काठमाडौं– चारदलीय सत्ता गठबन्धनले संसद्मा जारी अवरोध हटाउन प्रमुख प्रतिपक्ष एमालेलाई आग्रह गरेको छ।
बिहीबार बालुवाटारमा बसेको गठबन्धनको बैठकले निरन्तर संसद् अवरोध हुँदा संसद्प्रति नै नकारात्मक धारणा बन्न सक्ने भन्दै अवरोध हटाउन एमालेलाई आग्रह गर्ने निर्णय भएको सरकारका प्रवक्ता एवं कांग्रेस नेता ज्ञानेन्द्रबहादुर कार्कीले बताए।
‘लामो समयदेखि संसद् सञ्चालन हुन सकेको छैन। यस विषयमा गठबन्धनभित्र गम्भीर छलफल भएको छ,’ कार्कीले भने, 'संसद्को अवरोध हटाएर जनताका समस्यमा छलफल गर्ने वातावरण बनाउन प्रमुख प्रतिपक्षलाई आग्रह गर्ने निर्णय भएको छ।'
सार्वभौम संसद् सञ्चालन हुन नसकेको अवस्थामा राष्ट्रको समस्याका बारेमा गम्भीर भएर संसद् सञ्चालनको वातावरण बनाउन एमालेलाई आग्रह गरिएको कार्कीले बताए।
उनले भने,‘यो अवरोध हुँदा नागरिकता विधेयक, हवाइ उड्डयन विधेयक लगायत रोकिएका छन्। गम्भीर रुपमा छलफल हुनुपर्यो भन्ने छ।’
गठबन्धन राजनीतिक स्थायित्व, सुशासन, कानुनी शासनको प्रत्याभूति दिलाउन बनेको भन्दै कार्कीले यही गठबन्धन अगाडि बढ्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
