काठमाडौं– तीन व्यवसायी हत्या प्रकरणका मुख्य योजनाकार अनिलकुमार मण्डलले हत्या गरिएका मोहन लिम्बूको सोधखोज गर्न थालेपछि मात्रै अन्य दुई व्यवसायीको हत्या गरेको बयान दिएका छन्।
तीन व्यवसायी (राजेन्द्रकुमार श्रेष्ठ, शम्भु चौधरी र मोहन लिम्बू) हत्याको आरोपमा पक्राउ परेर जिल्ला अदालत मोरङमा थुनछेक बहस भइरहेका हत्या आरोपी तथा मुख्य योजनाकार सिरहा नगरपालिका–२१ का २९ वर्षीय मण्डलले कमिशनमा कुरो नमिल्दा लिम्बूको हत्या गरिएको बताएका छन्। आफूले हत्या गरेका लिम्बूको बारेमा नै श्रेष्ठ र चौधरीले सोधखोज गर्न थालेपछि उनीहरु टार्गेटमा परेको मण्डलले बयान दिएका छन्।
मण्डलसँगै मोरङको जहदा गाउँपालिका–४ का २९ वर्षकै दिनानाथ सोनार, मोरङकै धनपालथान गाउँपालिका–७ का ६३ वर्षीय नासिर मियाँ, सुनसरीको देवानगञ्ज गाउँपालिका–६ का १८ वर्षीय मोहमद हकिम मनसुरी, मोरङको रंगेली नगरपालिका–३ का ३५ वर्षीय मोहमद सुभान मनसुरीलाई पक्राउ गरेर कर्तव्य ज्यानको कसुरमा मुद्दा चलाइएको छ।
उनीहरुको मुद्दामा अहिले थुनछेक बहस भइरहेको छ। घटनामा संलग्न रही फरार भनिएका मोरङको धनपाल गाउँपालिका–७ का ५७ वर्षीय मोहमद सहिद मियाँलाई फरार प्रतिवादी बनाएर मुद्दा पेस भएको छ।
प्रहरी समक्ष बयानमा हत्याको मुख्य कारण कमिशन रहेको मण्डलले खुलाएका छन्। ठगी आरोपमा नख्खु कारागारमा जेल परेपछि त्यहीँ दिनानाथ सोनारसँग चिनजान भएको मण्डलले बताएका छन्। उनकै सहयोगमा अन्य व्यक्तिसमेत जम्मा गरेर तीन व्यवसायीको हत्या गरिएको उनको भनाइ छ।
हाल मृतक राजन भन्ने राजेन्द्र कुमार श्रेष्ठसँग जग्गा खरिद बिक्री गर्ने क्रममा भेट भई चिनजान भएपछि उनी मार्फत नै उनका साथीहरु मोहन लिम्वु र शम्भु कुमार चौधरीसँग कामको सिलसिलामा भेट भई मण्डलको चिनजान भएको थियो।
यस्तो छ मण्डलको बयान
मैले कामको सिलसिलामा चिनेका भरत खड्का भन्ने व्यक्तिले ललितपुरस्थित हरिसिद्धी भन्ने स्थानमा रहेको एनबी बर्ता हस्पिटल एण्ड मेडिकल रिसर्च सेन्टरको नाममा रहेको २५ रोपनी ७ आना जग्गा शम्भु चौधरीको कम्पनी सरस्वती कन्ट्रक्सन कम्पनी प्रालिको नाममा धितो पास गरिदिने र त्यस बापत १८ प्रतिशत ब्याजमा कम्तिमा ५५ देखि ६० करोड पैसा दिने, पार्टी खोजी प्रक्रिया मिलाएमा कुल प्राप्त हुने रकमको ३ प्रतिशतसम्म कमिसन दिने बताए।
