नयाँदिल्ली- केन्द्र सरकारमा नरेन्द्र मोदीले पकड जमाएपछि भारतीय कंग्रेसको ग्राफ निरन्तर ओरालो लागिरहेको छ। लोकसभामा विपक्षी दलको कुर्सी गुमाएको कंग्रेसले आगामी दिनमा राज्यसभामा समेत गुमाउने संकेत देखिएका छन्।
मोदीको अगुवाइमा भारतीय जनता पार्टी (बिजेपी)ले पछिल्ला दुई लोकसभा चुनाव प्रचण्ड बहुमतले जितेको थियो। जसका कारण विपक्षको अस्तित्व नै संकटमा परेको थियो। लोकसभामा कंग्रेस प्रतिपक्षको हैसियतमा हुन कम से कम १० प्रतिशत सिट जित्नुपर्छ। अर्थात् ५ सय ४३ सिटमा कम्तिमा ५५ सिट।
गएको निर्वाचनमा कंग्रेसले जम्मा ५२ सिट जित्यो र विपक्ष दलको हैसियत गुमायो। तर, अहिलेसम्म राज्यसभामा कंग्रेस विपक्ष दल छ। हालै भएको विधानसभा निर्वाचनमा कंग्रेसले नराम्ररी हार बेहोरेको छ।
यही सन्दर्भमा २०२२ सालमा फरक-फरक समयमा राज्यसभाका ७५ सिटमा चुनाव हुँदैछ। कंग्रेसले भने केही समयमै हानी हुनेवाला छ। त्यससँगै कंग्रेस प्रतिपक्ष दलको हैसियत गुमाउन सक्छ।
अहिले २ सय ५० मा कंग्रेससँग ३४ सिट छ। यदि त्यो संख्या घटेर २५ भन्दा तल पुग्यो भने विपक्ष दलको हैसियत गुमाउँछ। भारतीय संविधानअनुसार राज्यसभाका कुल २ सय ५० मा २३८ को निर्वाचन हुन्छ। १२ सदस्य राष्ट्रपतिले मनोनित गर्छन्।
राज्यसभा सदस्य राज्यका विधायकले चुन्ने प्रावधान छ। केही समयअघि मात्रै चुनाव भएको पाँच राज्यको चुनावको असर आगामी राज्यसभा निर्वाचनमा पर्नेछ। पाँचवटै राज्यमा कंग्रेसले पराजय भोगेको छ।
राज्यसभाका १३ सिटको चुनाव आगामी मार्च ३१ मा हुँदै छ। यसमध्य पाँच त पञ्जाबका सिट हुन्। बाँकी ८ मा आसाम २, हिमाञ्चल प्रदेश १, केरल ३, नागाल्यान्ड र त्रिपुरा १-१ सिट हुन्। यही सालको अन्त्यमा बिहारका पाँच, राजस्थानका चार, मध्यप्रदेश एक र उत्तराखण्ड एक सिटमा निर्वाचनमा हुँदैछ।
कंग्रेसले यीमध्ये पाँच राज्यका विधानसभा निर्वाचनमा ठूलो आशा गरेर बसेको थियो। तर, नतिज उल्टो आएको छ। पञ्जाबमा सबैभन्दा बढी आशा राखेको कंग्रेस १८ मा समेटियो । आम आद्मीले ९२ सिट जितेर सरकार बनायो।
यस्तो अवस्थामा पञ्जाबका पाँचवटै सिट आम आद्मी पार्टीले हत्याउने भएको छ। आम आद्मीले आफ्ना उम्मेदवार सार्वजनिक गरिसकेको छ। तर, कंग्रेसले हालसम्म कसैलाई अघि सारेको छैन। दुई तिहाईभन्दा बढी मतले जितेका कारण अन्य पार्टीले प्राप्त गर्ने सम्भावना पनि छैन।
राज्यसभामा आम आद्मी पार्टी तीनबाट बढेर आठमा पुग्नेछ। केरलबाट कंग्रेसलाई एउटा सिट प्राप्त हुन सक्छ। आगामी चुनावपछि राज्यसभामा बिजेपीले एक सय नघाउनेछ। चुनावी गठबन्धन एनडिए पहिलोपल्ट बहुमतमा हुनेछ। अहिले बिजेपीका ९३ सदस्य छन्। वर्षको अन्त्यसम्म १ सय ४ पुग्नेछछन्। एनडीएको १२२ पुग्ने अनुमान छ।
अहिलेकै आँकडामा कंग्रेस यो वर्ष २७ सांसदमा रहन सक्छ। तर, कंग्रेसमा बढ्दो निराशाले केही राज्यसभा सदस्यसमेत अन्य पार्टीमा पुग्ने अनुमान गर्न थालिएको छ। यसरी कंग्रेसले राज्यसभामा समेत प्रतिपक्षको हैसियत गुमाउन सक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1788274741.jpg)
-1786602170.png)
-1786513116.png)
