काठमाडौं- नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र वरिष्ठ नेता नारायणकाजी श्रेष्ठवीच मतभेद बढ्दै गएपछि प्रचण्डको सचिवालयले पार्टीभित्रको असहमति कमिटीभित्रै दर्ज गर्नु उपयुक्त हुने धारणा सार्वजनिक गरेको छ।
नेता श्रेष्ठले पार्टी विभाजन गर्ने संकेत गर्दै आफुनिकट नेताहरुसँग परामर्श सुरु गरेपछि प्रचण्डको सचिवालयका तर्फबाट यस्तो धारणा आएको हो।
पार्टीमा नेताहरुबीच कहिलेकाहीँ मुद्दागत वा विषयगत अस्पष्टता र असहमतिहरु हुने, तर ती विषय पद्दतिअनुरुप पार्टी कमिटीमा दर्ज गर्नुपर्ने प्रचण्डका स्वकीय सचिव रमेश मल्लले बताए।
एमसीसी सम्झौता अनुमोदनको विषयलाई लिएर माओवादी पार्टीमा विवाद चर्कंदै गएपछि श्रेष्ठले नयाँ पार्टी गठन गर्ने चर्चा चलेसँगै प्रचण्ड मंगलबार श्रेष्ठलाई फकाउन हात्तिवनस्थित उनको निवास पुगेका थिए। प्रचण्ड र नारायणकाजीबीचको भेटपछि प्रचण्डका स्वीकय सचिव मल्लले पार्टीमा कोही कसैप्रति असहिष्णु र अमर्यादित नहुन आग्रह गरेका छन्।
‘पार्टीमा नेताहरूबीच कहिलेकाहीँ मुद्दागत/विषयगत अस्पष्टता र असहमतिहरु हुनसक्छन्, हुन्छन्। ती विषयहरुलाई पार्टी पद्तिद्द अनुरुप नै दर्ज गर्नु र पार्टी निर्णयलाई पालना गर्नु हरेक पार्टी सदस्यको जिम्मेवारी हो,’ प्रचण्डका स्वीकय सचिव मल्लले सामाजिक सञ्जालमा लेखेका छन्, ‘पहिलो कुरा, आफ्नो विचार र धारणा पद्दतिसङ्गत रूपमा राखौं। दोस्रो कुरा, कोही कसैप्रति असहिष्णु र अमर्यादित रुपले प्रस्तुत नबनौं।’
सोमबार प्रचण्डले निवासमा बोलाएका पत्रकारहरुसँग घुमाउरो भाषामा पार्टी छाडे पनि हुन्छ भन्ने खालको अभिव्यक्ति दिएको भन्दै श्रेष्ठ उनीसँग चिढिएका हुन्। उनले आफूले अपमानित महशुस गरेको भन्दै पार्टी छोड्न सक्ने संकेत दिएपछि प्रचण्ड फकाउन लागि परेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
