्दामा पृथ्वी मल्ललाई मादक पदार्थ सेवन गरी सवारी चलाएर लापरवाहीपूर्ण रुपमा पैदल यात्रीलाई ठक्कर दिएर ज्यान लिएको अभियोगमा दोषी ठहर गर्दै ६ महिना कैद मात्र सुनाएको छ। यो मागदाबीको भन्दा अर्को दफा गएर गररिएको न्यूनतम सजाय हो।
मुद्दा दायर गर्दा मल्लाई १० वर्ष कैद र सोही अनुसार जरिवाना हुनुपर्ने मागदाबी गरिएको थियो। तर, जिल्ला न्यायाधीश सूर्यप्रसाद अधिकारीको एकल इजलासले आशिंक दाबी पुग्ने फैसला सुनाएको हो।
फैसलामा चालकले लापरबाहीपूर्वक सवारीसाधन चलाएको कुरा आंशिकमात्र पुष्टि भएको उल्लेख छ। अदालतले गरेको फैसलाबारे जिल्ला सरकारी वकिल कार्यालय काठमाडौंका प्रमुख गंगा पौडेलले फैसलामा के लेखिएको छ हेरेर मात्र भन्न सकिने बताए।
यो मुद्दामा सरकारी पक्षले भवितब्य नभई जानाजान ज्यान मार्ने कार्य भएको दाबी गरेको थियो। तर, फैसला गर्दा न्यायाधीशले के हेरेर फैसला गरे भन्ने आफूले पढेपछि थाहा हुने पौडेलले बताए।
काठमाडौं जिल्ला अदालतले २ वर्ष अगाडिको सो घटनाबारे फैसला सुनाउँदै चालकलाई जम्मा ६ महिना कैद र १० हजार जरिवाना गर्ने फैसला सुनाएको छ। यो कैद सजाय सवारी तथा यातायात व्यवस्था ऐनको दफा १६१ को उपदफा ३ अनुसारको हो। सरकारी पक्षले मल्ले लापरवाहीपूर्ण रुपमा सवारी चलाएको, मदिरा सेवन गरेको र नेपालको सवारी चालक अनुमति पत्र समेत नभएको भन्दै सवारी तथा यातायात व्यवस्था ऐनको दफा १६१ को उपदफा २ अनुसार सजाय हुनुपर्ने मागदाी गरेको थियो।
जिल्ला अदालतको सोमबारको फैसलापछि कारागारको रेकर्डमा मल्ल सात महिना कारागार बसिसकेकाले उनी पुन: कारागार बस्नु नपर्ने भएको छ। उनले अब तोकिएको १० हजार जरिवाना तिरेर उन्मुक्ति पाउने छन्।
कारागारको रेकर्डमा सात महिना कारागार बसेको भनिए पनि उनी लामो समय अस्पताल बसेका थिए। अस्पतालवाटै उनले सर्वोच्चमा पुनरावेदन गरेका थिए। न्यायाधीश सपना प्रधान मल्लसहितको इजलासले धरौटीमा रिहा गर्न आदेश गरेपछि उनी रिहा भएका थिए।
२०७७ असार ३१ गते सर्वोच्चका न्यायाधीशद्वय मल्ल र मनोजकुमार शर्माको इजलासले सो घटनाका अभियुक्त पृथ्वी मल्ललाई पाँच लाख धरौटीमा थुनामुक्त गर्न आदेश दिएको थियो।
काठमाडौंको बूढानीलकण्ठमा मल्लले अत्यधिक मदिरा सेवन गरी चलाएको कारको ठक्करबाट २०७६ मंसिरमा लीला देवकोटाको ज्यान गएको थियो। काठमाडौं जिल्ला अदालतका न्यायाधीश दीपककुमार दाहालले तत्काल प्राप्त प्रमाणबाट मल्ल निर्दोष होइनन् भन्ने विश्वास गर्न नसकिने भन्दै पुर्पक्षका लागि थुनामा पठाउन आदेश दिएका थिए।
मादक पदार्थ सेवन गरी सतर्कता नअपनाई चलाएको कारको ठक्करबाट निर्दोष व्यक्तिको ज्यान गएको भन्दै अदालतले उनलाई थुनामै राख्नुपर्ने निर्णय गरेको थियो। उक्त आदेशलाई मल्लका वकीलले उच्च अदालत पाटनमा चुनौती दिएका थिए। तर, उच्च अदालत पाटनले पनि उनलाई थुनामै पठाउनुपर्ने ठहर गरेको थियो।
त्यसविरुद्ध सर्वोच्च अदालतमा दिएको निवेदनको सुनुवाइ गर्दै न्यायाधीशद्वय मल्ल र शर्माको इजलासले मल्ल डिप्रेसन र दमको बिरामी रहेको तथा कोभिड–१९ को उच्च जोखिममा रहेको बताउँदै ५ लाख धरौटीमा थुनामुक्त गर्न आदेश दिएको थियो।
यस्तो थियो घटना
अमेरिकामा बस्दै आएका काठमाडौंका २१ वर्षीय पृथ्वी मल्ल २३ मंसिर २०७६ मा स्वदेश फर्केका थिए। त्यसको तीन दिनपछि २७ मंसिरमा उनी आफैंले बा १४ च ६१२३ नम्बरको कार चलाई साथी करिश मास्केलाई लिएर नक्साल नारायणचौरमा जिम गर्न पुगेका थिए।
त्यहाँबाट साँझ साढे ७ बजेतिर बालुवाटारस्थित पलेन्ज गार्डेन रेष्टुराँमा पुगेर खाना खाएपछि उनीहरु रातभर ठमेलमा बसेका थिए। त्यहाँबाट रातको साढे १ बजे एलओडी क्लबमा पुगे। त्यसपछि बिहान साढे ४ बजे ठमेलस्थित सेनेठ क्लबमा करिशका दुई जना केटी साथीहरू परमिता राणा र मनिषालाई भेटेर उनीहरु निस्केका थिए।
प्रहरीमा दिएको बयानअनुसार त्यसपछि उनीहरू बिहानको ५ बजे बूढानीलकण्ठ हुँदै ग्रिनभ्याली रिसोर्ट पुगेका थिए। त्यहाँ गएर पनि निरन्तर मदिरा सेवन गरेका उनीहरू चढेको कारले त्यहाँबाट पुनः घरतर्फ फर्कंदा सडकको विपरीत दिशामा फुटपाथमा हिंड्दै गरेकी लीला देवकोटालाई ठक्कर दिएर ज्यान लिएको थियो।
प्रहरीमा मल्लले रातभरको अनिद्राले झ्याप्प निदाएपछि आफूले चलाएको कार अनियन्त्रित भई सडकको पल्लो छेउमा हिँडिरहेकी बटुवालाई ठक्कर दिन पुगेको बयान दिएका थिए। यसरी पल्लो पेटिमा रहेको व्यक्तिलाई ठक्कर दिएर हत्या गरेको घटनालाई गम्भीर रुमपा लिँदै मुद्दा दायर भएर पुर्पक्षको बहसका क्रममा थुनामा पठाइएको थियो।
उनीसँग नेपालको ड्राइभिङ लाइसेन्स समेत थिएन। तर, प्रहरीमा गरेको भन्दा उनले अदालतमा उल्टो बयान गरे। चारको स्पीड धेरै भएको र स्टार्ट बन्द नहुँदा भवितब्य रुमपा दुर्घटना भएको दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
