चितवन- चाडपर्वको समय तस्करको ध्यान निकुञ्जमा हुन सक्ने भन्दै फरक रणनीतिका साथ चितवन राष्ट्रिय निकुञ्ज सुरक्षामा कडाइ गरिएको छ।
निकुञ्ज सुरक्षार्थ खटिएको नेपाली सेनाका बटुक दल गण र निकुञ्ज कार्यालयका कर्मचारीले निकुञ्जको कडाइका साथ सुरक्षा गरिरहेका छन्।
निकुञ्जका प्रमुख संरक्षण अधिकृत रामचन्द्र कँडेलका अनुसार पूरै निकुञ्जको अवस्था थाहा हुने गरी स्वीप अपरेशन सम्पन्न गरिएको छ। दशैँअगाडि निकुञ्जमा रहेको नेपाली सेनाको ४५ वटा पोस्ट र निकुञ्ज कार्यालयको १३६ वटा पोस्टका सेना र कर्मचारीले निकुञ्जमा स्वीप अपरेशन गरेका हुन्।
चुरे अपरेशन नाम दिएर सो कार्य गरिएको कँडेलले बताए। निकुञ्जको कसरा, जर्नेली, कछुवानी, सौराहा, खगेन्द्रमल्ली, अम्रिते, सुनाचुरी, वनकट्टा, बोटे सिमरा, बगई र इच्छानगर लगायतका पोस्ट निकुञ्जलाई घेरा हाली चुरे अपरशेन गरिएको हो। सो कार्य गर्न चार दिन लागेको थियो।
मंसिर दोस्रो साताबाट निकुञ्ज सुरक्षाका लागि प्रत्येक वर्ष हिउँदको समयमा गरिँदै आएको अपरशेन महाहन्ट पनि गरिँदैछ।
निकुञ्जमा दैनिक १५१ वटा साइकल, ९ वटा गाडी, १६ मोटरसाइकल, ४ वटा कुकुर, १७ वटा पोस्टबाट हात्तीले नियमित गस्ती गर्दै आएका छन्।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
