काठमाडौं- नेपाली कांग्रेसका प्रवक्ता डा. प्रकाशशरण महतले स्थानीय तह निर्वाचनमा सत्तारुढ गठबन्धनबीच चुनावी तालमेल नहुने संकेत गरेका छन्।
कांग्रेस प्रवक्ता महतले सत्तारुढ दलहरुबीच स्थानीय तह निर्वाचनमा चुनावी तालमेल गरेर जाने अवस्था आफूले नदेखेको बताएका हुन्।
बुधबार न्यूज एजेन्सी नेपालसँग कुराकानी गर्दै प्रवक्ता महतले स्थानीय आवश्यक्तालाई ध्यानमा राखेर स्थानीय तहको निर्वाचन सम्पन्न हुने भएकाले दलहरुले आ–आफ्नै ढंगले उम्मेदवारी दिने तर्क समेत गरिन्। तर यस विषयमा सत्तारुढ दल भित्र भने कुनै छलफल भइनसकेको उनको स्पष्टिकरण छ।
प्रवक्ता महतले आवश्यक्ताको सिद्धान्त र आ–आफ्नै फाइदाको सिद्धान्त अनुसार स्थानीय तहको निर्वाचनमा दलहरु जुटनुपर्ने अवस्था रहेको दोहोर्याए।
स्थानीय तहको निर्वाचन तोकिएको समयमा हुनेमा आफ्नो पार्टी विश्वस्त रहेको उल्लेख गर्दै उनले त्यसका लागि सरकार अघि बढिसकेको बताए।
'गठबन्धनमा एमसीसीको विषयलाई लिएर जुन संकट आएको थियो। त्यसमा समझदारी विकसित भइसकेपछि यो संकट टरेको छ। र, त्यो अव स्वभाविक रुपमा यो गठबन्धन अगाडि बढ्छ। अव बैशाख ३० गते स्थानीय तहको निर्वाचन हुँदैछ। ३० गते नै त्यो सम्पन्न हुन् । त्यसमा कुनै दुविधा छैन। यो निर्वाचन गठबन्धनकै नेतृत्वमा अगाडि बढ्छ' उनले भने।
उनले स्थानीय तहसम्म केन्द्रबाट नै गठबन्धन गरेर बाँडफाँट गर्ने कुरा अव्यवारिक भएको भन्दै गठबन्धनसहित चुनावमा जाने वा नजाने भन्नेबारे छलफल भइनसकेको बताए।
'स्थानीय निकायको निर्वाचन अलि ठूलो संख्यामा हुन्छ। स्थानीय तहको आफ्नै विशिष्ट परिवेश र परिस्थिति पनि छ। त्यसले गर्दा यो केन्द्रिय नेतृत्वले नै सम्पूर्ण कुरा बाँडफाँड गर्ने भन्ने त्यो अव्यवहारिक हुन्छ । र, विधानतः पनि त्यो सम्भव हुँदैन' महतले भने, 'स्थानीय आवश्यक्ताहरुलाई ध्यानमा राखेर पनि कतिपय ठाउँमा समझदारीहरु पनि हुन सक्दछ। कतिपय ठाउँहरुमा दलहरुले आफ्नो ढंगले गर्ने अवस्था पनि छ। तर समग्रमा अहिले गठबन्धनमै जाने वा नजाने भन्ने विषयमा छलफल भइसकेको अवस्था छैन।'
महतले प्रमुख प्रतिपक्ष दल एमालेलाई सहमतिमा लिएर संसद सूचारु गराउन आफ्नो पार्टीले प्रयास जारी राख्ने पनि बताए।
उनले सभामुख अग्नीप्रसाद सापकोटा र माधव नेपालसहितका १४ जना सांसदको विषय अदालतमा विचाराधिन मुद्दा भएकाले त्यसलाई छाडेर एमालेले संसद सूचारु गराउन पुनर्विचार गर्नुपर्ने धारणा समेत राखे। चालु अधिवेशन अन्त्य गरेर आगामी बजेट अधिवेशनमा विपक्ष दलको सक्रिय सहभागिता आवश्यक भएकाले पनि एमालेलाई सहमतिमा ल्याएर संसद सुचारु गराउन आफ्नो पार्टीले प्रयास जारी राख्ने उहाँको तर्क थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775612045.png)
-1764146706.png)
-1775575666.png)
