वीरेन्द्रनगर– मादक पदार्थ सेवन गरेर होहल्ला गरेको भन्दै प्रहरीले नियन्त्रणमा लिएका युवाको मृत्यु भएपछि कर्णाली प्रदेशको राजधानी सुर्खेतको वीरेन्द्रनगर तनावग्रस्त बनेको छ।
प्रहरीको कुटपिटपछि मृत्यु भएको भन्दै युवकका आफन्तहरुले घटनाको छानबिन गर्न माग गरेका छन्। मृतकका आफन्तसहित स्थानीयहरुले शनिबार सुर्खेत सदरमुकाममा प्रदर्शन समेत गरेका छन्।
शुक्रबार राति भे १ क ९२२ नम्बरको ट्रकमा नेपालगञ्जबाट सुर्खेत आउँदै गरेका कालिकोटको तिला गुफा नगरपालिकाको नाग्म बजारका व्यापारी ३२ वर्षीय कृष्ण हमालसहित ३ जनालाई पक्राउ गरेको थियो। मादक पदार्थ सेवन गरी सवारी चलाएको तथा होहल्ला गरेको भन्दै प्रहरीले हमालसहित ट्रकका चालक र सहचालकलाई पक्राउ गरेको थियो।
प्रहरी पोस्ट सुब्बाकुनाले नियन्त्रणमा लिएका हमालको शनिबार बिहान मृत्यु भएको थियो। स्वास्थ्यमा समस्या देखिएपछि प्रहरीले हमाललाई शनिबार बिहान अस्पताल पठाएको थियो।
उपचारका लागि ल्याइएका हमाललाई सुर्खेत अस्पताल प्रालिले शनिबार बिहान १० बजेतिर मृत घोषणा गरेको थियो।
आफन्तहरुले भने प्रहरीले निर्घात कुटपिट गर्दा कृष्णको मृत्यु भएको बताएका छन्।
हमालको मृत्युपछि आक्रोशित बनेका आफन्त र स्थानीयले प्रहरी कार्यालयमा ढुङ्गामुडा गर्नुका साथै सरकारी कार्यालयहरुमा पनि क्षति पुर्याएका छन्।
स्थानीय प्रशासनले भने घटनाको अनुसन्धानका लागि समिति गठन गरिएको जनाएको छ।
सुर्खेतका प्रमुख जिल्ला अधिकारी खगेन्द्रप्रसाद रिजालको अध्यक्षतामा शनिबार दिउँसो बसेको बैठकले सहायक प्रमुख जिल्ला अधिकारी ईश्वरीप्रसाद पाण्डेको संयोजकत्वमा छानबिन समिति गठन गरेको हो।
समितिमा जिल्ला प्रहरी कार्यालय सुर्खेतका डीएसपी रामप्रसाद घर्ती, राष्ट्रिय अनुसन्धान विभाग सुर्खेतका अनुसन्धान अधिकृत गोपाल थापा र उच्च अदालत बार एसोसिएसन सुर्खेतका अध्यक्ष उत्तमप्रसाद शर्मा सदस्य रहेका जनाइएको छ।
समितिलाई घटनाको सत्थ–तथ्य जाँच गरी ३ दिनभित्र प्रतिवेदन बुझाउन भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