त्यसपछि मैले त्यो काम गर्छु भनि राजन भन्ने राजेन्द्र कुमार श्रेष्ठलाई बताएपछि उनले शम्भु कुमार चौधरी समेतको बाटोको काम पश्चिम तिर भइरहेको छ, बैंक ग्यारेन्टी र लोनको लागि सो जग्गा उपयुक्त हुन्छ भनि उक्त कुरा शम्भु कुमार चौधरी र मोहन लिम्बुलाई समेत बताएपछि उनीहरु त्यो काम गर्न तयार भएका थिए। उनीहरुले समेत सो जग्गा माछापुच्छ्रे बैंकमा राखि १ अर्बको बैंक ग्यारेन्टी र ८० करोड रुपैंया लोन लिने तयारी गरेका थिए। उक्त कामको प्रक्रिया मिलाउनको लागि भरत खड्काले मलाई १८ लाख रुपैयाँ समेत दिएका थिए।
हत्याका मुख्य योजनाकार मण्डल
सोहि जग्गाको कामको सिलसिलामा शम्भु कुमार चौधरी, राजेन्द्र कुमार श्रेष्ठ र मोहन लिम्बुसँग कुराकानी हुँदा मोहन लिम्बुले कमिशन बापत आउने रकमको आधा हिस्सा आफूलाई चाहिने, बाँकि आधा हिस्सा हामीहरु तीन जनाले बाँडेर लिनुपर्ने कुरा गर्न थालेपछि कमिशनको विषयमा मनमुटाव सुरु भएको थियो। मैले प्राप्त हुने कमिशन सबै जनाले बराबर लिने कुरा गर्दा समेत मोहन लिम्बुले ५० प्रतिशत हिस्सा नछाड्ने बरु सबै प्रक्रिया म आफैं मिलाउछु भन्ने कुरा गर्न थाले। उता शम्भु कुमार चौधरी र राजेन्द्र कुमार श्रेष्ठ समेत मोहनकै कुरामा लाग्न थालेकोले मैले कमिशन वापत पाउने कम्तिमा ३५ रकम एकलौटी गर्नको लागि मोहन लिम्वुको हत्या गरी राजन भन्ने राजेन्द्र कुमार श्रेष्ठ र शम्भु कुमार चौधरी मार्फत् काम गर्ने योजना बनाएँ।
त्यसपछि मैले कारागारमा थुनामा बस्दा चिनजान भएका काठमाडौं तिर लसुन प्याजको व्यापार गर्ने अमित भन्ने दिनानाथ सोनारलाई मेरो बल्खु स्थित कोठामा बोलाई सबै कुरा भनेपछि निजले हत्या गर्ने मान्छेहरु खोजेर ल्याइ हत्या गरियो।
३ लाखमा डिल, ५० हजार लिएर हत्या
दिनानाथकै सहयोगमा हत्या गर्ने तयारी भएपछि मैले उक्त जग्गाको काम गरे बापत प्राप्त हुने कम्तिमा ३५ प्रतिशत कमिशन रकमको ५० प्रतिशत दिन्छु भन्दा काम गर्नको लागि कम्तिमा ४/५ जना अन्य व्यक्तिहरु ल्याउनुपर्ने र उनीहरुलाई पनि पैसा दिनुपर्ने कुरा हुँदा काम भएपछि सबैलाई ३/३ लाखको दरले दिने कुरा भएको थियो। त्यसपछि अमित भन्ने दिनानाथ सोनार बिराटनगर तिर आएको थियो। कामको तयारीको लागि मान्छेहरुलाई एडभान्स रकम पनि दिनुपर्ने र अरु खर्च पनि आउने कुरा अमित भन्ने दिनानाथ सोनारले बताए पछी आफूले अमित भन्ने दिनानाथ सोनारलाई काठमाडौबाट आइएमई गरी ८० हजार पठाएको थियो।
