काठमाडौं– प्रहरी कन्ट्रोलको १०० नम्बरमा सोमबार राति साढे ९ बजेतिर एउटा फोन आयो- 'रामकोटमा एउटा घरको परिवारका सबै सदस्य अर्धचेत अवस्थामा ढलिरहेको देखिन्छ।'
लगत्तै उक्त सूचना महानगरीय प्रहरी वृत्त स्वयम्भू र महानगरीय प्रहरी परिसर काठमाडौंसम्म पुग्यो। तत्कालै प्रहरी टोली घटनास्थल पुग्यो। नागार्जुन नगरपालिका–६, रामकोट डाँडापौवास्थित एउटा २ तले पक्की घरको दोस्रो तलामा फ्ल्याट भाडामा लिएर बसेको एउटा परिवारका सबै सदस्य विष सेवन गरेर अचेत अवस्थामा ढलिरहेका थिए।
घटनामा घाइते भएका ३३ वर्षीय सुर्वणमान प्रधानको भने घटनास्थलमै मृत्यु भएको थियो।
६२ वर्षीया इन्दिरामाया प्रधान, उनका छोरा ३८ वर्षका भीममान प्रधान, बुहारी ३५ वर्षीया मन्दिरा प्रधान र नातिनी ११ वर्षीया सुप्रिया प्रधान अचेत थिए। उनीहरुको अहिले पनि मनमोहन अस्पताल, सीतापाइलामा उपचार जारी रहेको महानगरीय प्रहरी परिसर काठमाडौंका एसपी दिनेशराज मैनालीले बताए।
एसपी मैनालीका अनुसार उनीहरुको अवस्था अहिले स्थिर छ। भेन्टिलेटरमा राखेर उपचार भइरहेको छ। घटनाबारे महानगरीय प्रहरी वृत्तबाट अनुसन्धान भइरहेको छ।
भित्ताभरि लेखियो- 'यो महाअलच्छिना घर हो'
रामकोटस्थित घरमा दोस्रो तलाको फ्ल्याट भाडामा लिएर यो परिवार गत कात्तिकबाट बस्न सुरु गरेको थियो। दोस्रो तलाका तीन वटा कोठामा बस्ने उनीहरु तीन वटै कोठामा ढलिरहेको अवस्थामा भेटिएका थिए।
एउटा कोठामा इन्दिरामाया उनका छोरा भीममान र भीममानकी छोरी सुप्रिया ढलिरहेको अवस्थामा भेटिएका थिए।
अर्को कोठामा भीममानका भतिज सुवर्णमान मृत अवस्थामा भेटिएका थिए भने अर्को कोठामा भीममानकी श्रीमती मन्दिरा अचेत अवस्थामा ढलेकी थिइन्। अनुसन्धान अधिकृतका अनुसार उनीहरु आइतबार राति खाना समेत नखाइ विष सेवन गरेर आत्महत्या प्रयास गरेजस्तो देखिएको छ।
‘सबै कोठामा विष घोलेर बोतलमा राखेको थियो। कालो ठूला–ठूला अक्षरमा तीन वटै कोठामा यो महाअल्च्छिना घर भनेर लेखिएको थियो’, एक अनुसन्धान अधिकृतले नेपाल लाइभसँग भने, ‘भित्ताभरी महाअलच्छिना घर भन्दै लेखेर आत्महत्याको प्रयास गरेकाले उनीहरु मानसिक तनावमा रहेको हुनसक्ने हामीले अनुमान गरेका छौं।’
फाइनान्सको ऋण
यो परिवारको फाइनान्सको ऋण रहेको पाइएको छ। न्यूरोडमा रहेको ब्रिटिश गोर्खाज् सेभिङ एण्ड क्रेडिट फाइनान्समा हाल गम्भीर बिरामी रहेकी भीममानकी श्रीमती मन्दिरा कलेक्टरको काम गर्थिन्।
फाइनान्सबाट उनीहरुले ऋणसमेत लिएको पाइएको छ। लिएको ऋण नतिरेपछि उक्त केस प्रहरीसम्म पुगेको अनुसन्धानबाट खुलेको छ। महानगरीय प्रहरी वृत्त, जनसेवामा फाइनान्सले उजुरी गरेपछि गत शुक्रबार मन्दिरालाई जेनसेवा प्रहरीले बोलाएर केरकारसमेत गरको अनुसन्धानबाट खुलेको छ।
अनुसन्धान अधिकृतका अनुसार गत शुक्रबार जनसेवा प्रहरीले मन्दिरालाई ६-७ घण्टासम्म कार्यालयमै राखेर सोधपुछ र केरकार गरेर छाडेको थियो। मानसिक अवस्था बिक्षिप्त हुनु, आर्थिक अवस्था समेत बिग्रिँदै जानु र फाइनान्सले समेत ऋण उठाउन प्रहरीसम्म उजुरी गरेपछि उनीहरु झनै तनावमा परेको हुनसक्ने अनुमान गरिएको छ। यद्यपि फाइनान्सको कति ऋण थियो भन्नेबारे अहिले नै नखुलेको प्रहरीले जनाएको छ।
सुसाइड नोट- 'यो नच्यात्नु, मोबाइलमा समेत फोटो खिचेको छ'
घटनास्थलबाट प्रहरीले सुसाइड नोटसमेत फेला पारेको छ। आफ्नो हरहिसाब सहितको १४ पानाको विवरण लेखेर उनीहरुले आत्महत्या प्रयास गरेको पाइएको छ, जहाँ आफूहरुको लास र कोठामा भएका सामानहरु समेत दाइलाई दिनु भनेर लेखिएको छ।
