काठमाडौं– नेकपा माओवादी केन्द्रका केन्द्रीय सदस्य हिमाल शर्माले पार्टी पदाधिकारी, स्थायी र पोलिटब्यूरो कमिटीमा सहमति नभए निर्वाचनको माध्यमबाट भए पनि टुंगो लगाउनुपर्ने बताएका छन्।
महाधिवेशनपछि बस्न लागेको दोस्रो पूर्ण केन्द्रीय समितिको बैठकअघि सञ्चारकर्मीहरुसँगको कुराकानीमा उनले यस्तो बताएका हुन्।
‘महाधिवेशनपछिको दोस्रो पूर्ण बैठक हो। कार्यविभाजन, पदाधिकारी, स्थायी, पोलिटब्यूरो लगायतको काम बाँकी रहेको छ ती विषयमा छलफल हुन्छ,’ उनले भने, ‘अहिले उठेको एमसीसीको विषयमा पनि पार्टीभित्र बहस हुन्छ। त्यसलाई अजेण्डा नै बनाएर समीक्षा गरेर जानुपर्ने छ।’
उनले केन्द्रीय समितिको बैठकमा स्थानीय तहको निर्वाचनको तयारीका विषयमा पनि छलफल हुने बताए।
‘महाधिवेशनको बेला नै पहिले निर्वाचनबाट नै टुंगो लगाउने भन्ने थियो। पछि सहमतिमा नै गयौं। तर, सहमतिमा पनि टुंगो लाग्न सकेन,’ उनले भने, ‘अब सहमति कायम भए हुन्छ नत्र निर्वाचनको प्रक्रियाबाट भए पनि पदाधिकारी र कमिटी निर्माण गर्नुपर्छ।’
उनले एमसीसीका बारेमा पार्टीभित्र एकरुपता नआएपनि परिमार्जनसहित एमसीसी पास हुनुपर्छ भन्ने पार्टीको निर्णय पुरानै भएको बताए।
‘परिमार्जनसहित एमसीसी पास गर्नुपर्छ भन्ने धारणा नै थियो। व्याख्यात्मक घोषणा जुन भएको छ त्यो हुबहु पहिलेकै जसरी एसमीसी पास भएको होइन। त्यसलाई यी बुँदा मान्छौं यी मान्दैनौं भन्ने कानुनी रुप पनि पाएको छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