मंसिर महिनाको अन्तिम साताको सुरु तिर अमित भन्ने दिनानाथ सोनारले मोरङबाट अन्य मानिसहरु समेत लिएर काठमाडौ आएपछि सोनारसहित उनीसँग आएका अन्य ४ जना व्यक्तिहरुलाई ठेचोस्थित मैले भाडामा लिएको गोदाम सहितको घरमा राखेँ। उनीहरु नासिर मिया, सुभान मिया, हकिम मिया, सहिद मिया नाम गरेका व्यक्तिहरु रहेछन्। सो बेला समेत निजहरुले पैसाको कुरा गर्दा मैले काम हुनासाथ तत्काल सबैले ३/३ लाखको दरले पाउने बताएको थिएँ। काम पक्का हुनुपर्छ कसैले पनि अत्तोपत्तो नपाउने गरी जमिनमा गहिरो खाल्डो खनि पुरी सिमेन्टले ढलान गर्नुपर्छ भन्ने सल्लाह मैले दिएको थिएँ। त्यसैअनुसार म र अमित बजार गई नयाँ गाम्छा, आयो नुन, खन्ने गैंची, बेल्चा र २ बोरा सिमेन्ट समेत किनेर लयाएका थियौं।
मंसिर २८ गते मैले मोहन लिम्बुलाई कामको सिलासिलामा भेट गर्नको लागि मेरो गोदाम घरमा बोलाएको थिए। म र राजन भन्ने राजेन्द्र कुमार श्रेष्ठ वल्खु स्थितमा रहेको जग्गासम्बन्धी कारोबार गर्ने अफिसमा थियौ सोही दिन मोहन लिम्वुलाई दिनानाथ सोनार र उनले ल्याएका अन्य मानिसहरु समेत भई कर्तव्य गरी मारी खाल्डो खनि पुरेका हुन्।
मोहनको सोधखोज गरेपछि बाँकी दुई व्यवसायीको हत्या
मोहनको हत्यापछि राजेन्द्र कुमार श्रेष्ठ र शम्भु कुमार चौधरीसँग मिलेर काम गर्ने योजना बनाएको थिएँ। राजेन्द्रसँग कुरा गर्दा उनले मेरो जग्गाको काम धरान विराटनगरमा छ, मेरो आफन्त बृद्ध हुनुहुन्छ, भेटघाट पनि गर्नुछ उतै जाउ घुमफिर पनि हुन्छ कामको कुरा पनि हुन्छ भनि उनी आफैं लाजिम्पाटस्थित गाडी भाडामा पाईने वर्कशपबाट वा ९ च ८११५ नम्वरको कार भाडामा लिएर आए। उनैले उक्त कार चलाई कारमा म र उनको साथी शम्भु कुमार चौधरी समेत सोही रात काठमाण्डौबाट विराटनगरको लागि हिँड्यौं।
भोलिपल्ट २९ गते भेडेटार धरान घुम्दै वेलुकीको समयमा विराटनगरस्थित वसपार्क नजिकै रहेको मेट्रोसिटी होटल एण्ड लजमा एउटा कोठा भाडामा लिई सिंगल बेडमा म सुत्ने र डवल वेडमा राजन र शम्भु सुत्ने वस्ने गर्दै आएका थियौं। सोही क्रममा निजहरुले कामको लागि मोहन लिम्बु हुनै पर्ने भनि लिम्बुको बारेमा धेरै सोधिखोजी गर्न थाले। त्यसपछि मैले उनीहरुलाई नमारे आफू फस्न सक्ने बिचार गरी उनीहरुलाई समेत मार्ने योजना बनाउन थाले।
बिराटनगर स्थित महेन्द्र चौकको नजिक रहेको सातु पसलको छेउमा बसी राजेन्द्र कुमार श्रेष्ठ र शम्भु कुमार चौधरीलाई मार्ने योजना बनाउँदै आएका थियौं। अमित भन्ने दिनानाथ सोनारले आफ्नो घर नजिक सुनसान एकान्त उखुबारी रहेको अन्य साथीहरु पनि त्यहाँ भेला हुन सजिलो हुने र काम गर्न सजिलो हुने बताए। सोही योजना अनुसार श्रेष्ठ र चौधरीको पनि हत्या गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
