धनगढी– नेपाली कांग्रेस कैलालीको नयाँ सभापति चयन गर्न बिहीबार मतदान हुँदैछ। पहिलो चरणमा भएको निर्वाचनबाट कुनै उम्मेदवारको ५१ प्रतिशत मत नआएपछि दोस्रो चरणमा मतदान हुन लागेको हो।
पहिलो चरणमा आइतबार भएको निर्वाचनमा प्रकाश बम, नारायणदत्त भट्ट र रामबहादुर कलेल प्रतिस्पर्धामा उत्रिएका थिए। सोमबार सकिएको मतगणनाअनुसार बमले एक हजार १६९, भट्टले एक हजार ७२ र कलेलले १९७ मत प्राप्त गरेका थिए। तर, कसैको पनि ५१ प्रतिशत मत नआएकाले दोस्रो चरणमा बिहीबार मतदान हुन लागेको हो। अब बम र भट्टबीच प्रतिस्पर्धा हुनेछ।
बम र भट्ट दुबै संस्थापननिकट मानिन्छन्। कलेल भने डा. शेखर कोइरालानिकट हुन्।
कांग्रेसको संस्थापनले भने भट्टलाई आफ्नो प्यानलको आधिकारिक उम्मेदवार घोषणा गरेको थियो। सभापति शेरबहादुर देउवाले भट्ट नै संस्थापनको आधिकारिक उम्मेदवार भएको बताएपछि सुदूरपश्चिमबाट केन्द्रीय समितिमा प्रतिनिधित्व गर्ने पाँचजना केन्द्रीय सदस्य नै उनको पक्षमा लागेका थिए। बमको पक्षमा भने कैलालीका पूर्वसभापति नरनारायण (मनु) शाह मात्र देखिएका थिए।
कैलाली कांग्रेसमा जम्मा दुई हजार ५८६ मतदाता रहेकोमा दुई हजार ५७६ मत खसेको थियो। खसेकोमध्ये ४८ मत बदर भएको थियो।
आधिकारिक उम्मेदवार भट्टले पहिलो चरणमै ५१ प्रतिशतभन्दा धेरै मत ल्याउनेमा संस्थापनपक्ष ढुक्क रहे पनि उनी दोस्रो स्थानमा आएपछि संस्थापनपक्ष दबाबमा परेको छ। भट्टलाई जसरी पनि जिताउनैपर्ने दबाबमा रहेका केन्द्रीय सदस्यहरुले त्यसका निम्ति भरमग्दुर प्रयत्न गरिरहेका छन्।
कोइराला समूह निर्णायक
कांग्रेस कैलालीको नयाँ नेतृत्वका लागि अब कोइराला समूह निर्णायक देखिएको छ। पहिलो चरणमा कसैले पनि ५१ प्रतिशत मत नपाएपछि दोस्रो चरणमा प्रवेश गरेको निर्वाचनमा सो समुह निर्णायक हुनेछ। सो समूहबाट १९७ मत प्राप्त गरेका रामबहादुर कलेलले जसलाई सघाउँछन्, उनैले जित्ने निश्चितजस्तै छ।
कोइराला समूह भने आफ्नो समूहलाई स–सम्मान उचित पद दिनेलाई सघाउने भनेर दुबैसँग वार्तामा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1786602170.png)
-1786513116.png)
