काठमाडौं– भारतीय फिल्म क्षेत्रमा अहिले तहल्का मच्चिएको छ। विवेक अग्निहोत्रीको निर्देशनमा बनेको फिल्म ‘द कश्मिर फाइल्स’को विषयलाई लिएर भारतीय राजनीतिदेखि सडकसम्म तातेको छ। भारतीय जनता पार्टीले आफ्नो सत्ता रहेका राज्यमा यो फिल्मलाई दिएको कर छुट र फिल्म हेर्न सरकारी अधिकारीलाई लिएको विदाको विषयले झन् माओल तताएको छ।
सामाजिक सञ्जालमा कतिपयले यो फिल्ममाथि रोक लगाउनुपर्ने मुद्दा उठाएका छन्। फिल्म एउटा प्रोपोगाण्डाको रुपमा विकास गरिएको बताउँदै उनीहरुले यो फिल्ममाथि रोक लगाउनुपर्ने बताएका छन्। सिनेमामाथि राजनीति हाबी भएको बताउँदै उनीहरुले सत्तापक्षले आफ्नो वकालत गर्नका लागि यो फिल्म निर्माण गरेको बताइरहेका छन्।
भारतीय सिनेक्षेत्र वा राजनीतिमा यस्तो पहिलो पटक भएको होइन। पटकपटक कुनै फिल्मको विषयलाई लिएर भारतमा चर्चा भइरहन्छ। राजनीति, धर्म वा इतिहाससँग जोडिएको विषयमा निर्माण हुने फिल्महरुको विषयमा कुनै निश्चित पक्षलाई देखाइनु र कुनै निश्चित पार्टीको सिद्धान्त वा कदमलाई ‘सत्य’ साबित गर्न खोज्ने फिल्महरुमाथि पटक पटक रोक लगाउन माग उठ्दै आएको छ। तर, कश्मिर फाइल्सको विषयमा उठेको माग भने हालसम्म सम्बोधन भएको छैन्। बरु, भारतीय सत्ता पक्ष भाजपाले यो फिल्मलाई आफ्नो ‘काँधमा चढाएर’ हिँडेको छ।
‘द कश्मिर फाइल्स’ ११ मार्चमा सिनेमाहलमा प्रदर्शनमा आउनेवित्तिकै भारतीय राजनीति र कलाक्षेत्रमा विवाद सुरु भएको थियो। कश्मिरी पण्डितहरुको पलायनको विषयलाई समेटिएको फिल्मलाई उत्तर प्रदेशका पाँच भापजा शासित राज्यमा कर छुट गरिदिएका थिए। कैयौ ठाउँमा भाजपाका कार्यकर्ता तथा समर्थकहरुले फिल्मलाई निःशुल्क प्रदर्शन गराएका थिए। फिल्मलाई लिएर भापजाले आफ्नो पार्टीको कुनै एजेण्डा जसरी नै प्रचार गरेको थियो।
फिल्मको पक्ष लिएर यसलाई प्रोपोगाण्डाको रुपमा प्रचार गरिरहेको भाजपाको विरुद्धमा भारतीय कांग्रेसले ट्विट गरेर आलोचना गरेको थियो। केरला राज्यको कांग्रेस पार्टीको आधिकारिक ट्विटरबाट फिल्ममा कश्मिरको तथ्यमाथि छेडछाड गरिएको आरोप लगाइएको थियो। आसामका सांसद बदरुद्दिन अजमलले फिल्मको विरोध गर्दै यसलाई प्रतिबन्ध लगाउनुपर्ने बताएका थिए।
द कश्मिर फाइल्सलाई भाजपाले आफ्नो एजेण्डाको रुपमा प्रचार गरिरहँदा र रोक लगाउन नमान्दा सामाजिक सञ्जालमा भने गुजरातको दंगामाथि आधारित रहेको फिल्म ‘परजानिया’को विषय पनि चर्चामा आएको छ। उक्त फिल्मलाई बजरंग दलले राजनीतिक कारणले प्रतिबन्ध लगाइएको थियो।
भारतका फिल्म समिक्षक अजय ब्रह्मात्मजले भारतीय सञ्चारमाध्यम भास्कर पत्रिकासँगको कुराकानीमा फिल्म पूर्ण रुपमा प्रोपगाण्डा फिल्म भएको बताएका छन्। उनले फिल्मले सत्ताधारीको विचारलाई प्रोत्साहन गरेको बताएका छन्। फिल्मलाई भाजपाले आफ्नो प्रचारको रुपमा प्रयोग गरेको र फिल्ममा सोही किसिमले दृश्यहरु प्रस्तुत गरिएको बताएका छन्।
गत शुक्रबारबाट प्रदर्शनमा आएको फिल्म ‘द कश्मीर फाइल्स’ले व्यापारिक रुपमा निकै अब्बल व्यापार गरिरहेको छ। पहिलो दिनमा ३ करोड ५५ लाख भारतीय रुपैयाँ कमाईमा सिमित भएको फिल्मले आफ्नो छैटांै दिनमा १९ करोड भारतीय रुपैयाँको व्यापार गरेको छ। हालसम्म फिल्मले ६० करोड भारतीय रुपैयाँभन्दा धेरैको व्यापार गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