विभिन्न आर्थिक लेनदेनका कारण आफूहरुको अवस्थामा बिग्रेको उनीहरुले उल्लेख गरेका छन्। आफूहरुका लागि संसार नै अध्यारो हुँदै गएकाले आत्महत्याको बाटो रोज्नु परेको लगायतका विषयहरु उनीहरुले उल्लेख गरेको एक अनुसन्धान अधिकारीले नेपाल लाइभलाई बताए।
त्यसैगरी सुसाइड नोटमा 'यो नच्यात्नु होला' लेखिएको थियो। सुसाइड नोटको फोटो समेत आफूहरुले मोबाइलमा खिचेको र पठाउनुपर्ने व्यक्तिलाई समेत पठाएको उल्लेख गरिएको प्रहरी स्रोतले नेपाल लाइभलाई जानकारी दियो।
अब उनीहरुको मोबाइलसमेत विधिविज्ञान प्रयोगशालामा पठाएर थप जाँच गरिने प्रहरीले जनाएको छ। सुसाइड नोटमा फाइनान्सको कारोबारबारे समेत उल्लेख गरिएको प्रहरी स्रोत बताउँछ।
उच्च प्रहरी स्रोतका अनुसार मन्दिराले फागुन १८ गते र भीममानले फागुन २० गतेको मिति राखेर सुसाइड नोट लेखका पाइएको छ। नोटमा भीममान र उनकी श्रीमती मन्दिरा दुबैले हस्ताक्षर गरेका छन् भने औंठाछाप समेत लगाएको पाइएको छ। उक्त औंठा छाप सासुको हुनसक्ने प्रहरीको अनुमान छ।
मानसिकदेखि क्यान्सर रोगीसम्म
प्रहरीले उनीहरुको कोठाबाट मानसिक रोगको उपचार गराइरहेको प्रमाण पनि फेला पारेको छ। प्रहरी स्रोतका अनुसार भीममानले पाटन अस्पतालमा उपचार गराएर औषधी सेवन गर्न थालेको प्रमाण खुल्ने कागजात भेटिएको छ।
अर्कोतर्फ उनकी सासु इन्दिरामाया क्यान्सरको रोगी भएको पाइएको छ। भतिजसमेत मानसिक रोगी भएको खुलेको छ। मानसिक रोगीदेखि क्यान्सर रोगीसम्म हुनु र आर्थिक अवस्थासमेत बिग्रँदै गएपछि उनीहरु सामूहिक आत्महत्यासम्म पुगेको हुनसक्ने प्रहरीको अनुमान छ।
उपचारमा समस्या
हाल गम्भीर बिरामी भएका चार जनाको महमोहन अस्पतालमा उपचार भइरहेको छ। तर, उपचारको खर्च अभावका कारण समस्या भएको प्रहरीले जनाएको छ। परिवारका सबै सदस्य बिरामी भएर उपचारमा खटिँदा उनीहरुको आफन्तसमेत कोही कसैले पनि सम्पर्क गरेर आर्थिक व्यवस्था नमिलाउँदा समस्या भएको प्रहरीले जनाएको छ।
‘परिवारका सबै सदस्य बिरामी छन्। यता अस्पतालले पैसा बिना उपचार गर्ने कुरा भएन। कोही आफन्त भने यो त प्रहरीले उपचार गर्ने हो भन्ने तरिकाले कुरा गर्छन्। पैसा नहुँदा समेत उपचारमा समस्या आउने अवस्था देखिएको छ’, एक प्रहरी अधिकृतले भने।
पैसाको अभावमा उपचारमा समस्या आउने देखिएपछि प्रहरीले समेत नगरपालिकादेखि वडा कार्यालयसम्मलाई यसको जानकारी गराएको छ।
एक वर्ष अगाडि मात्रै उनीहरु डल्लुको घरबाट अंशबण्डा गरी छुट्टिएर रामकोट बस्दै आएका थिए। पहिला अर्को घरमा भाडामा बसेका उनीहरु हाल घटना भएको घरमा भने गत कात्तिकबाट मात्र बस्दै आएका हुन्।
कसरी खुवाए आमादेखि छोरी र भतिजसम्मलाई विष?
अनुसन्धानमा संलग्न प्रहरी अधिकृतहरुको दिमागमा अहिले प्रश्न तेर्सिएको छ- ‘कसरी खुवाए आमादेखि छोरी र भतिजसम्मलाई विष?’
श्रीमान्–श्रीमती तनावमा थिए भने उनीहरुले मात्रै विष सेवन गरेर आत्महत्या गर्ने सम्भावना हुन्थ्यो। तर, आमादेखि छोरी र भतिजसम्मलाई समेत विष सेवन गर्न लगाएर सामूहिक आत्महत्याको प्रयास गर्नुले घटना थप रहस्यमय रहेको प्रहरीको भनाइ छ।
बच्चालाई विष खुवाउनका लागि उनीहरुले चिनीदेखि जुस मिसाएर समेत घोलेको जस्तो देखिएको प्रहरी अधिकृत बताउँछन्। विभिन्न औषधीका ट्याब्लेटदेखि सल्फाससम्म प्रयोग गरेर उनीहरुले आत्महत्याको प्रयास गरेको देखिएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
